12 shlokas
- 1
आन्वीक्षिकी त्रयी वार्त्ता दण्डनीतिश्चेति विद्याः
ānvīkṣikī trayī vārttā daṇḍanītiśceti vidyāḥ
- 2
त्रयी वार्त्ता दण्डनीतिश्चेति मानवाः
trayī vārttā daṇḍanītiśceti mānavāḥ
- 3
त्रयीविशेषो ह्यान्वीक्षिकीति
trayīviśeṣo hyānvīkṣikīti
- 4
वार्त्ता दण्डनीतिश्चेति बार्हस्पत्याः
vārttā daṇḍanītiśceti bārhaspatyāḥ
- 5
संवरणमात्रं हि त्रयी लोकयात्राविद इति
saṃvaraṇamātraṃ hi trayī lokayātrāvida iti
- 6
दण्डनीतिर् एका विद्येत्यौशनसाः
daṇḍanītir ekā vidyetyauśanasāḥ
- 7
तस्यां हि सर्वविद्यारम्भाः प्रतिबद्धा इति
tasyāṃ hi sarvavidyārambhāḥ pratibaddhā iti
- 8
चतस्र एव विद्या इति कौटिल्यः
catasra eva vidyā iti kauṭilyaḥ
- 9
ताभिर्धर्मार्थौ यद्विद्यात्तद्विद्यानां विद्यात्वम्
tābhirdharmārthau yadvidyāttadvidyānāṃ vidyātvam
- 10
सांख्यं योगो लोकायतं चेत्यान्वीक्षिकी
sāṃkhyaṃ yogo lokāyataṃ cetyānvīkṣikī
- 11
धर्माधर्मौ त्रय्याम् अर्थानर्थौ वार्त्तायां नयानयौ दण्डनीत्यां बलाबले च एतासां हेतुभिर् अन्वीक्षमाणा लोकस्य उपकरोति व्यसने ऽभ्युदये च बुद्धिम् अवस्थापयति प्रज्ञावाक्यक्रियावैशारद्यं च करोति
dharmādharmau trayyām arthānarthau vārttāyāṃ nayānayau daṇḍanītyāṃ balābale ca etāsāṃ hetubhir anvīkṣamāṇā lokasya upakaroti vyasane 'bhyudaye ca buddhim avasthāpayati prajñāvākyakriyāvaiśāradyaṃ ca karoti
- 12
प्रदीपः सर्वविद्यानाम् उपायः सर्वकर्मणाम्
आश्रयः सर्वधर्माणां शश्वद् आन्वीक्षिकी मता
pradīpaḥ sarvavidyānām upāyaḥ sarvakarmaṇām
āśrayaḥ sarvadharmāṇāṃ śaśvad ānvīkṣikī matā

