11 shlokas
- 1
अभि त्वा शूर नोनुम इत्य् अभीति रथन्तरस्य रूपं रथन्तरं ह्य् एतद् अहः
abhi tvā śūra nonuma ity abhīti rathantarasya rūpaṃ rathantaraṃ hy etad ahaḥ
- 2
कया नश्चित्र आभुवद् इति कवत्यस्तेन प्राजापत्याः को हि प्रजापतिः प्रजापतेर् आप्त्यै
kayā naścitra ābhuvad iti kavatyastena prājāpatyāḥ ko hi prajāpatiḥ prajāpater āptyai
- 3
तं वो दस्मम् ऋतीषहं वसोर्मन्दानम् अन्धसो ऽभिवत्सं न स्वसरेषु धेनव इत्य् अभीति रथन्तरस्य रूपं रथन्तरं ह्य् एतद् अहः
taṃ vo dasmam ṛtīṣahaṃ vasormandānam andhaso 'bhivatsaṃ na svasareṣu dhenava ity abhīti rathantarasya rūpaṃ rathantaraṃ hy etad ahaḥ
- 4
इन्द्रं गीर्भिर्हवामह इति हवन्त एवैनम्
indraṃ gīrbhirhavāmaha iti havanta evainam
- 5
तरोभिर्वो विदद्वसुम् इति स्तोमो वै तरो यज्ञो विदद्वसुः स्तोमेन वै यज्ञो युज्यते यत्तरोभिर्वो विदद्वसुम् इत्य् आह यज्ञम् एव तद्युनक्ति
tarobhirvo vidadvasum iti stomo vai taro yajño vidadvasuḥ stomena vai yajño yujyate yattarobhirvo vidadvasum ity āha yajñam eva tadyunakti
- 6
रथन्तरं भवति ब्रह्म वै रथन्तरं ब्रह्म प्रायणीयम् अहर्ब्रह्मण एव तद्ब्रह्माक्रम्य प्रयन्ति
rathantaraṃ bhavati brahma vai rathantaraṃ brahma prāyaṇīyam aharbrahmaṇa eva tadbrahmākramya prayanti
- 7
इयं वै रथन्तरम् अस्याम् एव प्रतिष्ठाय सत्त्रम् आसते
iyaṃ vai rathantaram asyām eva pratiṣṭhāya sattram āsate
- 8
वामदेव्यं भवति पशवो वै वामदेव्यं पशूनाम् अवरुद्ध्यै प्राजापत्यं वै वामदेव्यं प्रजापताव् एव प्रतिष्ठाय सत्त्रम् आसते
vāmadevyaṃ bhavati paśavo vai vāmadevyaṃ paśūnām avaruddhyai prājāpatyaṃ vai vāmadevyaṃ prajāpatāv eva pratiṣṭhāya sattram āsate
- 9
नौधसं भवति ब्रह्म वै नौधसं ब्रह्म प्रायणीयम् अहर्ब्रह्मण एव तद्ब्रह्माक्रमन्ते
naudhasaṃ bhavati brahma vai naudhasaṃ brahma prāyaṇīyam aharbrahmaṇa eva tadbrahmākramante
- 10
कालेयं भवति समानलोके वै कालेयं च रथन्तरं चेयं वै रथन्तरं पशवः कालेयम् अस्यां चैव पशुषु च प्रतिष्ठाय सत्त्रम् आसते
kāleyaṃ bhavati samānaloke vai kāleyaṃ ca rathantaraṃ ceyaṃ vai rathantaraṃ paśavaḥ kāleyam asyāṃ caiva paśuṣu ca pratiṣṭhāya sattram āsate
- 11
द्रवदिडं तथा ह्य् एतस्याह्नो रूपं स्तोमः
dravadiḍaṃ tathā hy etasyāhno rūpaṃ stomaḥ

