199 shlokas
- 1
ततः सोमप्रभा प्रातस्तद्विनोदोपपादिनीम्
न्यस्तदारुमयानेकमायासद्यन्त्रपुत्रिकाम्
tataḥ somaprabhā prātastadvinodopapādinīm
nyastadārumayānekamāyāsadyantraputrikām
- 2
करण्डिनां समादाय सा नभस्तलचारिणी
तस्याः कलिङ्गसेनाया निकटं पुनर् आययौ
karaṇḍināṃ samādāya sā nabhastalacāriṇī
tasyāḥ kaliṅgasenāyā nikaṭaṃ punar āyayau
- 3
कलिङ्गसेनाप्य् आलोक्य ताम् आनन्दाश्रुनिर्भरा
उत्थाय कण्ठे जग्राह पार्श्वासीनाम् उवाच च
kaliṅgasenāpy ālokya tām ānandāśrunirbharā
utthāya kaṇṭhe jagrāha pārśvāsīnām uvāca ca
- 4
त्वदीयमुखपूर्णेन्दुदर्शनेन विना सखि
तमोमयी त्रियामाद्य शतयामेव मे गता
tvadīyamukhapūrṇendudarśanena vinā sakhi
tamomayī triyāmādya śatayāmeva me gatā
- 5
तज्जन्मान्तरसंबन्धः कीदृशः स्यात्त्वया मम
यस्यायं परिणामो ऽद्य त्वं देवी वेत्सि चेद्वद
tajjanmāntarasaṃbandhaḥ kīdṛśaḥ syāttvayā mama
yasyāyaṃ pariṇāmo 'dya tvaṃ devī vetsi cedvada
- 6
तच्छ्रुत्वा राजपुत्रीं ताम् एवं सोमप्रभाब्रवीत्
ईदृङ्मे नास्ति विज्ञानं न हि जातिं स्मराम्य् अहम्
tacchrutvā rājaputrīṃ tām evaṃ somaprabhābravīt
īdṛṅme nāsti vijñānaṃ na hi jātiṃ smarāmy aham
- 7
न चात्र मुनयो ऽभिज्ञाः केचित्तु यदि जानते
तैः कृतं तादृशं पूर्वं परतत्त्वविदश्च ते
na cātra munayo 'bhijñāḥ kecittu yadi jānate
taiḥ kṛtaṃ tādṛśaṃ pūrvaṃ paratattvavidaśca te
- 8
एवम् उक्तवतीं भूयः प्रेमविश्रम्भपेशलम्
कलिङ्गसेना पप्रच्छ विजने तां सकौतुका
evam uktavatīṃ bhūyaḥ premaviśrambhapeśalam
kaliṅgasenā papraccha vijane tāṃ sakautukā
- 9
ब्रूहि मे सखि कस्येह देवजातेः पितुस्त्वया
जन्मनालंकृतो वंशो मुक्तयेव सुवृत्तया
brūhi me sakhi kasyeha devajāteḥ pitustvayā
janmanālaṃkṛto vaṃśo muktayeva suvṛttayā
- 10
जगत्कर्णामृतं किं च तव नाम सुलक्षणे
करण्डिका किमर्थेयम् अस्याम् अस्ति च वस्तु किम्
jagatkarṇāmṛtaṃ kiṃ ca tava nāma sulakṣaṇe
karaṇḍikā kimartheyam asyām asti ca vastu kim
- 11
एवं कलिङ्गसेनायाः श्रुत्वा सप्रणयं वचः
सोमप्रभा सा सर्वं तत्क्रमाद्वक्तुं प्रचक्रमे
evaṃ kaliṅgasenāyāḥ śrutvā sapraṇayaṃ vacaḥ
somaprabhā sā sarvaṃ tatkramādvaktuṃ pracakrame
- 12
अस्ति त्रिजगति ख्यातो मयो नाम महासुरः
आसुरं भावम् उत्सृज्य शौरिं स शरणं श्रितः
asti trijagati khyāto mayo nāma mahāsuraḥ
āsuraṃ bhāvam utsṛjya śauriṃ sa śaraṇaṃ śritaḥ
- 13
तेन दत्ताभयश्चक्रे स च वज्रभृतः सभाम्
दैत्याश्च देवपक्षो ऽयम् इति तं प्रति चुक्रुधुः
tena dattābhayaścakre sa ca vajrabhṛtaḥ sabhām
daityāśca devapakṣo 'yam iti taṃ prati cukrudhuḥ
- 14
तद्भयात्तेन विन्ध्याद्रौ मायाविवरमन्दिरम्
अगम्यम् असुरेन्द्राणां बह्वाश्चर्यमयं कृतम्
tadbhayāttena vindhyādrau māyāvivaramandiram
agamyam asurendrāṇāṃ bahvāścaryamayaṃ kṛtam
- 15
तस्यावां द्वे दुहितरौ मयस्य ब्रह्मचारिणी
ज्येष्ठा स्वयंप्रभा नाम कुमारी तद्गृहस्थिता
tasyāvāṃ dve duhitarau mayasya brahmacāriṇī
jyeṣṭhā svayaṃprabhā nāma kumārī tadgṛhasthitā
- 16
अहं सोमप्रभा नाम कनिष्ठा सा त्व् अहं सखि
नलकूबरसंज्ञाय दत्ता धनदसूनवे
ahaṃ somaprabhā nāma kaniṣṭhā sā tv ahaṃ sakhi
nalakūbarasaṃjñāya dattā dhanadasūnave
- 17
पित्रा च शिक्षितास्मीह मायायन्त्राण्य् अनेकधा
त्वत्प्रीत्या चेयम् आनीता पूर्णा तव करण्डिका
pitrā ca śikṣitāsmīha māyāyantrāṇy anekadhā
tvatprītyā ceyam ānītā pūrṇā tava karaṇḍikā
- 18
इत्य् उक्त्वादर्शयत्तस्याः प्रोद्घाट्य बहुकौतुकाः
सोमप्रभा काष्ठमयीः स्वमायायन्त्रपुत्रिकाः
ity uktvādarśayattasyāḥ prodghāṭya bahukautukāḥ
somaprabhā kāṣṭhamayīḥ svamāyāyantraputrikāḥ
- 19
कीलिकाहतिमात्रेण काचिद्गत्वा विहायसा
तदाज्ञया पुष्पमालाम् आदाय द्रुतम् आययौ
kīlikāhatimātreṇa kācidgatvā vihāyasā
tadājñayā puṣpamālām ādāya drutam āyayau
- 20
काचित्तथैव पानीयम् आनिनाय यदृच्छया
काचिन्ननर्त काचिच्च कथालापम् अथाकरोत्
kācittathaiva pānīyam ānināya yadṛcchayā
kācinnanarta kācicca kathālāpam athākarot
- 21
इत्यादिभिर्महाश्चर्यैः कंचित्कालं विनोद्य ताम्
सुरक्षितां स्थापयित्वा तां च यन्त्रकरण्डिकाम्
ityādibhirmahāścaryaiḥ kaṃcitkālaṃ vinodya tām
surakṣitāṃ sthāpayitvā tāṃ ca yantrakaraṇḍikām
- 22
कलिङ्गसेनाम् आमन्त्र्य सोत्कां सोमप्रभा ततः
ययौ भर्तृपरायत्ता नभसा निजमन्दिरम्
kaliṅgasenām āmantrya sotkāṃ somaprabhā tataḥ
yayau bhartṛparāyattā nabhasā nijamandiram
- 23
कलिङ्गसेनाप्य् आश्चर्यदर्शनध्वस्तया क्षुधा
प्रहृष्टा तद् अहस्तस्थौ सर्वाहारपराङ्मुखी
kaliṅgasenāpy āścaryadarśanadhvastayā kṣudhā
prahṛṣṭā tad ahastasthau sarvāhāraparāṅmukhī
- 24
तद्दृष्ट्वा च ततस्तस्या जननी रोगशङ्किनी
आनन्दाख्येन भिषजा निरूप्याविकलोदिता
taddṛṣṭvā ca tatastasyā jananī rogaśaṅkinī
ānandākhyena bhiṣajā nirūpyāvikaloditā
- 25
कुतो ऽपि हेतोर्हर्षेण नष्टास्याः क्षुन्न रोगतः
उत्फुल्लनेत्रं वक्त्य् एतद् अस्या हसद् इवाननम्
kuto 'pi hetorharṣeṇa naṣṭāsyāḥ kṣunna rogataḥ
utphullanetraṃ vakty etad asyā hasad ivānanam
- 26
इत्य् उक्ता भिषजा हर्षहेतुं तज्जननी च सा
पप्रच्छ तां यथावृत्तं सापि तस्यै तद् अब्रवीत्
ity uktā bhiṣajā harṣahetuṃ tajjananī ca sā
papraccha tāṃ yathāvṛttaṃ sāpi tasyai tad abravīt
- 27
ततः श्लाघ्यसखी सङ्गहृष्टां मत्वाभिनन्द्य च
आहारं कारयामास जननी तां यथोचितम्
tataḥ ślāghyasakhī saṅgahṛṣṭāṃ matvābhinandya ca
āhāraṃ kārayāmāsa jananī tāṃ yathocitam
- 28
अथान्येद्युर् उपागत्य विदितार्था क्रमेण सा
कलिङ्गसेनां ताम् एव रहः सोमप्रभाभ्यधात्
athānyedyur upāgatya viditārthā krameṇa sā
kaliṅgasenāṃ tām eva rahaḥ somaprabhābhyadhāt
- 29
मया त्वत्सख्यम् आवेद्य त्वत्पार्श्वागमने ऽन्वहम्
अनुज्ञा ज्ञानिनो भर्तुर्गृहीता विदितार्थतः
mayā tvatsakhyam āvedya tvatpārśvāgamane 'nvaham
anujñā jñānino bharturgṛhītā viditārthataḥ
- 30
तस्मात्त्वम् अप्य् अनुज्ञाता पितृभ्यां भव सांप्रतम्
येन स्वैरं मया साकं निःशङ्का विहरिष्यसि
tasmāttvam apy anujñātā pitṛbhyāṃ bhava sāṃpratam
yena svairaṃ mayā sākaṃ niḥśaṅkā vihariṣyasi

