249 shlokas
- 1
ततो मयसुनीथौ तौ गत्वा सूर्यप्रभश्च सः
कश्यपस्याश्रमात्तस्मात्सम्प्रापुः सर्व एव ते
tato mayasunīthau tau gatvā sūryaprabhaśca saḥ
kaśyapasyāśramāttasmātsamprāpuḥ sarva eva te
- 2
संगमं चन्द्रभागाया ऐरावत्याश्च यत्र ते
स्थिताः सूर्यप्रभस्यार्थे राजानो मित्त्रबान्धवाः
saṃgamaṃ candrabhāgāyā airāvatyāśca yatra te
sthitāḥ sūryaprabhasyārthe rājāno mittrabāndhavāḥ
- 3
प्राप्तं सूर्यप्रभं ते च दृष्ट्वा तत्र स्थिता नृपाः
रुदन्तो ऽग्रे समुत्तस्थुर्विषण्णा मरणोन्मुखाः
prāptaṃ sūryaprabhaṃ te ca dṛṣṭvā tatra sthitā nṛpāḥ
rudanto 'gre samuttasthurviṣaṇṇā maraṇonmukhāḥ
- 4
चन्द्रप्रभादर्शनजां तेषाम् आशङ्क्य दुःखिताम्
सूर्यप्रभो ऽखिलं तेभ्यो यथावृत्तं शशंस तत्
candraprabhādarśanajāṃ teṣām āśaṅkya duḥkhitām
sūryaprabho 'khilaṃ tebhyo yathāvṛttaṃ śaśaṃsa tat
- 5
तथापि विग्नाः पृष्टास्ते तेन कृच्छ्राद् अवर्णयन्
तस्य भार्यापहरणं विहितं श्रुतशर्मणा
tathāpi vignāḥ pṛṣṭāste tena kṛcchrād avarṇayan
tasya bhāryāpaharaṇaṃ vihitaṃ śrutaśarmaṇā
- 6
तत्पराभवदुःखाच्च देहत्यागोद्यमं निजम्
वारितं दिव्यया वाचा तथैवास्मै न्यवेदयत्
tatparābhavaduḥkhācca dehatyāgodyamaṃ nijam
vāritaṃ divyayā vācā tathaivāsmai nyavedayat
- 7
ततः सूर्यप्रभस्तत्र प्रतिज्ञाम् अकरोत्क्रुधा
यदि ब्रह्मादयः सर्वे ऽप्य् अभिरक्षन्ति तं सुराः
tataḥ sūryaprabhastatra pratijñām akarotkrudhā
yadi brahmādayaḥ sarve 'py abhirakṣanti taṃ surāḥ
- 8
तथाप्य् उन्मूलनीयो मे श्रुतशर्मा स निश्चितम्
परदारापहरणे छद्मप्रागल्भ्यवाञ्शठः
tathāpy unmūlanīyo me śrutaśarmā sa niścitam
paradārāpaharaṇe chadmaprāgalbhyavāñśaṭhaḥ
- 9
एवं कृतप्रतिज्ञश्च गन्तुं तद्विजयाय सः
लग्नं निश्चितवान्दृष्टं गणकैः सप्तमे ऽहनि
evaṃ kṛtapratijñaśca gantuṃ tadvijayāya saḥ
lagnaṃ niścitavāndṛṣṭaṃ gaṇakaiḥ saptame 'hani
- 10
ततस्तं निश्चितं ज्ञात्वा गृहीतविजयोद्यमम्
द्रढयित्वा पुनर्वाचा प्राह सूर्यप्रभं मयः
tatastaṃ niścitaṃ jñātvā gṛhītavijayodyamam
draḍhayitvā punarvācā prāha sūryaprabhaṃ mayaḥ
- 11
सत्यं कृतोद्यमस्त्वं चेत्तद्वदामि मया तदा
मायां प्रदर्श्य नीत्वा ते पाताले स्थापिताः प्रियाः
satyaṃ kṛtodyamastvaṃ cettadvadāmi mayā tadā
māyāṃ pradarśya nītvā te pātāle sthāpitāḥ priyāḥ
- 12
एवं त्वं विजयोद्योगं करोषि रभसाद् इति
नैवम् एव तथा ह्य् अग्निर्ज्वलेद्वातेरितो यथा
evaṃ tvaṃ vijayodyogaṃ karoṣi rabhasād iti
naivam eva tathā hy agnirjvaledvāterito yathā
- 13
तद् एहि यामः पातालं प्रियास्ते दर्शयामि ताः
एवं मयवचः श्रुत्वा ननन्दुः सर्व एव ते
tad ehi yāmaḥ pātālaṃ priyāste darśayāmi tāḥ
evaṃ mayavacaḥ śrutvā nananduḥ sarva eva te
- 14
प्राक्तनेन च तेनैव प्रविश्य विवरेण ते
जग्मुश्चतुर्थं पातालं मयासुरपुरःसराः
prāktanena ca tenaiva praviśya vivareṇa te
jagmuścaturthaṃ pātālaṃ mayāsurapuraḥsarāḥ
- 15
तत्रैकतो वासगृहान्मयः सूर्यप्रभाय ताः
भार्या मदनसेनाद्या आनीयासौ समर्पयत्
tatraikato vāsagṛhānmayaḥ sūryaprabhāya tāḥ
bhāryā madanasenādyā ānīyāsau samarpayat
- 16
गृहीत्वा तास्तथान्याश्च पत्नीस्ताः सो ऽसुरात्मजाः
ययौ सूर्यप्रभो द्रष्टुं प्रह्लादं मयवाक्यतः
gṛhītvā tāstathānyāśca patnīstāḥ so 'surātmajāḥ
yayau sūryaprabho draṣṭuṃ prahlādaṃ mayavākyataḥ
- 17
मयाच्छ्रुतवरप्राप्तिः प्रणतं तं च सो ऽसुरः
आत्तायुधो ऽथ जिज्ञासुः कृतकक्रोधम् अभ्यधात्
mayācchrutavaraprāptiḥ praṇataṃ taṃ ca so 'suraḥ
āttāyudho 'tha jijñāsuḥ kṛtakakrodham abhyadhāt
- 18
श्रुतं मया दुराचार यत्कन्या द्वादश त्वया
भ्रात्रार्जिता मे ऽपहृतास्तत्त्वां हन्म्य् एष पश्य माम्
śrutaṃ mayā durācāra yatkanyā dvādaśa tvayā
bhrātrārjitā me 'pahṛtāstattvāṃ hanmy eṣa paśya mām
- 19
तच्छ्रुत्वा निर्विकारस्तं पश्यन्सूर्यप्रभो ऽब्रवीत्
मच्छरीरं त्वदायत्तम् अविनीतं प्रशाधि माम्
tacchrutvā nirvikārastaṃ paśyansūryaprabho 'bravīt
maccharīraṃ tvadāyattam avinītaṃ praśādhi mām
- 20
इत्य् उक्तवन्तं प्रह्लादो विहस्य तम् उवाच सः
प्रेक्षितो ऽसि मया यावद्दर्पलेशो ऽपि नास्ति ते
ity uktavantaṃ prahlādo vihasya tam uvāca saḥ
prekṣito 'si mayā yāvaddarpaleśo 'pi nāsti te
- 21
वरं गृहाण तुष्टो ऽस्मीत्य् उक्तस्तेन तथेति सः
भक्तिं गुरुषु शंभौ च वव्रे सूर्यप्रभो वरम्
varaṃ gṛhāṇa tuṣṭo 'smīty uktastena tatheti saḥ
bhaktiṃ guruṣu śaṃbhau ca vavre sūryaprabho varam
- 22
ततस्तुष्टेषु सर्वेषु तस्मै सूर्यप्रभाय सः
प्रह्लादो यामिनीं नाम द्वितीयां तनयां ददौ
tatastuṣṭeṣu sarveṣu tasmai sūryaprabhāya saḥ
prahlādo yāminīṃ nāma dvitīyāṃ tanayāṃ dadau
- 23
सहायत्वे च पुत्रौ द्वौ तस्यादात्सो ऽसुरेश्वरः
ततः सर्वैः सहामीलपार्श्वं सूर्यप्रभो ययौ
sahāyatve ca putrau dvau tasyādātso 'sureśvaraḥ
tataḥ sarvaiḥ sahāmīlapārśvaṃ sūryaprabho yayau
- 24
सो ऽपि श्रुतवरप्राप्तितुष्टस्तस्मै सुखावतीम्
ददौ द्वितीयां तनयां साहाय्ये च सुतद्वयम्
so 'pi śrutavaraprāptituṣṭastasmai sukhāvatīm
dadau dvitīyāṃ tanayāṃ sāhāyye ca sutadvayam
- 25
ततः सभाजयन्न् अन्यान्साहाय्यायासुराधिपान्
स्थितः सूर्यप्रभः सो ऽत्र तेष्व् अहःसु प्रियासखः
tataḥ sabhājayann anyānsāhāyyāyāsurādhipān
sthitaḥ sūryaprabhaḥ so 'tra teṣv ahaḥsu priyāsakhaḥ
- 26
तिस्रः सुनीथभार्याश्च स्वभार्याश्च नृपात्मजाः
सर्वाः सगर्भाः संजाता मयादिसहितो ऽशृणोत्
tisraḥ sunīthabhāryāśca svabhāryāśca nṛpātmajāḥ
sarvāḥ sagarbhāḥ saṃjātā mayādisahito 'śṛṇot
- 27
पृष्टाश्च दोहदं तुल्यं शशंसुर् अखिला अपि
महाहवदिदृक्षां ता ननन्दाथ मयासुरः
pṛṣṭāśca dohadaṃ tulyaṃ śaśaṃsur akhilā api
mahāhavadidṛkṣāṃ tā nanandātha mayāsuraḥ
- 28
एतासु दिष्ट्या सम्भूता असुरा ये पुरा हताः
तेन जातो ऽभिलाषो ऽयम् एतासाम् इति सो ऽवदत्
etāsu diṣṭyā sambhūtā asurā ye purā hatāḥ
tena jāto 'bhilāṣo 'yam etāsām iti so 'vadat
- 29
एवं ययुः षड्दिवसाः सप्तमे ते रसातलात्
भार्यादियुक्ता निर्जग्मुः सर्वे सूर्यप्रभादयः
evaṃ yayuḥ ṣaḍdivasāḥ saptame te rasātalāt
bhāryādiyuktā nirjagmuḥ sarve sūryaprabhādayaḥ
- 30
उत्पातमाया विघ्नाय या तेषां दर्शितारिभिः
सा सुवासकुमारेण स्मृतायातेन नाशिता
utpātamāyā vighnāya yā teṣāṃ darśitāribhiḥ
sā suvāsakumāreṇa smṛtāyātena nāśitā

