17 shlokas
- 1
इमौ वै लोकौ सहास्तां तौ वियन्ताव् अब्रूतां विवाहं विवहावहै सह नाव् अस्त्व् इति
imau vai lokau sahāstāṃ tau viyantāv abrūtāṃ vivāhaṃ vivahāvahai saha nāv astv iti
- 2
तयोर् अयम् अमुष्मै श्यैतं प्रायच्छन्नौधसम् असाव् अस्मै
tayor ayam amuṣmai śyaitaṃ prāyacchannaudhasam asāv asmai
- 3
तत एनयोर्निधने विपर्यक्रामतां देवविवाहो वै श्यैतनौधसे
tata enayornidhane viparyakrāmatāṃ devavivāho vai śyaitanaudhase
- 4
प्रवसीयांसं विवाहम् आप्नोति य एवं वेद
pravasīyāṃsaṃ vivāham āpnoti ya evaṃ veda
- 5
इतो वा इमे लोका ऊर्ध्वाः कल्पमाना यन्त्य् अमुतो ऽर्वाञ्चः कल्पमाना आयन्ति
ito vā ime lokā ūrdhvāḥ kalpamānā yanty amuto 'rvāñcaḥ kalpamānā āyanti
- 6
यद्रथन्तरेण स्तुवन्तीमं लोकं तेन युनक्त्य् अन्तरिक्षं वामदेव्येन नौधसेनामुं यद्बृहता स्तुवन्त्य् अमुं लोकं तेन युनक्त्य् अन्तरिक्षं वामदेव्येन श्यैतेनेमम्
yadrathantareṇa stuvantīmaṃ lokaṃ tena yunakty antarikṣaṃ vāmadevyena naudhasenāmuṃ yadbṛhatā stuvanty amuṃ lokaṃ tena yunakty antarikṣaṃ vāmadevyena śyaitenemam
- 7
कॢप्तान् इमांल्लोकान् उपास्ते य एवं वेद
kḷptān imāṃllokān upāste ya evaṃ veda
- 8
बृहद्रथन्तरे वै श्यैतनौधसे यद्रथन्तराय नौधसं प्रति प्रयुञ्जन्ति बृहद् एवास्मै तत्प्रति प्रयुञ्जन्ति बृहद्ध्य् एतत्परोक्षं यन्नौधसं यद्बृहते श्यैतं प्रति प्रयुञ्जन्ति रथन्तरम् एवास्मै तत्प्रति प्रयुञ्जन्ति रथन्तरं ह्य् एतत्परोक्षं यच्छ्यैतम्
bṛhadrathantare vai śyaitanaudhase yadrathantarāya naudhasaṃ prati prayuñjanti bṛhad evāsmai tatprati prayuñjanti bṛhaddhy etatparokṣaṃ yannaudhasaṃ yadbṛhate śyaitaṃ prati prayuñjanti rathantaram evāsmai tatprati prayuñjanti rathantaraṃ hy etatparokṣaṃ yacchyaitam
- 9
उभाभ्यां बृहद्रथन्तराभ्यां स्तुते य एवं वेद
ubhābhyāṃ bṛhadrathantarābhyāṃ stute ya evaṃ veda
- 10
देवा वै ब्रह्म व्यभजन्त तान्नोधाः काक्षीवत आगच्छत्ते ऽब्रुवन्न् ऋषिर्न आगंस्तस्मै ब्रह्म ददामेति तस्मा एतत्साम प्रायच्छंस्तस्मान्नौधसं ब्रह्म वै नौधसम्
devā vai brahma vyabhajanta tānnodhāḥ kākṣīvata āgacchatte 'bruvann ṛṣirna āgaṃstasmai brahma dadāmeti tasmā etatsāma prāyacchaṃstasmānnaudhasaṃ brahma vai naudhasam
- 11
ब्रह्मवर्चसकाम एतेन स्तुवीत ब्रह्मवर्चसी भवति
brahmavarcasakāma etena stuvīta brahmavarcasī bhavati
- 12
अथैतच्छ्यैतम्
athaitacchyaitam
- 13
प्रजापतिः पशून् असृजत ते ऽस्मात्सृष्टा अपाक्रामंस्तान् एतेन साम्नाभिव्याहरत्ते ऽस्मा अतिष्ठन्त ते शेत्या अभवन्यच्छेत्या अभवंस्तस्माच्छ्यैतं पशवो वै श्यैतम्
prajāpatiḥ paśūn asṛjata te 'smātsṛṣṭā apākrāmaṃstān etena sāmnābhivyāharatte 'smā atiṣṭhanta te śetyā abhavanyacchetyā abhavaṃstasmācchyaitaṃ paśavo vai śyaitam
- 14
पशुकाम एतेन स्तुवीत पशुमान्भवति
paśukāma etena stuvīta paśumānbhavati
- 15
प्रजापतिः प्रजा असृजत ताः सृष्टा अशोचंस्ताः श्यैतेन हुंमा इत्य् अभ्यजिघ्रत्ततो वै ताः समैधन्त समेधन्ते तां समां प्रजा यत्रैवं विद्वाञ्छ्यैतेनोद्गायति
prajāpatiḥ prajā asṛjata tāḥ sṛṣṭā aśocaṃstāḥ śyaitena huṃmā ity abhyajighrattato vai tāḥ samaidhanta samedhante tāṃ samāṃ prajā yatraivaṃ vidvāñchyaitenodgāyati
- 16
एष वै यजमानस्य प्रजापतिर्यद् उद्गाता यच्छ्यैतेन हिंकरोति प्रजापतिर् एव भूत्वा प्रजा अभिजिघ्रति
eṣa vai yajamānasya prajāpatiryad udgātā yacchyaitena hiṃkaroti prajāpatir eva bhūtvā prajā abhijighrati
- 17
वसुनिधनं भवति पशवो वै वसु पशुष्व् एव प्रतितिष्ठति
vasunidhanaṃ bhavati paśavo vai vasu paśuṣv eva pratitiṣṭhati

