29 shlokas
- 1
एतावता वाव माध्यन्दिनं सवनं पुपुवे
etāvatā vāva mādhyandinaṃ savanaṃ pupuve
- 2
त्रिभिश्च छन्दोभिः पञ्चभिश्च सामभिः
tribhiśca chandobhiḥ pañcabhiśca sāmabhiḥ
- 3
यन्माध्यन्दिनेन पवमानेन स्तुवन्ति माध्यन्दिनम् एव तत्सवनं पावयन्ति
yanmādhyandinena pavamānena stuvanti mādhyandinam eva tatsavanaṃ pāvayanti
- 4
एतावन्ति वाव सर्वाणि सामानि यावन्ति माध्यन्दिने पवमाने
etāvanti vāva sarvāṇi sāmāni yāvanti mādhyandine pavamāne
- 5
गायत्रं निधनवद् अनिधनम् ऐडम्
gāyatraṃ nidhanavad anidhanam aiḍam
- 6
यन्माध्यन्दिनेन पवमानेन स्तुवन्ति सर्वैर् एव तत्सामभिः स्तुवन्ति
yanmādhyandinena pavamānena stuvanti sarvair eva tatsāmabhiḥ stuvanti
- 7
आत्मा वै यज्ञस्य पवमानो मुखं गायत्री प्राणो गायत्रं यद्गायत्र्यां गायत्रेण स्तुवन्ति मुखत एव तत्प्राणान्दधति
ātmā vai yajñasya pavamāno mukhaṃ gāyatrī prāṇo gāyatraṃ yadgāyatryāṃ gāyatreṇa stuvanti mukhata eva tatprāṇāndadhati
- 8
प्राणापाना वा एतानि छन्दांसि प्राणो गायत्री व्यानो बृहत्य् अपानस्त्रिष्टुब्यद् एतैश्छन्दोभिः स्तुवन्ति प्राणापानानाम् अविच्छेदाय
prāṇāpānā vā etāni chandāṃsi prāṇo gāyatrī vyāno bṛhaty apānastriṣṭubyad etaiśchandobhiḥ stuvanti prāṇāpānānām avicchedāya
- 9
इमे वै लोका एतानि छन्दांस्य् अयम् एव गायत्र्य् अयं मध्यमो बृहत्य् असाव् उत्तमस्त्रिष्टुब्यद् एतैश्छन्दोभिः संहितैः स्तुवन्त्य् एषां लोकानाम् अविच्छेदाय
ime vai lokā etāni chandāṃsy ayam eva gāyatry ayaṃ madhyamo bṛhaty asāv uttamastriṣṭubyad etaiśchandobhiḥ saṃhitaiḥ stuvanty eṣāṃ lokānām avicchedāya
- 10
यद् अन्यच्छन्दो ऽन्तरा व्यवेयाद् इमांल्लोकान्विच्छिन्द्यात्
yad anyacchando 'ntarā vyaveyād imāṃllokānvicchindyāt
- 11
गायत्रेण स्तुत्वा निधनवता स्तुवन्तीयं वै गायत्र्य् अस्याम् एव तद् आयतनं क्रियते
gāyatreṇa stutvā nidhanavatā stuvantīyaṃ vai gāyatry asyām eva tad āyatanaṃ kriyate
- 12
यद् अनिधनेनाग्रे स्तुयुर् अनायतनो यजमानः स्यात्
yad anidhanenāgre stuyur anāyatano yajamānaḥ syāt
- 13
निधनवता स्तुवन्ति वीर्यं वै गायत्री वीर्यं निधनं वीर्येणैव तद्वीर्यं समर्धयति
nidhanavatā stuvanti vīryaṃ vai gāyatrī vīryaṃ nidhanaṃ vīryeṇaiva tadvīryaṃ samardhayati
- 14
ऐडेन बृहतीम् आरभन्ते
aiḍena bṛhatīm ārabhante
- 15
पशवो वा इडा पशवो बृहती पशुष्व् एव तत्पशून्दधाति
paśavo vā iḍā paśavo bṛhatī paśuṣv eva tatpaśūndadhāti
- 16
बृहत्यां भूयिष्ठानि सामानि भवन्ति
bṛhatyāṃ bhūyiṣṭhāni sāmāni bhavanti
- 17
तत्रापि त्रिणिधनम्
tatrāpi triṇidhanam
- 18
अबलिष्ठ इव वा अयं मध्यमो लोकस्तस्यैव तद् आयतनं क्रियते
abaliṣṭha iva vā ayaṃ madhyamo lokastasyaiva tad āyatanaṃ kriyate
- 19
त्रिणिधनं भवति त्रीणि सवनानां छिद्राणि तानि तेनापिधीयन्ते
triṇidhanaṃ bhavati trīṇi savanānāṃ chidrāṇi tāni tenāpidhīyante
- 20
त्रिणिधनं भवति त्रय इमे लोका एष्व् एव लोकेषु प्रतितिष्ठति
triṇidhanaṃ bhavati traya ime lokā eṣv eva lokeṣu pratitiṣṭhati
- 21
त्रिणिधनं भवत्य् एतेन वै माध्यन्दिनं सवनं प्रतिष्ठितं यत्त्रिणिधनं यत्त्रिणिधनं न स्याद् अप्रतिष्ठितं माध्यन्दिनं सवनं स्यात्
triṇidhanaṃ bhavaty etena vai mādhyandinaṃ savanaṃ pratiṣṭhitaṃ yattriṇidhanaṃ yattriṇidhanaṃ na syād apratiṣṭhitaṃ mādhyandinaṃ savanaṃ syāt
- 22
द्व्यक्षराणि निधनानि भवन्ति द्विपाद्यजमानो यजमानम् एव यज्ञे पशुषु प्रतिष्ठापयति
dvyakṣarāṇi nidhanāni bhavanti dvipādyajamāno yajamānam eva yajñe paśuṣu pratiṣṭhāpayati
- 23
अनिधनम् अन्ततो भवति स्वर्गस्य लोकस्यानतिपादाय
anidhanam antato bhavati svargasya lokasyānatipādāya
- 24
यन्निधनवत्स्याद्यजमानं स्वर्गाल्लोकान्निर्हन्यात्
yannidhanavatsyādyajamānaṃ svargāllokānnirhanyāt
- 25
स्वारं भवति
svāraṃ bhavati
- 26
स्वरेण वै देवेभ्यो ऽन्ततो ऽन्नाद्यं प्रदीयते स्वरेणैव तद्देवेभ्यो ऽन्ततो ऽन्नाद्यं प्रयच्छति
svareṇa vai devebhyo 'ntato 'nnādyaṃ pradīyate svareṇaiva taddevebhyo 'ntato 'nnādyaṃ prayacchati
- 27
गायत्रं पुरस्ताद्भवति स्वारम् अन्ततः
gāyatraṃ purastādbhavati svāram antataḥ
- 28
प्राणो वै गायत्रं प्राणः स्वरः प्राणान् एव तद् उभयतो दधाति तस्माद् उभयतःप्राणाः पशवः
prāṇo vai gāyatraṃ prāṇaḥ svaraḥ prāṇān eva tad ubhayato dadhāti tasmād ubhayataḥprāṇāḥ paśavaḥ
- 29
यद्गायत्रं पुरस्ताद्भवति स्वारम् अन्ततः प्राणैर् एव प्रैत्य् अपाने प्रतितिष्ठति
yadgāyatraṃ purastādbhavati svāram antataḥ prāṇair eva praity apāne pratitiṣṭhati

