39 shlokas
- 1
अथ शुचौ समे देशे अग्न्यायतनदेशं शकलेन त्रिः प्राचीनम् उल्लिखेत्त्रिर् उदीचीनम्
atha śucau same deśe agnyāyatanadeśaṃ śakalena triḥ prācīnam ullikhettrir udīcīnam
- 2
अथाद्भिर् अभ्युक्ष्य शकलं निरस्याप उपस्पृश्य याज्ञिकात्काष्ठाद् अग्निं मथित्वा श्रोत्रियागाराद्वाहृत्य व्याहृतिभिर्निरुप्योपसमाधायोपतिष्ठते
athādbhir abhyukṣya śakalaṃ nirasyāpa upaspṛśya yājñikātkāṣṭhād agniṃ mathitvā śrotriyāgārādvāhṛtya vyāhṛtibhirnirupyopasamādhāyopatiṣṭhate
- 3
जुष्टो दमूना अतिथिदुरोण इमं नो यज्ञम् उपयाहि विद्वान्
विश्वा अग्ने ऽभियुजो विहत्य शत्रूयताम् आभरा भोजनानि इति
juṣṭo damūnā atithiduroṇa imaṃ no yajñam upayāhi vidvān
viśvā agne 'bhiyujo vihatya śatrūyatām ābharā bhojanāni iti
- 4
अथैनं प्रदक्षिणमग्निं परिसमूह्य पर्यृक्ष्य परिस्तीर्य प्रागग्रैर्दर्भैर् अग्निं परिस्तृणाति
athainaṃ pradakṣiṇamagniṃ parisamūhya paryṛkṣya paristīrya prāgagrairdarbhair agniṃ paristṛṇāti
- 5
अपि वोदगग्राः पश्चाच्च पुरस्ताच्च भवन्ति
api vodagagrāḥ paścācca purastācca bhavanti
- 6
दक्षिणान् उत्तरान् उत्तरान् अधरान्यदि प्रागुदगग्राः
dakṣiṇān uttarān uttarān adharānyadi prāgudagagrāḥ
- 7
उत्तरेणाग्निं प्रागग्रान्दर्भान्संस्तीर्य तेषु द्वन्द्वं न्यञ्चि पात्राणि संसादयति देवसंयुक्तान्य् एकैकशः पितृसंयुक्तानि सकृद् एव मनुष्यसंयुक्तानि
uttareṇāgniṃ prāgagrāndarbhānsaṃstīrya teṣu dvandvaṃ nyañci pātrāṇi saṃsādayati devasaṃyuktāny ekaikaśaḥ pitṛsaṃyuktāni sakṛd eva manuṣyasaṃyuktāni
- 8
यत्सह सर्वाणि मानुषाणि इत्य् एतस्माद्ब्राह्मणात्
yatsaha sarvāṇi mānuṣāṇi ity etasmādbrāhmaṇāt
- 9
पवित्रे कृत्वा तूष्णीं संस्कृताभिर् अद्भिर् उत्तानानि पात्राणि कृत्वा प्रोक्ष्य विस्रस्येध्मं त्रिस्सर्वाभिः प्रोक्षति
pavitre kṛtvā tūṣṇīṃ saṃskṛtābhir adbhir uttānāni pātrāṇi kṛtvā prokṣya visrasyedhmaṃ trissarvābhiḥ prokṣati
- 10
दर्भेषु दक्षिणतो ब्राह्मण उपविशति उतरत उदपात्रम्
darbheṣu dakṣiṇato brāhmaṇa upaviśati utarata udapātram
- 11
अथ तिरःपवित्रमाज्यस्थाल्याम् आज्यं निरुप्योदीचो ऽङ्गारान्निरूह्य व्यन्तान्कृत्वा तेष्व् अधिश्रित्याभिद्योतनेनाभिद्योत्य द्वे दर्भाग्रे प्रच्छिद्य प्रक्षाल्य प्रत्यस्य पुनर् अभिद्योत्य त्रिः पर्यग्निकृत्वा वर्त्म कुर्वन्न् उदगुद्वास्य प्रत्यूह्याङ्गारान्बर्हिर् आस्तीर्य अथैनद् उदीचीनाग्राभ्यां पवित्राभ्यां पुनर् आहारं त्रिर् उत्पूय विस्रस्य पवित्रे ऽद्भिः संस्पृश्याग्नाव् अनुप्रहरति
atha tiraḥpavitramājyasthālyām ājyaṃ nirupyodīco 'ṅgārānnirūhya vyantānkṛtvā teṣv adhiśrityābhidyotanenābhidyotya dve darbhāgre pracchidya prakṣālya pratyasya punar abhidyotya triḥ paryagnikṛtvā vartma kurvann udagudvāsya pratyūhyāṅgārānbarhir āstīrya athainad udīcīnāgrābhyāṃ pavitrābhyāṃ punar āhāraṃ trir utpūya visrasya pavitre 'dbhiḥ saṃspṛśyāgnāv anupraharati
- 12
अथ दर्वीं निष्टप्य दर्भैः संमृज्याद्भिः संस्पृश्य पुनर्निष्टप्य प्रोक्ष्य निधाय दर्भान् अद्भिः संस्पृश्याग्नाव् अनुप्रहरति
atha darvīṃ niṣṭapya darbhaiḥ saṃmṛjyādbhiḥ saṃspṛśya punarniṣṭapya prokṣya nidhāya darbhān adbhiḥ saṃspṛśyāgnāv anupraharati
- 13
अथ शम्याः परिधाति खादिरी दर्वी तेजस्कामस्यौदुम्बर्यन्नाद्यकामस्य पालाशी ब्रह्मवर्चसकामस्य इति
atha śamyāḥ paridhāti khādirī darvī tejaskāmasyaudumbaryannādyakāmasya pālāśī brahmavarcasakāmasya iti
- 14
अथ हैकेषां विज्ञायते निरृतिगृहिता वै दर्वी यद्दर्व्या जुहुयान्निरृत्या ऽस्य यज्ञं ग्राहयेत्तस्मात्स्रुवेणैव होतव्यम् इति
atha haikeṣāṃ vijñāyate nirṛtigṛhitā vai darvī yaddarvyā juhuyānnirṛtyā 'sya yajñaṃ grāhayettasmātsruveṇaiva hotavyam iti
- 15
पालाशेन स्रुवेणेत्य् आत्रेयः
pālāśena sruveṇety ātreyaḥ
- 16
खादिरेणेत्य् आङ्गिरसः
khādireṇety āṅgirasaḥ
- 17
ताम्रायसेनेत्य् आथर्वणः
tāmrāyasenety ātharvaṇaḥ
- 18
कार्ष्णायसेनाभिचरन्न् इति सार्वत्रिकम्
kārṣṇāyasenābhicarann iti sārvatrikam
- 19
अन्यो वास्यैतावत्कृत्वागमनं काङ्क्षेत्
anyo vāsyaitāvatkṛtvāgamanaṃ kāṅkṣet
- 20
अपरेणाग्निम् उदीचीनप्रतिषेवणाम् एरकां साधिवासाम् आस्तीर्य तस्यां प्राञ्चाव् उपविशत उत्तरतः पतिर्दक्षिणा पत्नी
apareṇāgnim udīcīnapratiṣevaṇām erakāṃ sādhivāsām āstīrya tasyāṃ prāñcāv upaviśata uttarataḥ patirdakṣiṇā patnī
- 21
अथान्वारब्धायां प्रदक्षिणम् अग्निं परिषिञ्चति
athānvārabdhāyāṃ pradakṣiṇam agniṃ pariṣiñcati
- 22
अदिते ऽनुमन्यस्व इति दक्षिणतः प्राचीनम्
adite 'numanyasva iti dakṣiṇataḥ prācīnam
- 23
अनुमते ऽनुमन्यस्व इति पश्चाद् उदीचीनम्
anumate 'numanyasva iti paścād udīcīnam
- 24
सरस्वते ऽनुमन्यस्व इत्य् उत्तरतः प्राचीनम्
sarasvate 'numanyasva ity uttarataḥ prācīnam
- 25
देव सवितः प्रसुव इति समन्तं प्रदक्षिणं समन्तम् एव वा तूष्णीम्
deva savitaḥ prasuva iti samantaṃ pradakṣiṇaṃ samantam eva vā tūṣṇīm
- 26
अथेध्मम् अभ्यज्य परि समिधं शिनष्टि स्वाहाकारेणाभ्याधायाघाराव् आघारयति
athedhmam abhyajya pari samidhaṃ śinaṣṭi svāhākāreṇābhyādhāyāghārāv āghārayati
- 27
प्रजापतये स्वाहा इति मनसोत्तरे परिधिसन्धौ संस्पृश्याक्ष्णया सन्ततम्
prajāpataye svāhā iti manasottare paridhisandhau saṃspṛśyākṣṇayā santatam
- 28
इन्द्राय स्वाहा इत्य् उपांशु दक्षिणे परिधिसन्धौ संस्पृश्याक्ष्णया सन्ततम्
indrāya svāhā ity upāṃśu dakṣiṇe paridhisandhau saṃspṛśyākṣṇayā santatam
- 29
अथाज्यभागौ जुहोति
athājyabhāgau juhoti
- 30
अग्नये स्वाहा इत्य् उत्तरार्धपूर्वार्धे
agnaye svāhā ity uttarārdhapūrvārdhe

