15 shlokas
- 1
अपो वा ऋत्व्यम् आर्छत्तासां वायुः पृष्ठे व्यवर्तत ततो वसु वामं समभवत्तस्मिन्मित्रावरुणौ पर्यपश्यतां ताव् अब्रूतां वामं मर्या इदं देवेष्व् आजनीति तस्माद्वामदेव्यम्
apo vā ṛtvyam ārchattāsāṃ vāyuḥ pṛṣṭhe vyavartata tato vasu vāmaṃ samabhavattasminmitrāvaruṇau paryapaśyatāṃ tāv abrūtāṃ vāmaṃ maryā idaṃ deveṣv ājanīti tasmādvāmadevyam
- 2
तत्परिगृह्णन्ताव् अब्रूताम् इदम् अविदावेदं नौ माभ्यर्त्तिढ्वम् इति तत्प्रजापतिर् अब्रवीन्मद्वा एतद्ध्य् अजनि मम वा एतद् इति तद् अग्निर् अब्रवीन्मां वा एतद् अन्वजनि मम वा एतद् इति तद् इन्द्रो ऽब्रवीच्छ्रेष्ठस्था वा एतद् अहं वः श्रेष्ठो ऽस्मि मम वा एतद् इति तद्विश्वे देवा अब्रुवन्न् अस्मद्देवत्यं वा एतद्यद् अद्भ्यो ऽधि समभूद् अस्माकं वा एतद् इति तत्प्रजापतिर् अब्रवीत्सर्वेषां न इदम् अस्तु सर्व इदम् उपजीवामेति तत्पृष्ठेषु न्यदधुः सर्वदेवत्यं वै वामदेव्यम्
tatparigṛhṇantāv abrūtām idam avidāvedaṃ nau mābhyarttiḍhvam iti tatprajāpatir abravīnmadvā etaddhy ajani mama vā etad iti tad agnir abravīnmāṃ vā etad anvajani mama vā etad iti tad indro 'bravīcchreṣṭhasthā vā etad ahaṃ vaḥ śreṣṭho 'smi mama vā etad iti tadviśve devā abruvann asmaddevatyaṃ vā etadyad adbhyo 'dhi samabhūd asmākaṃ vā etad iti tatprajāpatir abravītsarveṣāṃ na idam astu sarva idam upajīvāmeti tatpṛṣṭheṣu nyadadhuḥ sarvadevatyaṃ vai vāmadevyam
- 3
यत्कवतीषु तेन प्राजापत्यं को हि प्रजापतिर्यद् अनिरुक्तासु तेन प्राजापत्यम् अनिरुक्तो हि प्रजापतिः
yatkavatīṣu tena prājāpatyaṃ ko hi prajāpatiryad aniruktāsu tena prājāpatyam anirukto hi prajāpatiḥ
- 4
यद्गायत्रीषु तेनाग्नेयं गायत्रच्छन्दा ह्य् अग्निः
yadgāyatrīṣu tenāgneyaṃ gāyatracchandā hy agniḥ
- 5
यत्पृष्ठेषु न्यदधुस्तेनैन्द्रं सर्वाणि हि पृष्ठानीन्द्रस्य निष्केवल्यानि
yatpṛṣṭheṣu nyadadhustenaindraṃ sarvāṇi hi pṛṣṭhānīndrasya niṣkevalyāni
- 6
यन्मैत्रावरुणो ऽनुशंसति तेन मैत्रावरुणम्
yanmaitrāvaruṇo 'nuśaṃsati tena maitrāvaruṇam
- 7
यद्बहुदेवत्यम् उत्तमं पदं तेन वैश्वदेवं सर्वेष्व् एव रूपेषु प्रतितिष्ठति
yadbahudevatyam uttamaṃ padaṃ tena vaiśvadevaṃ sarveṣv eva rūpeṣu pratitiṣṭhati
- 8
प्रजापतिर्वा एतां गायत्रीं योनिम् अपश्यत्स आदीधीतास्माद्योनेः पृष्ठानि सृजा इति
prajāpatirvā etāṃ gāyatrīṃ yonim apaśyatsa ādīdhītāsmādyoneḥ pṛṣṭhāni sṛjā iti
- 9
स रथन्तरम् असृजत तद्रथस्य घोषो ऽन्वसृज्यत
sa rathantaram asṛjata tadrathasya ghoṣo 'nvasṛjyata
- 10
स बृहद् असृजत तत्स्तनयित्नोर्घोषो ऽन्वसृज्यत स वैरूपम् असृजत तद्वातस्य घोषो ऽन्वसृज्यत
sa bṛhad asṛjata tatstanayitnorghoṣo 'nvasṛjyata sa vairūpam asṛjata tadvātasya ghoṣo 'nvasṛjyata
- 11
स वैराजम् असृजत तद् अग्नेर्घोषो ऽन्वसृज्यत
sa vairājam asṛjata tad agnerghoṣo 'nvasṛjyata
- 12
स शक्वरीर् असृजत तद् अपां घोषो ऽन्वसृज्यत
sa śakvarīr asṛjata tad apāṃ ghoṣo 'nvasṛjyata
- 13
स रेवतीर् असृजत तद्गवां घोषो ऽन्वसृज्यत
sa revatīr asṛjata tadgavāṃ ghoṣo 'nvasṛjyata
- 14
एतैर्वा एतानि सह घोषैर् असृज्यन्त
etairvā etāni saha ghoṣair asṛjyanta
- 15
सर्वे ऽस्मिन्घोषाः सर्वाः पुण्या वाचो वदन्ति य एवं वेद
sarve 'sminghoṣāḥ sarvāḥ puṇyā vāco vadanti ya evaṃ veda

