31 shlokas
- 1
तां न मिथस्संसादयेद् अनादेशात्
tāṃ na mithassaṃsādayed anādeśāt
- 2
अनुनयन्त्य् एतम् अग्निम्
anunayanty etam agnim
- 3
अथैनां पितुर् अङ्काद् उद्वहति गुरोर्वा ये वध्वश्चन्द्रं वहतुं यक्ष्मा यन्ति जनाꣳ अनु
पुनस्तान्यज्ञिया देवा नयन्तु यत आगताः इति
athaināṃ pitur aṅkād udvahati gurorvā ye vadhvaścandraṃ vahatuṃ yakṣmā yanti janām̐ anu
punastānyajñiyā devā nayantu yata āgatāḥ iti
- 4
अथैनां दक्षिणे हस्ते गृहीत्वा स्वरथम् आरोप्य स्वान्गृहान् आनयति पूषा त्वेतो नयतु हस्तगृह्याश्विनौ त्वा प्रवहतां रथेन
गृहान्गच्छ गृहपत्नी यथासो वशिनी त्वं विदथमावदासि इति
athaināṃ dakṣiṇe haste gṛhītvā svaratham āropya svāngṛhān ānayati pūṣā tveto nayatu hastagṛhyāśvinau tvā pravahatāṃ rathena
gṛhāngaccha gṛhapatnī yathāso vaśinī tvaṃ vidathamāvadāsi iti
- 5
पन्थानम् अनुमन्त्रयते सुगं पन्थानम् आरुक्षम् अरिष्टं स्वस्तिवाहनम्
यस्मिन्वीरो न रिष्यत्य् अन्येषां विन्दते वसु इति
panthānam anumantrayate sugaṃ panthānam ārukṣam ariṣṭaṃ svastivāhanam
yasminvīro na riṣyaty anyeṣāṃ vindate vasu iti
- 6
ओषधिवनस्पतयो नद्यो वनान्य् अनुमन्त्रयते या ओषधयो या वनस्पतयो या नद्यो यानि धन्वानि ये वना
ते त्वा वधु प्रजावतीं प्र त्वे मुञ्चन्त्व् अंहसः इति
oṣadhivanaspatayo nadyo vanāny anumantrayate yā oṣadhayo yā vanaspatayo yā nadyo yāni dhanvāni ye vanā
te tvā vadhu prajāvatīṃ pra tve muñcantv aṃhasaḥ iti
- 7
अथ जायाम् आनीय स्वान्गृहान्प्रपादयति भद्रान्गृहान्सुमनसः प्रपद्ये ऽवीरघ्नी वीरवतः सुवीरान्
इरां वहतो घृतम् उक्षमाणास्तेष्व् अहं सुमनाः संविशानि इति
atha jāyām ānīya svāngṛhānprapādayati bhadrāngṛhānsumanasaḥ prapadye 'vīraghnī vīravataḥ suvīrān
irāṃ vahato ghṛtam ukṣamāṇāsteṣv ahaṃ sumanāḥ saṃviśāni iti
- 8
अथैनाम् आनडुहे चर्मण्य् उपवेशयति इह गावः प्रजायध्वम् इहाश्वा इह पूरुषाः
इहो सहस्रदक्षिणो रायस्पोषो निषीदतु इति
athainām ānaḍuhe carmaṇy upaveśayati iha gāvaḥ prajāyadhvam ihāśvā iha pūruṣāḥ
iho sahasradakṣiṇo rāyaspoṣo niṣīdatu iti
- 9
अत्राभ्याम् अमात्यास्तोक्माण्य् आरोपयन्ते
atrābhyām amātyāstokmāṇy āropayante
- 10
अथ वाचं यच्छतः आ नक्षत्राणाम् उदयात्
atha vācaṃ yacchataḥ ā nakṣatrāṇām udayāt
- 11
अथाहोरात्रयोः सन्धिम् अनुमन्त्रयते नीललोहिते भवतः कृत्यासक्तिर्व्यज्यते
एधन्ते ऽस्या ज्ञातयः पतिर्बन्धेषु बध्यताम् इति
athāhorātrayoḥ sandhim anumantrayate nīlalohite bhavataḥ kṛtyāsaktirvyajyate
edhante 'syā jñātayaḥ patirbandheṣu badhyatām iti
- 12
अथोदितेषु नक्षत्रेषूपनिष्क्रम्य ध्रुवम् अरुन्धतीं च दर्शयति
athoditeṣu nakṣatreṣūpaniṣkramya dhruvam arundhatīṃ ca darśayati
- 13
ध्रुवो ऽसि ध्रुवक्षितिर्ध्रुवम् असि ध्रुवतः स्थितम्
त्वं नक्षत्राणां मेथ्य् असि स मा पाहि पृतन्यतः इति ध्रुवम्
dhruvo 'si dhruvakṣitirdhruvam asi dhruvataḥ sthitam
tvaṃ nakṣatrāṇāṃ methy asi sa mā pāhi pṛtanyataḥ iti dhruvam
- 14
सप्त ऋषयः प्रथमां कृत्तिकानाम् अरुन्धतीं यद्ध्रुवतां ह निन्युः
षट्कृत्तिका मुख्ययोगं वहन्तीयम् अस्माकम् एधत्व् अष्टम्य् अरुन्धती इत्य् अरुन्धतीम्
sapta ṛṣayaḥ prathamāṃ kṛttikānām arundhatīṃ yaddhruvatāṃ ha ninyuḥ
ṣaṭkṛttikā mukhyayogaṃ vahantīyam asmākam edhatv aṣṭamy arundhatī ity arundhatīm
- 15
अथ विवाहस्यारुन्धत्युपस्थानात्कृत्वा व्रतम् उपैति अग्ने व्रतपते उपयमनं व्रतं चरिष्यामि तच्छकेयं तन्मे राध्यताम्
वायो व्रतपत आदित्य व्रतपते व्रतानां व्रतपते उपयमनं व्रतं चरिष्यामि तच्छकेयं तन्मे राध्यताम् इति
atha vivāhasyārundhatyupasthānātkṛtvā vratam upaiti agne vratapate upayamanaṃ vrataṃ cariṣyāmi tacchakeyaṃ tanme rādhyatām
vāyo vratapata āditya vratapate vratānāṃ vratapate upayamanaṃ vrataṃ cariṣyāmi tacchakeyaṃ tanme rādhyatām iti
- 16
उभौ जायापती व्रतचारिणौ ब्रह्मचारिणौ भवतो ऽधःशयाते
ubhau jāyāpatī vratacāriṇau brahmacāriṇau bhavato 'dhaḥśayāte
- 17
तयोः शय्याम् अन्तरेणोदुम्बरदण्डो गन्धानुलिप्तो वाससा सूत्रेण वा परिवीतस्तिष्ठत्य् आ पक्वहोमात्
tayoḥ śayyām antareṇodumbaradaṇḍo gandhānulipto vāsasā sūtreṇa vā parivītastiṣṭhaty ā pakvahomāt
- 18
चतुर्थ्यां निशायां हुते पक्वहोमे व्रतं विसृज्य दण्डम् उत्थापयत्य् ऊर्जः पृथिव्या अध्युत्थितो ऽसि वनस्पते शतवल्शो विरोह
त्वया वयम् इषम् ऊर्जं वदन्तो रायस्पोषेण समिषा मदेम इति
caturthyāṃ niśāyāṃ hute pakvahome vrataṃ visṛjya daṇḍam utthāpayaty ūrjaḥ pṛthivyā adhyutthito 'si vanaspate śatavalśo viroha
tvayā vayam iṣam ūrjaṃ vadanto rāyaspoṣeṇa samiṣā madema iti
- 19
अथैनं वध्वै प्रयच्छति प्रजया त्वा संसृजामि मासरेण सुराम् इव इति
athainaṃ vadhvai prayacchati prajayā tvā saṃsṛjāmi māsareṇa surām iva iti
- 20
तं वधूः प्रतिगृह्णाति प्रजावती भूयासम् इति
taṃ vadhūḥ pratigṛhṇāti prajāvatī bhūyāsam iti
- 21
अथैनं वराय प्रयच्छति प्रजया त्वा पशुभिः संसृजामि मासरेण सुराम् इव इति
athainaṃ varāya prayacchati prajayā tvā paśubhiḥ saṃsṛjāmi māsareṇa surām iva iti
- 22
तं वरः प्रतिगृह्णाति प्रजावान्पशुमान्भूयासम् इति
taṃ varaḥ pratigṛhṇāti prajāvānpaśumānbhūyāsam iti
- 23
अथैनं स्थूणादेशे निधायान्तिकेन प्रतिपद्यते
athainaṃ sthūṇādeśe nidhāyāntikena pratipadyate
- 24
प्रसिद्धम् उपसंवेशनम्
prasiddham upasaṃveśanam
- 25
श्वोभूते दण्डम् आदाय पुण्याहं वाचयित्वाप्सु विसर्जयति
śvobhūte daṇḍam ādāya puṇyāhaṃ vācayitvāpsu visarjayati
- 26
अथ देवयजनोल्लेखनप्रभृत्याग्निखात्कृत्वा पक्वाज्जुहोति अग्निर्मूर्धा भुवः इति द्वाभ्याम्
atha devayajanollekhanaprabhṛtyāgnikhātkṛtvā pakvājjuhoti agnirmūrdhā bhuvaḥ iti dvābhyām
- 27
स्विष्टकृत्प्रभृति सिद्धम् आ धेनुवरप्रदानात्
sviṣṭakṛtprabhṛti siddham ā dhenuvarapradānāt
- 28
स एष पार्वणो भवति
sa eṣa pārvaṇo bhavati
- 29
अथास्तमित आदित्ये ऽन्योन्यम् अलंकृत्योपरिशय्यां शयाते
athāstamita āditye 'nyonyam alaṃkṛtyopariśayyāṃ śayāte
- 30
अथ वधूम् अभिमन्त्रयते सुमङ्गलीर् इयं वधूर् इमां समेत पश्यत
सौभाग्यम् अस्यै दत्त्वायाथास्तं विपरेतन इति
atha vadhūm abhimantrayate sumaṅgalīr iyaṃ vadhūr imāṃ sameta paśyata
saubhāgyam asyai dattvāyāthāstaṃ viparetana iti

