14 shlokas
- 1
कायमानो वना त्वं यन्मातॄर् अजगन्न् अपः
न तत्ते अग्ने प्रमृषे निवर्तनं यद्दूरे सन्न् इहाभवः
kāyamāno vanā tvaṃ yanmātṝr ajagann apaḥ
na tatte agne pramṛṣe nivartanaṃ yaddūre sann ihābhavaḥ
- 2
यास्ते अग्न आर्द्रा योनयो याः कुलायिनीः
ये ते अग्न इन्दवो या उ नाभयः
यास्ते अग्ने तन्व ऊर्जो नाम ताभिष्ट्वम् उभयीभिः संविदानः शतं चिन्वानस्तन्वा निषीदत
yāste agna ārdrā yonayo yāḥ kulāyinīḥ
ye te agna indavo yā u nābhayaḥ
yāste agne tanva ūrjo nāma tābhiṣṭvam ubhayībhiḥ saṃvidānaḥ śataṃ cinvānastanvā niṣīdata
- 3
साकं हि शुचिना शुचिः प्रशस्ता क्रतुनाजनि
विद्वान् अस्य व्रता ध्रुवा वया इवानुरोहत इत्य् आधाय समिधं कृष्णां दद्यात्
sākaṃ hi śucinā śuciḥ praśastā kratunājani
vidvān asya vratā dhruvā vayā ivānurohata ity ādhāya samidhaṃ kṛṣṇāṃ dadyāt
- 4
वासोयुगं धेनुं वा
vāsoyugaṃ dhenuṃ vā
- 5
यद्य् उखा वा भिद्येत तैर् एव कपालैः संचित्यान्यां कृत्वा स्यूता देवेभिर् अमृतेनागा उखां स्वसारम् अधि वेदिम् अस्थात्सत्यं पूर्वैर् ऋषिभिश्चाकुपानो अग्निः प्रविद्वान् इह तत्करोतु
yady ukhā vā bhidyeta tair eva kapālaiḥ saṃcityānyāṃ kṛtvā syūtā devebhir amṛtenāgā ukhāṃ svasāram adhi vedim asthātsatyaṃ pūrvair ṛṣibhiścākupāno agniḥ pravidvān iha tatkarotu
- 6
स्तवादेजरुधरनमद्रिर् इत्य् अनुमन्त्रयेत्
stavādejarudharanamadrir ity anumantrayet
- 7
वसतीवरीश्चेत्स्कन्देयुः पृथिवी विभूवरीति चाल्यकं चेत्य् आवृत्ते
नमस्ते भुवो विश्वं तद्गृहीत्वा मान्दा वाशा इति चतसृभिर् आग्नीध्रीये जुहुयात्
vasatīvarīścetskandeyuḥ pṛthivī vibhūvarīti cālyakaṃ cety āvṛtte
namaste bhuvo viśvaṃ tadgṛhītvā māndā vāśā iti catasṛbhir āgnīdhrīye juhuyāt
- 8
मान्दा वाशाः शुन्ध्यूर् अजिराः
उन्दतीः सुफेनाः ज्योतिष्मतीस्तमस्वतीः
मित्रभृतः क्षत्रभृतः स्वराष्ट्रा इह मावत
māndā vāśāḥ śundhyūr ajirāḥ
undatīḥ suphenāḥ jyotiṣmatīstamasvatīḥ
mitrabhṛtaḥ kṣatrabhṛtaḥ svarāṣṭrā iha māvata
- 9
वृष्णो अश्वस्य संदानम् असि वृष्ट्यै त्वोपनह्यामि
vṛṣṇo aśvasya saṃdānam asi vṛṣṭyai tvopanahyāmi
- 10
देवा वसवा अग्ने इन्द्र सूर्य
देवा उद्नो दत्तोदधिं भिन्त्त दिवस्पर्जन्याद् अन्तरिक्षात्समुद्रात्ततो नो वृष्ट्यावत
devā vasavā agne indra sūrya
devā udno dattodadhiṃ bhintta divasparjanyād antarikṣātsamudrāttato no vṛṣṭyāvata
- 11
देवा युजो मित्रावरुणार्यमा युक्तं देवाः सपीतयो अपां नपात्तनूनपान्नराशंस उद्नो दत्तोदधिं भिन्त्त दिवस्पर्जन्याद् अन्तरिक्षात्समुद्रात्ततो नो वृष्ट्यावतेति
devā yujo mitrāvaruṇāryamā yuktaṃ devāḥ sapītayo apāṃ napāttanūnapānnarāśaṃsa udno dattodadhiṃ bhintta divasparjanyād antarikṣātsamudrāttato no vṛṣṭyāvateti
- 12
प्रवृत्ताश्चेत्स्युः सं मा सिञ्चन्त्विति संसिञ्चेत्
pravṛttāścetsyuḥ saṃ mā siñcantviti saṃsiñcet
- 13
निवृत्ताश्चेत्स्युर् अपाम् ऊर्मीति गृहीत्वा षड्भिर् आहवनीये जुहुयात्
nivṛttāścetsyur apām ūrmīti gṛhītvā ṣaḍbhir āhavanīye juhuyāt
- 14
इन्द्रियावान्मदिन्तमस्तं वो माव क्रमिषम्
अछिन्नं तन्तुं पृथिव्या अनु गेषम् इति हुत्वा
indriyāvānmadintamastaṃ vo māva kramiṣam
achinnaṃ tantuṃ pṛthivyā anu geṣam iti hutvā

