22 shlokas
- 1
पिता वै वामदेव्यं पुत्राः पृष्ठानि
pitā vai vāmadevyaṃ putrāḥ pṛṣṭhāni
- 2
एतस्माद्वा एतानि योनेर् असृज्यन्त
etasmādvā etāni yoner asṛjyanta
- 3
तस्मात्पृष्ठानां स्तोत्रं वामदेव्येनानुष्टुवन्ति शान्त्यै
tasmātpṛṣṭhānāṃ stotraṃ vāmadevyenānuṣṭuvanti śāntyai
- 4
यद्धि पुत्रो ऽशान्तं चरति पिता तच्छमयति
yaddhi putro 'śāntaṃ carati pitā tacchamayati
- 5
अयं वै लोको मध्यमो वामदेव्यम् एतस्माद्वा इमौ लोकौ विष्वञ्चाव् असृज्येतां बृहच्च रथन्तरं च
ayaṃ vai loko madhyamo vāmadevyam etasmādvā imau lokau viṣvañcāv asṛjyetāṃ bṛhacca rathantaraṃ ca
- 6
यद्रथन्तरेण स्तुवन्ति ये रथन्तराः पशवो ऽन्तरीक्षं त उपश्रयन्ति यद्बृहता स्तुवन्ति ये बार्हताः पशवो ऽन्तरीक्षं त उपश्रयन्ति ते वामदेव्यस्य स्तोत्रेणावरुद्धाः
yadrathantareṇa stuvanti ye rathantarāḥ paśavo 'ntarīkṣaṃ ta upaśrayanti yadbṛhatā stuvanti ye bārhatāḥ paśavo 'ntarīkṣaṃ ta upaśrayanti te vāmadevyasya stotreṇāvaruddhāḥ
- 7
ध्रुव आसीनो वामदेव्येनोद्गायेत्पशूनाम् उपवृत्त्यै
dhruva āsīno vāmadevyenodgāyetpaśūnām upavṛttyai
- 8
उपैनं पशव आवर्तन्ते य एवं वेद
upainaṃ paśava āvartante ya evaṃ veda
- 9
अन्तरिक्षं वै वामदेव्यम् अधून्वतेवोद्गेयम् अधूतम् इवान्तरिक्षं पशवो वै वामदेव्यम् अहिंसतेवोद्गेयं पशूनाम् अहिंसायै
antarikṣaṃ vai vāmadevyam adhūnvatevodgeyam adhūtam ivāntarikṣaṃ paśavo vai vāmadevyam ahiṃsatevodgeyaṃ paśūnām ahiṃsāyai
- 10
कथम् इव वामदेव्यं गेयम् इत्य् आहुः
katham iva vāmadevyaṃ geyam ity āhuḥ
- 11
यथाङ्कुली पुत्रान्संदश्यासंभिन्दन्ती हरति यथा वातो ऽप्सु शनैर्वाति
yathāṅkulī putrānsaṃdaśyāsaṃbhindantī harati yathā vāto 'psu śanairvāti
- 12
स्वधूर्वामदेव्यं गेयम्
svadhūrvāmadevyaṃ geyam
- 13
यो वै स्वधूर्वामदेव्यं गायति स्वधूर्भवति
yo vai svadhūrvāmadevyaṃ gāyati svadhūrbhavati
- 14
यात्य् अस्यान्यो नियानेन नान्यस्य नियानेन याति
yāty asyānyo niyānena nānyasya niyānena yāti
- 15
न बृहतो न रथन्तरस्यानुरूपं गेयं स्वेनैवायतनेन गेयम् आयतनवान्भवति
na bṛhato na rathantarasyānurūpaṃ geyaṃ svenaivāyatanena geyam āyatanavānbhavati
- 16
देवा वै पशून्व्यभजन्त ते रुद्रम् अन्तरायंस्तान्वामदेव्यस्य स्तोत्र उपेक्षते
devā vai paśūnvyabhajanta te rudram antarāyaṃstānvāmadevyasya stotra upekṣate
- 17
अनिरुक्तं गेयम्
aniruktaṃ geyam
- 18
यन्निराह रुद्राय पशून् अपिदधाति रुद्रस्तां समां पशून्घातुको भवति
yannirāha rudrāya paśūn apidadhāti rudrastāṃ samāṃ paśūnghātuko bhavati
- 19
रेवतीषु वामदेव्येन पशुकामः स्तुवीत
revatīṣu vāmadevyena paśukāmaḥ stuvīta
- 20
आपो वै रेवत्यः पशवो वामदेव्यम् अद्भ्य एवास्मै पशून्प्रजनयति
āpo vai revatyaḥ paśavo vāmadevyam adbhya evāsmai paśūnprajanayati
- 21
अनवर्त्तिः पशुतो भवति प्रजा स्वस्य मीलितेव भवति
anavarttiḥ paśuto bhavati prajā svasya mīliteva bhavati
- 22
कवतीभ्यो ह्य् एति प्रजापतेः
kavatībhyo hy eti prajāpateḥ

