22 shlokas
- 1
श्रवणं श्रविष्ठीयायां पौर्णमास्याम् अक्षतसक्तूनां स्थालीपाकस्य वा जुहोति
śravaṇaṃ śraviṣṭhīyāyāṃ paurṇamāsyām akṣatasaktūnāṃ sthālīpākasya vā juhoti
- 2
विष्णवे स्वाहा श्रवणाय स्वाहा श्रावण्यै पौर्णमास्यै स्वाहा वर्षाभ्यः स्वाहेति
viṣṇave svāhā śravaṇāya svāhā śrāvaṇyai paurṇamāsyai svāhā varṣābhyaḥ svāheti
- 3
गृह्यम् अग्निं बाह्यत उपसमाधाय लाजान् अक्षतसक्तूंश्च सर्पिषा संनिनीय जुहोति
gṛhyam agniṃ bāhyata upasamādhāya lājān akṣatasaktūṃśca sarpiṣā saṃninīya juhoti
- 4
दिव्यानां सर्पाणाम् अधिपतये स्वाहा दिव्येभ्यः सर्पेभ्यः स्वाहेति
divyānāṃ sarpāṇām adhipataye svāhā divyebhyaḥ sarpebhyaḥ svāheti
- 5
उत्तरेणाग्निं प्रागग्रेषु नवेषु कुशेषूदकुम्भं नवं प्रतिष्ठाप्य
uttareṇāgniṃ prāgagreṣu naveṣu kuśeṣūdakumbhaṃ navaṃ pratiṣṭhāpya
- 6
दिव्यानां सर्पाणाम् अधिपतिर् अवनेनिक्तां दिव्याः सर्पा अवनेनिजताम् इत्य् अपो निनयति
divyānāṃ sarpāṇām adhipatir avaneniktāṃ divyāḥ sarpā avanenijatām ity apo ninayati
- 7
दिव्यानां सर्पाणाम् अधिपतिः प्रलिखतां दिव्याः सर्पाः प्रलिखन्ताम् इति फणेन चेष्टयति
divyānāṃ sarpāṇām adhipatiḥ pralikhatāṃ divyāḥ sarpāḥ pralikhantām iti phaṇena ceṣṭayati
- 8
दिव्यानां सर्पाणाम् अधिपतिः प्रलिम्पतां दिव्याः सर्पाः प्रलिम्पन्ताम् इति वर्णकस्य मात्रा निनयति
divyānāṃ sarpāṇām adhipatiḥ pralimpatāṃ divyāḥ sarpāḥ pralimpantām iti varṇakasya mātrā ninayati
- 9
दिव्यानां सर्पाणाम् अधिपतिर् आबध्नीतां दिव्याः सर्पा आबध्नताम् इति सुमनस उपहरति
divyānāṃ sarpāṇām adhipatir ābadhnītāṃ divyāḥ sarpā ābadhnatām iti sumanasa upaharati
- 10
दिव्यानां सर्पाणाम् अधिपतिर् आछादयतां दिव्याः सर्पा आछादयन्ताम् इति सूत्रतन्तुम् उपहरति
divyānāṃ sarpāṇām adhipatir āchādayatāṃ divyāḥ sarpā āchādayantām iti sūtratantum upaharati
- 11
दिव्यानां सर्पाणाम् अधिपतिर् आङ्क्तां दिव्याः सर्पा आञ्जताम् इति कुशतरुणेनोपघातम् आञ्जनस्य करोति
divyānāṃ sarpāṇām adhipatir āṅktāṃ divyāḥ sarpā āñjatām iti kuśataruṇenopaghātam āñjanasya karoti
- 12
दिव्यानां सर्पाणाम् अधिपतिर् ईक्षतां दिव्याः सर्पा ईक्षन्ताम् इत्य् आदर्शेनेक्षयति
divyānāṃ sarpāṇām adhipatir īkṣatāṃ divyāḥ sarpā īkṣantām ity ādarśenekṣayati
- 13
दिव्यानां सर्पाणाम् अधिपत एष ते बलिर्दिव्याः सर्पा एष वो बलिर् इति बलिम् उपहरति
divyānāṃ sarpāṇām adhipata eṣa te balirdivyāḥ sarpā eṣa vo balir iti balim upaharati
- 14
एवम् आन्तरिक्षाणाम्
evam āntarikṣāṇām
- 15
दिश्यानाम्
diśyānām
- 16
पार्थिवानाम् इति
pārthivānām iti
- 17
त्रिस्त्रिर् उच्चैस्तरामुच्चैस्तरां पूर्वम्
tristrir uccaistarāmuccaistarāṃ pūrvam
- 18
नीचैस्तरां नीचैस्तराम् उत्तरम्
nīcaistarāṃ nīcaistarām uttaram
- 19
एवम् अहरहर् अक्षतसक्तूनां दर्वेणोपघातम् आ प्रत्यवरोहणाद्रात्रौ वाग्यतः सोदकं बलिं हरेत्
evam aharahar akṣatasaktūnāṃ darveṇopaghātam ā pratyavarohaṇādrātrau vāgyataḥ sodakaṃ baliṃ haret
- 20
वाग्यता चैनम् उपसादयेत्
vāgyatā cainam upasādayet
- 21
य उपक्रमः स उत्सर्गः
ya upakramaḥ sa utsargaḥ
- 22
सुत्रामाणम् इति शय्याम् आरोहेत्
sutrāmāṇam iti śayyām ārohet

