21 shlokas
- 1
प्रजापतिर् अकामयत बहु स्यां प्रजायेयेति स शोचन्न् अमहीयमानो ऽतिष्ठत्स एतद् आमहीयवम् अपश्यत्तेनेमाः प्रजा असृजत ताः सृष्टा अमहीयन्त यद् अमहीयन्त तस्माद् आमहीयवम्
prajāpatir akāmayata bahu syāṃ prajāyeyeti sa śocann amahīyamāno 'tiṣṭhatsa etad āmahīyavam apaśyattenemāḥ prajā asṛjata tāḥ sṛṣṭā amahīyanta yad amahīyanta tasmād āmahīyavam
- 2
ता अस्मात्सृष्टा अपाक्रामंस्तासां दिवि सद्भूम्य् आदद इति प्राणान् आदत्त ता एनं प्राणेष्व् आत्तेषु पुनर् उपावर्तन्त ताभ्य उग्रं शर्म महि श्रव इति पुनः प्राणान्प्रायच्छत्ता अस्माद् उद् एवायोधंस्तासां स्तौष इति मन्यून् अवाशृणात्ततो वै तस्मै ताः श्रैष्ठ्यायातिष्ठन्त
tā asmātsṛṣṭā apākrāmaṃstāsāṃ divi sadbhūmy ādada iti prāṇān ādatta tā enaṃ prāṇeṣv ātteṣu punar upāvartanta tābhya ugraṃ śarma mahi śrava iti punaḥ prāṇānprāyacchattā asmād ud evāyodhaṃstāsāṃ stauṣa iti manyūn avāśṛṇāttato vai tasmai tāḥ śraiṣṭhyāyātiṣṭhanta
- 3
तिष्ठन्ते ऽस्मै समानाः श्रैष्ठ्याय य एवं वेद
tiṣṭhante 'smai samānāḥ śraiṣṭhyāya ya evaṃ veda
- 4
प्रजानां च वा एषा सृष्टिः पापवसीयसश्च विधृतिर्यद् आमहीयवम्
prajānāṃ ca vā eṣā sṛṣṭiḥ pāpavasīyasaśca vidhṛtiryad āmahīyavam
- 5
विधृतिः पापवसीयसो भवति य एवं वेद
vidhṛtiḥ pāpavasīyaso bhavati ya evaṃ veda
- 6
देवा वै यशस्कामाः सत्त्रम् आसताग्निर् इन्द्रो वायुर्मखस्ते ऽब्रुवन्यन्नो यश ऋछात्तन्नः सहासद् इति तेषां मखं यश आर्छत्तद् आदायापाक्रामत्तद् अस्य प्रासहादित्सन्त तं पर्ययतन्त स्वधनुः प्रतिष्टभ्यातिष्ठत्तस्य धनुरार्त्निर् ऊर्ध्वा पतित्वा शिरो ऽछिनत्स प्रवर्ग्यो ऽभवद्यज्ञो वै मखो यत्प्रवर्ग्यं प्रवृञ्जन्ति यज्ञस्यैव तच्छिरः प्रतिदधति
devā vai yaśaskāmāḥ sattram āsatāgnir indro vāyurmakhaste 'bruvanyanno yaśa ṛchāttannaḥ sahāsad iti teṣāṃ makhaṃ yaśa ārchattad ādāyāpākrāmattad asya prāsahāditsanta taṃ paryayatanta svadhanuḥ pratiṣṭabhyātiṣṭhattasya dhanurārtnir ūrdhvā patitvā śiro 'chinatsa pravargyo 'bhavadyajño vai makho yatpravargyaṃ pravṛñjanti yajñasyaiva tacchiraḥ pratidadhati
- 7
तद्देवा यशो व्यभजन्त तस्याग्नी रौरवं प्राबृहत
taddevā yaśo vyabhajanta tasyāgnī rauravaṃ prābṛhata
- 8
तद्वै स पशुवीर्यं प्राबृहत पशवो वै रौरवम्
tadvai sa paśuvīryaṃ prābṛhata paśavo vai rauravam
- 9
पशुमान्भवति य एवं वेद
paśumānbhavati ya evaṃ veda
- 10
अग्निर्वै रूरस्तस्यैतद्रौरवम्
agnirvai rūrastasyaitadrauravam
- 11
असुरा वै देवान्पर्ययतन्त तत एताव् अग्नी रूरौ विष्वञ्चौ स्तोभाव् अपश्यत्ताभ्याम् एनान्प्रत्यौषत्ते प्रत्युष्यमाणा अरवन्त यद् अरवन्त तस्माद्रौरवम्
asurā vai devānparyayatanta tata etāv agnī rūrau viṣvañcau stobhāv apaśyattābhyām enānpratyauṣatte pratyuṣyamāṇā aravanta yad aravanta tasmādrauravam
- 12
अथेन्द्रो यौधाजयं प्राबृहत तद्वै स वज्रं प्राबृहत वज्रो वै यौधाजयम्
athendro yaudhājayaṃ prābṛhata tadvai sa vajraṃ prābṛhata vajro vai yaudhājayam
- 13
वज्रं भ्रातृव्याय प्रहरति य एवं वेद
vajraṃ bhrātṛvyāya praharati ya evaṃ veda
- 14
इन्द्रो वै युधाजित्तस्यैतद्यौधाजयम्
indro vai yudhājittasyaitadyaudhājayam
- 15
युधा मर्या अजैष्मेति तस्माद्यौधाजयम्
yudhā maryā ajaiṣmeti tasmādyaudhājayam
- 16
अथ वायुर् औशनं प्राबृहत
atha vāyur auśanaṃ prābṛhata
- 17
तद्वै स प्राणवीर्यं प्राबृहत प्राणा वा औशनम्
tadvai sa prāṇavīryaṃ prābṛhata prāṇā vā auśanam
- 18
सर्वम् आयुर् एति य एवं वेद
sarvam āyur eti ya evaṃ veda
- 19
वायुर्वा उशनास्तस्यैतद् औशनम्
vāyurvā uśanāstasyaitad auśanam
- 20
उशना वै काव्यो ऽसुराणां पुरोहित आसीत्तं देवाः कामदुघाभिर् उपामन्त्रयन्त तस्मा एतान्य् औशनानि प्रायच्छन्कामदुघा वा औशनानि
uśanā vai kāvyo 'surāṇāṃ purohita āsīttaṃ devāḥ kāmadughābhir upāmantrayanta tasmā etāny auśanāni prāyacchankāmadughā vā auśanāni
- 21
कामदुघा एनम् उपतिष्ठन्ते य एवं वेद
kāmadughā enam upatiṣṭhante ya evaṃ veda

