35 shlokas
- 1
राजानम् उत्थितम् अनूत्तिष्ठन्ते भृत्याः
rājānam utthitam anūttiṣṭhante bhṛtyāḥ
- 2
प्रमाद्यन्तम् अनुप्रमाद्यन्ति
pramādyantam anupramādyanti
- 3
कर्माणि चास्य भक्षयन्ति
karmāṇi cāsya bhakṣayanti
- 4
द्विषद्भिश्चातिसंधीयते
तस्माद् उत्थानम् आत्मनः कुर्वीत
dviṣadbhiścātisaṃdhīyate
tasmād utthānam ātmanaḥ kurvīta
- 5
नालिकाभिर् अहर् अष्टधा रात्रिं च विभजेत्छायाप्रमाणेन वा
nālikābhir ahar aṣṭadhā rātriṃ ca vibhajetchāyāpramāṇena vā
- 6
त्रिपौरुषी पौरुषी चतुरङ्गुला नष्टच्छायो मध्याह्नेति चत्वारः पूर्वे दिवसस्याष्टभागाः
tripauruṣī pauruṣī caturaṅgulā naṣṭacchāyo madhyāhneti catvāraḥ pūrve divasasyāṣṭabhāgāḥ
- 7
तैः पश्चिमा व्याख्याताः
taiḥ paścimā vyākhyātāḥ
- 8
तत्र पूर्वे दिवसस्याष्टभागे रक्षाविधानम् आयव्ययौ च शृणुयात्
tatra pūrve divasasyāṣṭabhāge rakṣāvidhānam āyavyayau ca śṛṇuyāt
- 9
द्वितीये पौरजानपदानां कार्याणि पश्येत्
dvitīye paurajānapadānāṃ kāryāṇi paśyet
- 10
तृतीये स्नानभोजनं सेवेत स्वाध्यायं च कुर्वीत
tṛtīye snānabhojanaṃ seveta svādhyāyaṃ ca kurvīta
- 11
चतुर्थे हिरण्यप्रतिग्रहम् अध्यक्षांश्च कुर्वीत
caturthe hiraṇyapratigraham adhyakṣāṃśca kurvīta
- 12
पञ्चमे मन्त्रिपरिषदा पत्त्रसम्प्रेषणेन मन्त्रयेत चारगुह्यबोधनीयानि च बुध्येत
pañcame mantripariṣadā pattrasampreṣaṇena mantrayeta cāraguhyabodhanīyāni ca budhyeta
- 13
षष्ठे स्वैरविहारं मन्त्रं वा सेवेत
ṣaṣṭhe svairavihāraṃ mantraṃ vā seveta
- 14
सप्तमे हस्त्यश्वरथायुधीयान्पश्येत्
saptame hastyaśvarathāyudhīyānpaśyet
- 15
अष्टमे सेनापतिसखो विक्रमं चिन्तयेत्
aṣṭame senāpatisakho vikramaṃ cintayet
- 16
प्रतिष्ठिते ऽहनि संध्याम् उपासीत
pratiṣṭhite 'hani saṃdhyām upāsīta
- 17
प्रथमे रात्रिभागे गूढपुरुषान्पश्येत्
prathame rātribhāge gūḍhapuruṣānpaśyet
- 18
द्वितीये स्नानभोजनं कुर्वीत स्वाध्यायं च
dvitīye snānabhojanaṃ kurvīta svādhyāyaṃ ca
- 19
तृतीये तूर्यघोषेण संविष्टश्चतुर्थपञ्चमौ शयीत
tṛtīye tūryaghoṣeṇa saṃviṣṭaścaturthapañcamau śayīta
- 20
षष्ठे तूर्यघोषेण प्रतिबुद्धः शास्त्रम् इतिकर्तव्यतां च चिन्तयेत्
ṣaṣṭhe tūryaghoṣeṇa pratibuddhaḥ śāstram itikartavyatāṃ ca cintayet
- 21
सप्तमे मन्त्रम् अध्यासीत गूढपुरुषांश्च प्रेषयेत्
saptame mantram adhyāsīta gūḍhapuruṣāṃśca preṣayet
- 22
अष्टमे ऋत्विगाचार्यपुरोहितस्वस्त्ययनानि प्रतिगृह्णीयात्चिकित्सकमाहानसिकमौहूर्तिकांश्च पश्येत्
aṣṭame ṛtvigācāryapurohitasvastyayanāni pratigṛhṇīyātcikitsakamāhānasikamauhūrtikāṃśca paśyet
- 23
सवत्सां धेनुं वृषभं च प्रदक्षिणीकृत्योपस्थानं गच्छेत्
savatsāṃ dhenuṃ vṛṣabhaṃ ca pradakṣiṇīkṛtyopasthānaṃ gacchet
- 24
आत्मबलानुकूल्येन वा निशाहर्भागान्प्रविभज्य कार्याणि सेवेत
ātmabalānukūlyena vā niśāharbhāgānpravibhajya kāryāṇi seveta
- 25
उपस्थानगतः कार्यार्थिनाम् अद्वारासङ्गं कारयेत्
upasthānagataḥ kāryārthinām advārāsaṅgaṃ kārayet
- 26
दुर्दर्शो हि राजा कार्याकार्यविपर्यासम् आसन्नैः कार्यते
durdarśo hi rājā kāryākāryaviparyāsam āsannaiḥ kāryate
- 27
तेन प्रकृतिकोपम् अरिवशं वा गच्छेत्
tena prakṛtikopam arivaśaṃ vā gacchet
- 28
तस्माद्देवताश्रमपाषण्डश्रोत्रियपशुपुण्यस्थानानां बालवृद्धव्याधितव्यसन्यनाथानां स्त्रीणां च क्रमेण कार्याणि पश्येत्कार्यगौरवाद् आत्ययिकवशेन वा
tasmāddevatāśramapāṣaṇḍaśrotriyapaśupuṇyasthānānāṃ bālavṛddhavyādhitavyasanyanāthānāṃ strīṇāṃ ca krameṇa kāryāṇi paśyetkāryagauravād ātyayikavaśena vā
- 29
सर्वम् आत्ययिकं कार्यं शृणुयान्नातिपातयेत्
कृच्छ्रसाध्यम् अतिक्रान्तम् असाध्यं वापि जायते
sarvam ātyayikaṃ kāryaṃ śṛṇuyānnātipātayet
kṛcchrasādhyam atikrāntam asādhyaṃ vāpi jāyate
- 30
अग्न्यगारगतः कार्यं पश्येद्वैद्यतपस्विनाम्
पुरोहिताचार्यसखः प्रत्युत्थायाभिवाद्य च
agnyagāragataḥ kāryaṃ paśyedvaidyatapasvinām
purohitācāryasakhaḥ pratyutthāyābhivādya ca

