187 shlokas
- 1
चलत्कर्णानिलोद्भूतसिन्दूरारुणिताम्बरः
जयत्यकाले ऽपि सृजन्संध्याम् इव गजाननः
calatkarṇānilodbhūtasindūrāruṇitāmbaraḥ
jayatyakāle 'pi sṛjansaṃdhyām iva gajānanaḥ
- 2
एवं वत्सेश्वरसुतः कौशाम्ब्यां स पितुर्गृहे
नरवाहनदत्तस्ता भार्याः प्राप्यावसत्सुखम्
evaṃ vatseśvarasutaḥ kauśāmbyāṃ sa piturgṛhe
naravāhanadattastā bhāryāḥ prāpyāvasatsukham
- 3
एकदा पितुर् आस्थाने स्थितश्च पुरुषं दिवः
अवतीर्यागतं तत्र दिव्यरूपं ददर्श सः
ekadā pitur āsthāne sthitaśca puruṣaṃ divaḥ
avatīryāgataṃ tatra divyarūpaṃ dadarśa saḥ
- 4
प्रणतं तं च सत्कृत्य पित्रा साकं क्षणान्तरे
कस्त्वं किम् आगतो ऽसीति पृष्टवान्सो ऽप्य् अथाब्रवीत्
praṇataṃ taṃ ca satkṛtya pitrā sākaṃ kṣaṇāntare
kastvaṃ kim āgato 'sīti pṛṣṭavānso 'py athābravīt
- 5
अस्तीह वज्रकूटाख्यं पृष्ठे हिमवतः पुरम्
वज्रसारमयत्वाद्यत्ख्यातम् अन्वर्थनामकम्
astīha vajrakūṭākhyaṃ pṛṣṭhe himavataḥ puram
vajrasāramayatvādyatkhyātam anvarthanāmakam
- 6
तत्र वज्रप्रभाख्यो ऽहमासं विद्याधराधिपः
वज्रनिर्मितदेहत्वान्नामान्वर्थं तथैव मे
tatra vajraprabhākhyo 'hamāsaṃ vidyādharādhipaḥ
vajranirmitadehatvānnāmānvarthaṃ tathaiva me
- 7
मन्निर्मिते यथाकालं भक्तः संश्चक्रवर्तिनि
अजेयस्त्वं विपक्षाणां मत्प्रसादाद्भविष्यसि
mannirmite yathākālaṃ bhaktaḥ saṃścakravartini
ajeyastvaṃ vipakṣāṇāṃ matprasādādbhaviṣyasi
- 8
इति चाहं तपस्तुष्टेनादिष्टः शंभुना यदा
तदा प्रभोः प्रणामार्थम् आगतो ऽस्मीह सांप्रतम्
iti cāhaṃ tapastuṣṭenādiṣṭaḥ śaṃbhunā yadā
tadā prabhoḥ praṇāmārtham āgato 'smīha sāṃpratam
- 9
वत्सराजसुतो दिव्यं कल्पं कामांशसंभवः
नरवाहनदत्तो नः शशिशेखरनिर्मितः
vatsarājasuto divyaṃ kalpaṃ kāmāṃśasaṃbhavaḥ
naravāhanadatto naḥ śaśiśekharanirmitaḥ
- 10
मर्त्यो ऽप्य् उभयवेद्यर्धचक्रवर्ती भविष्यति
इति विद्याप्रभावेण विज्ञातं ह्य् अधुना मया
martyo 'py ubhayavedyardhacakravartī bhaviṣyati
iti vidyāprabhāveṇa vijñātaṃ hy adhunā mayā
- 11
आसीच्च दिव्यं कल्पं नः पुरा मर्त्यो ऽप्य् अनुग्रहात्
शार्वात्सूर्यप्रभो नाम चक्रवर्तीह यद्यपि
āsīcca divyaṃ kalpaṃ naḥ purā martyo 'py anugrahāt
śārvātsūryaprabho nāma cakravartīha yadyapi
- 12
तथाप्यभूत्स एकस्मिन्वेद्यर्थे दक्षिणे प्रभुः
उत्तरे श्रुतशर्माख्यश्चक्रवर्ती त्वभूत्तदा
tathāpyabhūtsa ekasminvedyarthe dakṣiṇe prabhuḥ
uttare śrutaśarmākhyaścakravartī tvabhūttadā
- 13
उभयोस्तु तयोरेकः कल्पस्थायी द्युचारिणाम्
चक्रवर्त्यत्र भविता देव एवातिपुण्यवान्
ubhayostu tayorekaḥ kalpasthāyī dyucāriṇām
cakravartyatra bhavitā deva evātipuṇyavān
- 14
इत्य् उक्तवन्तं वत्सेशसहितस्तं कुतूहलात्
नरवाहनदत्तः स प्राह विद्याधरं पुनः
ity uktavantaṃ vatseśasahitastaṃ kutūhalāt
naravāhanadattaḥ sa prāha vidyādharaṃ punaḥ
- 15
कथं विद्याधरैश्वर्यं मानुषेण सता पुरा
प्राप्तं सूर्यप्रभेणेति त्वया नः कथ्यतामिति
kathaṃ vidyādharaiśvaryaṃ mānuṣeṇa satā purā
prāptaṃ sūryaprabheṇeti tvayā naḥ kathyatāmiti
- 16
ततो विविक्ते देवीनां मन्त्रिणां संनिधौ च सः
राजा वज्रप्रभो वक्तुं कथां तामुपचक्रमे
tato vivikte devīnāṃ mantriṇāṃ saṃnidhau ca saḥ
rājā vajraprabho vaktuṃ kathāṃ tāmupacakrame
- 17
शाकलं नाम मद्रेषु बभूव नगरं पुरा
चन्द्रप्रभाख्यस्तत्रासीद्राजाङ्गारप्रभात्मजः
śākalaṃ nāma madreṣu babhūva nagaraṃ purā
candraprabhākhyastatrāsīdrājāṅgāraprabhātmajaḥ
- 18
आह्लादकारी विश्वस्य नाम्नान्वर्थो ऽपि यो भवन्
संतापकारी शत्रूणां बभूव ज्वलनप्रभः
āhlādakārī viśvasya nāmnānvartho 'pi yo bhavan
saṃtāpakārī śatrūṇāṃ babhūva jvalanaprabhaḥ
- 19
कीर्तिमत्यभिधानायां तस्य देव्यामजायत
पुत्रो नृपस्यातिशुभैर्लक्षणैः सूचितोदयः
kīrtimatyabhidhānāyāṃ tasya devyāmajāyata
putro nṛpasyātiśubhairlakṣaṇaiḥ sūcitodayaḥ
- 20
एष सूर्यप्रभो नाम राजा जातः पुरारिणा
भावी विद्याधराधीशचक्रवर्ती विनिर्मितः
eṣa sūryaprabho nāma rājā jātaḥ purāriṇā
bhāvī vidyādharādhīśacakravartī vinirmitaḥ
- 21
इत्य् उच्चचार गगनात्तस्मिञ्जाते स्फुटं वचः
सुधावर्षं श्रवणयोश्चन्द्रप्रभमहीभृतः
ity uccacāra gaganāttasmiñjāte sphuṭaṃ vacaḥ
sudhāvarṣaṃ śravaṇayoścandraprabhamahībhṛtaḥ
- 22
ततस्तस्य पुरारातिप्रसादोत्सवशालिनः
सूर्यप्रभः स ववृधे राजपुत्रः पितुर्गृहे
tatastasya purārātiprasādotsavaśālinaḥ
sūryaprabhaḥ sa vavṛdhe rājaputraḥ piturgṛhe
- 23
बाल एव च विद्यानां कलानां च क्रमेण सः
सर्वासां सुमतिः पारमुपासितगुरुर्ययौ
bāla eva ca vidyānāṃ kalānāṃ ca krameṇa saḥ
sarvāsāṃ sumatiḥ pāramupāsitagururyayau
- 24
पूर्णषोडशवर्षं च गुणैरावर्जितप्रजम्
यौवराज्ये ऽभ्यषिञ्चत्तं पिता चन्द्रप्रभो ऽथ सः
pūrṇaṣoḍaśavarṣaṃ ca guṇairāvarjitaprajam
yauvarājye 'bhyaṣiñcattaṃ pitā candraprabho 'tha saḥ
- 25
स एव मन्त्रिपुत्रांश्च निजांस्तस्मै समर्पयत्
भासप्रभाससिद्धार्थप्रहस्तप्रभृतीन्बहून्
sa eva mantriputrāṃśca nijāṃstasmai samarpayat
bhāsaprabhāsasiddhārthaprahastaprabhṛtīnbahūn
- 26
तैः समं युवराजत्वधुरं तस्मिंश्च बिभ्रति
आजगामैकदा तत्र मयो नाम महासुरः
taiḥ samaṃ yuvarājatvadhuraṃ tasmiṃśca bibhrati
ājagāmaikadā tatra mayo nāma mahāsuraḥ
- 27
आस्थाने च स तं चन्द्रप्रभं सूर्यप्रभे स्थिते
उपेत्य रचितातिथ्यं जगादैवं मयो नृपम्
āsthāne ca sa taṃ candraprabhaṃ sūryaprabhe sthite
upetya racitātithyaṃ jagādaivaṃ mayo nṛpam
- 28
राजन्विद्याधरेशानां चक्रवर्ती त्रिशूलिना
अयं विनिर्मितो भावी पुत्रः सूर्यप्रभस्तव
rājanvidyādhareśānāṃ cakravartī triśūlinā
ayaṃ vinirmito bhāvī putraḥ sūryaprabhastava
- 29
तत्किं न साधयत्येष विद्यास्तत्प्राप्तिदायिनीः
एतदर्थं विसृष्टो ऽहम् इह देवेन शंभुना
tatkiṃ na sādhayatyeṣa vidyāstatprāptidāyinīḥ
etadarthaṃ visṛṣṭo 'ham iha devena śaṃbhunā
- 30
अनुजानीहि तद्यावन्नीत्वैनं शिक्षयाम्य् अहम्
विद्याधरेन्द्रताहेतुं विद्यासाधनसत्क्रियाम्
anujānīhi tadyāvannītvainaṃ śikṣayāmy aham
vidyādharendratāhetuṃ vidyāsādhanasatkriyām

