96 shlokas
- 1
ततो ऽन्येद्युरुपेतां तां प्रातः सोमप्रभां सखीम्
कलिङ्गसेना विश्रम्भात्कथां कुर्वत्युवाच सा
tato 'nyedyurupetāṃ tāṃ prātaḥ somaprabhāṃ sakhīm
kaliṅgasenā viśrambhātkathāṃ kurvatyuvāca sā
- 2
मां प्रसेनजिते राज्ञे तातो दास्यति निश्चितम्
एतच्छ्रुतं मयाम्बातो दृष्टो वृद्धः स च त्वया
māṃ prasenajite rājñe tāto dāsyati niścitam
etacchrutaṃ mayāmbāto dṛṣṭo vṛddhaḥ sa ca tvayā
- 3
वत्सेशस्तु यथा रूपे त्वयैव कथितस्तथा
श्रुतिमार्गप्रविष्टेन हृतं तेन यथा मनः
vatseśastu yathā rūpe tvayaiva kathitastathā
śrutimārgapraviṣṭena hṛtaṃ tena yathā manaḥ
- 4
तत्प्रसेनजितं पूर्वं प्रदर्श्य नय तत्र माम्
आस्ते वत्सेश्वरो यत्र किं तातेन किमम्बया
tatprasenajitaṃ pūrvaṃ pradarśya naya tatra mām
āste vatseśvaro yatra kiṃ tātena kimambayā
- 5
एवम् उक्तवतीं तां च सोत्कां सोमप्रभाब्रवीत्
गन्तव्यं यदि तद्यामो यन्त्रेण व्योमगामिना
evam uktavatīṃ tāṃ ca sotkāṃ somaprabhābravīt
gantavyaṃ yadi tadyāmo yantreṇa vyomagāminā
- 6
किंतु सर्वं गृहाण त्वं निजं परिकरं यतः
दृष्ट्वा वत्सेश्वरं भूयो नागन्तुम् इह शक्ष्यसि
kiṃtu sarvaṃ gṛhāṇa tvaṃ nijaṃ parikaraṃ yataḥ
dṛṣṭvā vatseśvaraṃ bhūyo nāgantum iha śakṣyasi
- 7
न च त्वं द्रक्ष्यसि पुनः पितरौ न स्मरिष्यसि
दूरस्थां प्राप्तदयिता विस्मरिष्यसि माम् अपि
na ca tvaṃ drakṣyasi punaḥ pitarau na smariṣyasi
dūrasthāṃ prāptadayitā vismariṣyasi mām api
- 8
नह्येवम् अहमेष्यामि भर्तृवेश्मनि ते सखि
तच्छ्रुत्वा राजकन्या सा रुदती ताम् अभाषत
nahyevam ahameṣyāmi bhartṛveśmani te sakhi
tacchrutvā rājakanyā sā rudatī tām abhāṣata
- 9
तर्हि वत्सेश्वरं तं त्वम् इहैवानय मे सखि
नोत्सहे तत्र हि स्थातुं क्षणम् एकं त्वया विना
tarhi vatseśvaraṃ taṃ tvam ihaivānaya me sakhi
notsahe tatra hi sthātuṃ kṣaṇam ekaṃ tvayā vinā
- 10
नानिन्ये चानिरुद्धः किमुपायाच्चित्रलेखया
जानत्यपि तथा चैतां मत्तस्त्वं तत्कथां शृणु
nāninye cāniruddhaḥ kimupāyāccitralekhayā
jānatyapi tathā caitāṃ mattastvaṃ tatkathāṃ śṛṇu
- 11
बाणासुरस्य तनया बभूवोषेति विश्रुता
तस्याश्चाराधिता गौरी पतिप्राप्त्यै वरं ददौ
bāṇāsurasya tanayā babhūvoṣeti viśrutā
tasyāścārādhitā gaurī patiprāptyai varaṃ dadau
- 12
स्वप्ने प्राप्स्यसि यत्सङ्गं स ते भर्ता भवेद् इति
ततो देवकुमाराभं कंचित्स्वप्ने ददर्श सा
svapne prāpsyasi yatsaṅgaṃ sa te bhartā bhaved iti
tato devakumārābhaṃ kaṃcitsvapne dadarśa sā
- 13
गान्धर्वविधिना तेन परिणीता तथैव च
प्राप्ततत्सत्यसंभोगा प्राबुध्यत निशाक्षये
gāndharvavidhinā tena pariṇītā tathaiva ca
prāptatatsatyasaṃbhogā prābudhyata niśākṣaye
- 14
अदृष्ट्वा तं पतिं दृष्टं दृष्ट्वा संभोगलक्षणम्
स्मृत्वा गौरीवरं साभूत्सातङ्कभयविस्मया
adṛṣṭvā taṃ patiṃ dṛṣṭaṃ dṛṣṭvā saṃbhogalakṣaṇam
smṛtvā gaurīvaraṃ sābhūtsātaṅkabhayavismayā
- 15
ताम्यन्ती च ततः सा तं स्वप्ने दृष्टं प्रियं विना
पृच्छन्त्यै चित्रलेखायै सख्यै सर्वं शशंस तत्
tāmyantī ca tataḥ sā taṃ svapne dṛṣṭaṃ priyaṃ vinā
pṛcchantyai citralekhāyai sakhyai sarvaṃ śaśaṃsa tat
- 16
सापि नामाद्यभिज्ञानं न किंचित्तस्य जानती
योगेश्वरी चित्रलेखा तामुषाम् एवम् अब्रवीत्
sāpi nāmādyabhijñānaṃ na kiṃcittasya jānatī
yogeśvarī citralekhā tāmuṣām evam abravīt
- 17
सखि देवीवरस्यायं प्रभावो ऽत्र किमुच्यते
किंत्व् अभिज्ञानशून्यस्ते सो ऽन्वेष्टव्यः प्रियः कथम्
sakhi devīvarasyāyaṃ prabhāvo 'tra kimucyate
kiṃtv abhijñānaśūnyaste so 'nveṣṭavyaḥ priyaḥ katham
- 18
परिजानासि चेत्तं ते ससुरासुरमानुषम्
जगल्लिखामि तन्मध्ये तं मे दर्शय येन सः
parijānāsi cettaṃ te sasurāsuramānuṣam
jagallikhāmi tanmadhye taṃ me darśaya yena saḥ
- 19
आनीयते मयेत्य् उक्ता सा तथेत्य् उदिते तया
चित्रलेखा क्रमाद्विश्वम् अलिखद्वर्णवर्तिभिः
ānīyate mayety uktā sā tathety udite tayā
citralekhā kramādviśvam alikhadvarṇavartibhiḥ
- 20
तत्रोषा सो ऽयमित्यस्या हृष्टाङ्गुल्या सकम्पया
द्वारवत्यां यदुकुलादनिरुद्धमदर्शयत्
tatroṣā so 'yamityasyā hṛṣṭāṅgulyā sakampayā
dvāravatyāṃ yadukulādaniruddhamadarśayat
- 21
चित्रलेखा ततो ऽवादीत्सखि धन्यासि यत्त्वया
भर्तानिरुद्धः प्राप्तो ऽयं पौत्रो भगवतो हरेः
citralekhā tato 'vādītsakhi dhanyāsi yattvayā
bhartāniruddhaḥ prāpto 'yaṃ pautro bhagavato hareḥ
- 22
योजनानां सहस्रेषु षष्टौ वसति स त्वितः
तच्छ्रुत्वा साधिकौत्सुक्यवशात्ताम् अब्रवीद् उषा
yojanānāṃ sahasreṣu ṣaṣṭau vasati sa tvitaḥ
tacchrutvā sādhikautsukyavaśāttām abravīd uṣā
- 23
नाद्य चेत्सखि तस्याङ्कं श्रये श्रीखण्डशीतलम्
तदत्युद्दामकामाग्निनिर्दग्धां विद्धि मां मृताम्
nādya cetsakhi tasyāṅkaṃ śraye śrīkhaṇḍaśītalam
tadatyuddāmakāmāgninirdagdhāṃ viddhi māṃ mṛtām
- 24
श्रुत्वैतच्चित्रलेखा सा तामाश्वास्य प्रियां सखीम्
तदैवोत्पत्य नभसा ययौ द्वारवतीं पुरीम्
śrutvaitaccitralekhā sā tāmāśvāsya priyāṃ sakhīm
tadaivotpatya nabhasā yayau dvāravatīṃ purīm
- 25
ददर्श च पृथूत्तुङ्गैर्मन्दिरैर् अब्धिमध्यगाम्
कुर्वती तं पुनः क्षिप्तमन्थाद्रिशिखरभ्रमम्
dadarśa ca pṛthūttuṅgairmandirair abdhimadhyagām
kurvatī taṃ punaḥ kṣiptamanthādriśikharabhramam
- 26
तस्यां सुप्तं निशि प्राप्य सानिरुद्धं विबोध्य च
उषानुरागं तं तस्मै शशंस स्वप्नदर्शनात्
tasyāṃ suptaṃ niśi prāpya sāniruddhaṃ vibodhya ca
uṣānurāgaṃ taṃ tasmai śaśaṃsa svapnadarśanāt
- 27
आदाय चात्ततद्रूपस्वप्नवृत्तान्तम् एव तम्
सोत्कं सिद्धिप्रभावेण क्षणेनैवाययौ ततः
ādāya cāttatadrūpasvapnavṛttāntam eva tam
sotkaṃ siddhiprabhāveṇa kṣaṇenaivāyayau tataḥ
- 28
एत्य चावेक्षमाणायास्तस्याः सख्याः स्ववर्त्मना
प्रावेशयदुषायास्तं गुप्तमन्तःपुरं प्रियम्
etya cāvekṣamāṇāyāstasyāḥ sakhyāḥ svavartmanā
prāveśayaduṣāyāstaṃ guptamantaḥpuraṃ priyam
- 29
सा दृष्ट्वैवानिरुद्धं तमुषा साक्षादुपागतम्
अमृतांशुमिवाम्भोधिवेला नाङ्गेष्व् अवर्तत
sā dṛṣṭvaivāniruddhaṃ tamuṣā sākṣādupāgatam
amṛtāṃśumivāmbhodhivelā nāṅgeṣv avartata
- 30
ततस्तेन समं तस्थौ सखीदत्तेन तत्र सा
जीवितेनेव मूर्तेन वल्लभेन यथासुखम्
tatastena samaṃ tasthau sakhīdattena tatra sā
jīviteneva mūrtena vallabhena yathāsukham

