44 shlokas
- 1
अथास्या उपोत्थाय दक्षिणेन हस्तेन दक्षिणम् अंसं प्रतिबाहुम् अन्ववहृत्य हृदयदेशम् अभिमृशति मम हृदये हृदयं ते अस्तु मम चित्ते चित्तम् अस्तु ते
मम वाचम् एकमनाः शृणु माम् एवानुव्रता सहचर्या मया भव इति
athāsyā upotthāya dakṣiṇena hastena dakṣiṇam aṃsaṃ pratibāhum anvavahṛtya hṛdayadeśam abhimṛśati mama hṛdaye hṛdayaṃ te astu mama citte cittam astu te
mama vācam ekamanāḥ śṛṇu mām evānuvratā sahacaryā mayā bhava iti
- 2
अथास्यै दक्षिणे कर्णे जपति
athāsyai dakṣiṇe karṇe japati
- 3
मां ते मनः प्रविशतु मां चक्षुर्माम् उ ते भगः मयि सर्वाणि भूतानि मयि प्रज्ञानम् अस्तु ते
māṃ te manaḥ praviśatu māṃ cakṣurmām u te bhagaḥ mayi sarvāṇi bhūtāni mayi prajñānam astu te
- 4
मधुगे मध्वगाहे जिह्वा मे मधुवादिनी
मुखे मे सारघं मधु दत्सु संवननं कृतम्
madhuge madhvagāhe jihvā me madhuvādinī
mukhe me sāraghaṃ madhu datsu saṃvananaṃ kṛtam
- 5
चाक्रवाकं संवननं यन्नदीभ्य उदाहृतम्
यद्वित्तौ देवगन्धर्वौ तेन संवनिनौ स्वः
cākravākaṃ saṃvananaṃ yannadībhya udāhṛtam
yadvittau devagandharvau tena saṃvaninau svaḥ
- 6
स्पृशामि ते ऽहम् अङ्गानि वायुर् आपश्च मा परः
मां चैव पश्य सूर्यं च मा चान्येषु मनः कृथाः
spṛśāmi te 'ham aṅgāni vāyur āpaśca mā paraḥ
māṃ caiva paśya sūryaṃ ca mā cānyeṣu manaḥ kṛthāḥ
- 7
सोमः प्रथमो विविदे गन्धर्वो विविद उत्तरः
तृतीयो ऽग्निष्टे पतिस्तुरीयस्ते मनुष्यजाः
somaḥ prathamo vivide gandharvo vivida uttaraḥ
tṛtīyo 'gniṣṭe patisturīyaste manuṣyajāḥ
- 8
सोमो ऽददद्गन्धर्वाय गन्धर्वो ऽददद् अग्नये
रयिं च पुत्रांश्चादाद् अग्निर्मह्यम् अथो इमाम्
somo 'dadadgandharvāya gandharvo 'dadad agnaye
rayiṃ ca putrāṃścādād agnirmahyam atho imām
- 9
सरस्वति प्रेदम् अव सुभगे वाजिनीवति
तां त्वा विश्वस्य भूतस्य प्रगायाम् अस्यग्रतः इति
sarasvati predam ava subhage vājinīvati
tāṃ tvā viśvasya bhūtasya pragāyām asyagrataḥ iti
- 10
अथास्यै दक्षिणेन नीचा हस्तेन दक्षिणम् उत्तानं हस्तं साङ्गुष्ठम् अभीव लोमानि गृह्णाति गृभ्णामि ते सुप्रजास्त्वाय हस्तं मया पत्या जरदष्टिर्यथासः
भगो ऽर्यमा सविता पुरन्धिर्मह्यं त्वादुर्गार्हपत्याय देवाः इति
athāsyai dakṣiṇena nīcā hastena dakṣiṇam uttānaṃ hastaṃ sāṅguṣṭham abhīva lomāni gṛhṇāti gṛbhṇāmi te suprajāstvāya hastaṃ mayā patyā jaradaṣṭiryathāsaḥ
bhago 'ryamā savitā purandhirmahyaṃ tvādurgārhapatyāya devāḥ iti
- 11
अथैनां प्रदक्षिणम् अग्निं पर्याणयति परि त्वाग्ने पुरं वयं विप्रं सहस्य धीमहि
धृषद्वर्णं दिवे दिवे भेत्तारं भङ्गुरावतः इति
athaināṃ pradakṣiṇam agniṃ paryāṇayati pari tvāgne puraṃ vayaṃ vipraṃ sahasya dhīmahi
dhṛṣadvarṇaṃ dive dive bhettāraṃ bhaṅgurāvataḥ iti
- 12
अथ तथोपविश्यान्वारब्धायाम् उपयमनीर्जुहोति
atha tathopaviśyānvārabdhāyām upayamanīrjuhoti
- 13
अग्ने शर्ध महते सौभगाय तव द्युम्नान्य् उत्तमानि सन्तु
सञ्जास्पत्यं सुयमम् आकृणुष्व शत्रूयताम् अभितिष्ठा महांसि स्वाहा
agne śardha mahate saubhagāya tava dyumnāny uttamāni santu
sañjāspatyaṃ suyamam ākṛṇuṣva śatrūyatām abhitiṣṭhā mahāṃsi svāhā
- 14
सोमाय जनिविदे स्वाहा
somāya janivide svāhā
- 15
गन्धर्वाय जनिविदे स्वाहा
gandharvāya janivide svāhā
- 16
अग्नये जनिविदे स्वाहा
agnaye janivide svāhā
- 17
कन्यला पितृभ्यो यती पतिलोकम् अव दीक्षाम् अदास्थ स्वाहा
kanyalā pitṛbhyo yatī patilokam ava dīkṣām adāstha svāhā
- 18
प्रेतो मुञ्चाति नामुतस्सुबद्धाम् अमुतस्करत्
यथेयम् इन्द्र मीढ्वः सुपुत्रा सुभगा सती स्वाहा
preto muñcāti nāmutassubaddhām amutaskarat
yatheyam indra mīḍhvaḥ suputrā subhagā satī svāhā
- 19
इमां त्वम् इन्द्र मीढ्वः सुपुत्रां सुभगां कुरु
दशास्यां पुत्रान् आधेहि पतिम् एकादशं स्वाहा
imāṃ tvam indra mīḍhvaḥ suputrāṃ subhagāṃ kuru
daśāsyāṃ putrān ādhehi patim ekādaśaṃ svāhā
- 20
अग्निर् ऐतु प्रथमो देवतानां सो ऽस्यै प्रजां मुञ्चतु मृत्युपाशात्
तद् अयं राजा वरुणो ऽनुमन्यतां यथेयं स्त्री पौत्रम् अघं न रोदात्स्वाहा
agnir aitu prathamo devatānāṃ so 'syai prajāṃ muñcatu mṛtyupāśāt
tad ayaṃ rājā varuṇo 'numanyatāṃ yatheyaṃ strī pautram aghaṃ na rodātsvāhā
- 21
इमाम् अग्निस्त्रायतां गार्हपत्यः प्रजाम् अस्यै नयतु दीर्घम् आयुः
अशून्योपस्था जीवताम् अस्तु माता पौत्रम् आनन्दम् अभिप्रबुध्यताम् इयं स्वाहा
imām agnistrāyatāṃ gārhapatyaḥ prajām asyai nayatu dīrgham āyuḥ
aśūnyopasthā jīvatām astu mātā pautram ānandam abhiprabudhyatām iyaṃ svāhā
- 22
मा ते गृहे निशि घोष उत्थाद् अन्यत्र त्वद्रुदत्यः संविशन्तु
मा त्वं विकेश्युर आवधिष्ठा जीवपत्नी पतिलोके विराज पश्यन्ती प्रजां सुमनस्यमाना स्वाहा
mā te gṛhe niśi ghoṣa utthād anyatra tvadrudatyaḥ saṃviśantu
mā tvaṃ vikeśyura āvadhiṣṭhā jīvapatnī patiloke virāja paśyantī prajāṃ sumanasyamānā svāhā
- 23
अप्रजस्तां पौत्रमृत्युं पाप्मानम् उत वाघम्
शीर्ष्णः स्रजम् इवोन्मुच्य द्विषद्भ्यः प्रतिमुञ्चामि पाशं स्वाहा इति
aprajastāṃ pautramṛtyuṃ pāpmānam uta vāgham
śīrṣṇaḥ srajam ivonmucya dviṣadbhyaḥ pratimuñcāmi pāśaṃ svāhā iti
- 24
अथैनाम् उत्थाप्योत्तरेणाग्निं दक्षिणेन पदाश्मानम् आस्थापयति आतिष्ठेमम् अश्मानम् अश्मेव त्वं स्थिरा भव
अभितिष्ठ पृतन्यतः सहस्व पृतनायतः इति
athainām utthāpyottareṇāgniṃ dakṣiṇena padāśmānam āsthāpayati ātiṣṭhemam aśmānam aśmeva tvaṃ sthirā bhava
abhitiṣṭha pṛtanyataḥ sahasva pṛtanāyataḥ iti
- 25
अथास्या अञ्जलाव् उपस्तीर्य तस्याः सोदर्यो द्विर्लाजान् आवपति
athāsyā añjalāv upastīrya tasyāḥ sodaryo dvirlājān āvapati
- 26
तान् अभिघार्य जुहोति इयं नार्य् उपब्रूते ऽग्नौ लाजान् आवपन्ती
दीर्घायुर् अस्तु मे पतिर्जीवातु शरदः शतं स्वाहा
tān abhighārya juhoti iyaṃ nāry upabrūte 'gnau lājān āvapantī
dīrghāyur astu me patirjīvātu śaradaḥ śataṃ svāhā
- 27
अथैनां प्रदक्षिणम् अग्निं पर्याणयति तुभ्यम् अग्ने पर्यवहन्सूर्यां वहतुना सह
पुनः पतिभ्यो जायां दा अग्ने प्रजया सह इति
athaināṃ pradakṣiṇam agniṃ paryāṇayati tubhyam agne paryavahansūryāṃ vahatunā saha
punaḥ patibhyo jāyāṃ dā agne prajayā saha iti
- 28
तथास्थापयति तथा जुहोति
tathāsthāpayati tathā juhoti
- 29
अथैनां पुनः प्रदक्षिणम् अग्निं पर्याणयति पुनः पत्नीम् अग्निर् अदाद् आयुषा सह वर्चसा
दीर्घायुर् अस्या यः पतिः स एतु शरदः शतम् इति
athaināṃ punaḥ pradakṣiṇam agniṃ paryāṇayati punaḥ patnīm agnir adād āyuṣā saha varcasā
dīrghāyur asyā yaḥ patiḥ sa etu śaradaḥ śatam iti
- 30
तथैवास्थापयति तथैव जुहोति
tathaivāsthāpayati tathaiva juhoti

