23 shlokas
- 1
वास्तुकप्रशस्ते देशे सप्राकारपरिखाद्वारम् अनेककक्ष्यापरिगतम् अन्तःपुरं कारयेत्
vāstukapraśaste deśe saprākāraparikhādvāram anekakakṣyāparigatam antaḥpuraṃ kārayet
- 2
कोशगृहविधानेन मध्ये वासगृहम्गूढभित्तिसंचारं मोहनगृहं तन्मध्ये वा वासगृहम्भूमिगृहं वासन्नचैत्यकाष्ठदेवतापिधानद्वारम् अनेकसुरुङ्गासंचारं तस्योपरि प्रासादं गूढभित्तिसोपानं सुषिरस्तम्भप्रवेशापसारं वा वासगृहं यन्त्रबद्धतलावपातं कारयेत् आपत्प्रतीकारार्थम् आपदि वा
kośagṛhavidhānena madhye vāsagṛhamgūḍhabhittisaṃcāraṃ mohanagṛhaṃ tanmadhye vā vāsagṛhambhūmigṛhaṃ vāsannacaityakāṣṭhadevatāpidhānadvāram anekasuruṅgāsaṃcāraṃ tasyopari prāsādaṃ gūḍhabhittisopānaṃ suṣirastambhapraveśāpasāraṃ vā vāsagṛhaṃ yantrabaddhatalāvapātaṃ kārayet āpatpratīkārārtham āpadi vā
- 3
अतो ऽन्यथा वा विकल्पयेत्सहाध्यायिभयात्
ato 'nyathā vā vikalpayetsahādhyāyibhayāt
- 4
मानुषेणाग्निना त्रिर् अपसव्यं परिगतम् अन्तःपुरम् अग्निर् अन्यो न दहति न चात्रान्यो ऽग्निर्ज्वलति वैद्युतेन भस्मना मृत्संयुक्तेन करकवारिणावलिप्तं च
mānuṣeṇāgninā trir apasavyaṃ parigatam antaḥpuram agnir anyo na dahati na cātrānyo 'gnirjvalati vaidyutena bhasmanā mṛtsaṃyuktena karakavāriṇāvaliptaṃ ca
- 5
जीवन्तीश्वेतामुष्ककपुष्पवन्दाकाभिर् अक्षीवे जातस्याश्वत्थस्य प्रतानेन गुप्तं सर्पा विषाणि वा न प्रभवन्ति
jīvantīśvetāmuṣkakapuṣpavandākābhir akṣīve jātasyāśvatthasya pratānena guptaṃ sarpā viṣāṇi vā na prabhavanti
- 6
मयूरनकुलपृषतोत्सर्गः सर्पान्भक्षयति
mayūranakulapṛṣatotsargaḥ sarpānbhakṣayati
- 7
शुकः सारिका भृङ्गराजो वा सर्पविषशङ्कायां क्रोशति
śukaḥ sārikā bhṛṅgarājo vā sarpaviṣaśaṅkāyāṃ krośati
- 8
क्रौञ्चो विषाभ्याशे माद्यति ग्लायति जीवंजीवकः म्रियते मत्तकोकिलः चकोरस्याक्षिणी विरज्येते
krauñco viṣābhyāśe mādyati glāyati jīvaṃjīvakaḥ mriyate mattakokilaḥ cakorasyākṣiṇī virajyete
- 9
इत्येवम् अग्निविषसर्पेभ्यः प्रतिकुर्वीत
ityevam agniviṣasarpebhyaḥ pratikurvīta
- 10
पृष्ठतः कक्ष्याविभागे स्त्रीनिवेशो गर्भव्याधिसंस्था वृक्षोदकस्थानं च
pṛṣṭhataḥ kakṣyāvibhāge strīniveśo garbhavyādhisaṃsthā vṛkṣodakasthānaṃ ca
- 11
बहिः कन्याकुमारपुरम्
bahiḥ kanyākumārapuram
- 12
पुरस्ताद् अलङ्कारभूमिर्मन्त्रभूमिर् उपस्थानं कुमाराध्यक्षस्थानं च
purastād alaṅkārabhūmirmantrabhūmir upasthānaṃ kumārādhyakṣasthānaṃ ca
- 13
कक्ष्यान्तरेष्वन्तर्वंशिकसैन्यं तिष्ठेत्
kakṣyāntareṣvantarvaṃśikasainyaṃ tiṣṭhet
- 14
अन्तर्गृहगतः स्थविरस्त्रीपरिशुद्धां देवीं पश्येत्
antargṛhagataḥ sthavirastrīpariśuddhāṃ devīṃ paśyet
- 15
देवीगृहे लीनो हि भ्राता भद्रसेनं जघान मातुः शय्यान्तर्गतश्च पुत्रः कारूषम्
devīgṛhe līno hi bhrātā bhadrasenaṃ jaghāna mātuḥ śayyāntargataśca putraḥ kārūṣam
- 16
लाजान्मधुनेति विषेण पर्यस्य देवी काशिराजम्विषदिग्धेन नूपुरेण वैरन्त्यम्मेखलामणिना सौवीरम्जालूथम् आदर्शेन वेण्यां गूढं शस्त्रं कृत्वा देवी विदूरथं जघान
lājānmadhuneti viṣeṇa paryasya devī kāśirājamviṣadigdhena nūpureṇa vairantyammekhalāmaṇinā sauvīramjālūtham ādarśena veṇyāṃ gūḍhaṃ śastraṃ kṛtvā devī vidūrathaṃ jaghāna
- 17
तस्माद् एतान्यास्पदानि परिहरेत्
tasmād etānyāspadāni pariharet
- 18
मुण्डजटिलकुहकप्रतिसंसर्गं बाह्याभिश्च दासीभिः प्रतिषेधयेत्
muṇḍajaṭilakuhakapratisaṃsargaṃ bāhyābhiśca dāsībhiḥ pratiṣedhayet
- 19
न चैनाः कुल्याः पश्येयुः अन्यत्र गर्भव्याधिसंस्थाभ्यः
na caināḥ kulyāḥ paśyeyuḥ anyatra garbhavyādhisaṃsthābhyaḥ
- 20
रूपाजीवाः स्नानप्रघर्षशुद्धशरीराः परिवर्तितवस्त्रालंकाराः पश्येयुः
rūpājīvāḥ snānapragharṣaśuddhaśarīrāḥ parivartitavastrālaṃkārāḥ paśyeyuḥ
- 21
अशीतिकाः पुरुषाः पञ्चाशत्काः स्त्रियो वा मातापितृव्यञ्जनाः स्थविरवर्षधराभ्यागारिकाश्चावरोधानां शौचाशौचं विद्युः स्थापयेयुश्च स्वामिहिते
aśītikāḥ puruṣāḥ pañcāśatkāḥ striyo vā mātāpitṛvyañjanāḥ sthaviravarṣadharābhyāgārikāścāvarodhānāṃ śaucāśaucaṃ vidyuḥ sthāpayeyuśca svāmihite
- 22
स्वभूमौ च वसेत्सर्वः परभूमौ न संचरेत्
न च बाह्येन संसर्गं कश्चिद् आभ्यन्तरो व्रजेत्
svabhūmau ca vasetsarvaḥ parabhūmau na saṃcaret
na ca bāhyena saṃsargaṃ kaścid ābhyantaro vrajet
- 23
सर्वं चावेक्षितं द्रव्यं निबद्धागमनिर्गमम्
निर्गच्छेद् अभिगच्छेद्वा मुद्रासंक्रान्तभूमिकम्
sarvaṃ cāvekṣitaṃ dravyaṃ nibaddhāgamanirgamam
nirgacched abhigacchedvā mudrāsaṃkrāntabhūmikam

