11 shlokas
- 1
विद्या विनयहेतुर् इन्द्रियजयः कामक्रोधलोभमानमदहर्षत्यागात्कार्यः
vidyā vinayahetur indriyajayaḥ kāmakrodhalobhamānamadaharṣatyāgātkāryaḥ
- 2
कर्णत्वगक्षिजिह्वाघ्राणेन्द्रियाणां शब्दस्पर्शरूपरसगन्धेष्वविप्रतिपत्तिर् इन्द्रियजयः शास्त्रानुष्ठानं वा
karṇatvagakṣijihvāghrāṇendriyāṇāṃ śabdasparśarūparasagandheṣvavipratipattir indriyajayaḥ śāstrānuṣṭhānaṃ vā
- 3
कृत्स्नं हि शास्त्रम् इदम् इन्द्रियजयः
kṛtsnaṃ hi śāstram idam indriyajayaḥ
- 4
तद्विरुद्धवृत्तिर् अवश्येन्द्रियश्चातुरन्तो अपि राजा सद्यो विनश्यति
tadviruddhavṛttir avaśyendriyaścāturanto api rājā sadyo vinaśyati
- 5
यथा दाण्डक्यो नाम भोजः कामाद्ब्राह्मणकन्याम् अभिमन्यमानः सबन्धुराष्ट्रो विननाश करालश्च वैदेहः
yathā dāṇḍakyo nāma bhojaḥ kāmādbrāhmaṇakanyām abhimanyamānaḥ sabandhurāṣṭro vinanāśa karālaśca vaidehaḥ
- 6
कोपाज्जनमेजयो ब्राह्मणेषु विक्रान्तः तालजङ्घश्च भृगुषु
kopājjanamejayo brāhmaṇeṣu vikrāntaḥ tālajaṅghaśca bhṛguṣu
- 7
लोभाद् ऐलश्चातुर्वर्ण्यम् अत्याहारयमाणः सौवीरश्चाजबिन्दुः
मानाद्रावणः परदारान् अप्रयच्छन्दुर्योधनो राज्याद् अंशं च
lobhād ailaścāturvarṇyam atyāhārayamāṇaḥ sauvīraścājabinduḥ
mānādrāvaṇaḥ paradārān aprayacchanduryodhano rājyād aṃśaṃ ca
- 8
मदाद्दम्भोद्भवो भूतावमानी हैहयश्चार्जुनः
madāddambhodbhavo bhūtāvamānī haihayaścārjunaḥ
- 9
हर्षाद्वातापिर् अगस्त्यम् अत्यासादयन्वृष्णिसंघश्च द्वैपायनम् इति
harṣādvātāpir agastyam atyāsādayanvṛṣṇisaṃghaśca dvaipāyanam iti
- 10
एते चान्ये च बहवः शत्रुषड्वर्गम् आश्रिताः
सबन्धुराष्ट्रा राजानो विनेशुर् अजितेन्द्रियाः
ete cānye ca bahavaḥ śatruṣaḍvargam āśritāḥ
sabandhurāṣṭrā rājāno vineśur ajitendriyāḥ
- 11
शत्रुषड्वर्गम् उत्सृज्य जामदग्न्यो जितेन्द्रियः
अम्बरीषश्च नाभागो बुभुजाते चिरं महीम्
śatruṣaḍvargam utsṛjya jāmadagnyo jitendriyaḥ
ambarīṣaśca nābhāgo bubhujāte ciraṃ mahīm

