241 shlokas
- 1
एवं स निवसंस्तत्र वत्सेशस्य पितुर्गृहे
गोमुखाद्यैः स्वसचिवैः सेव्यमानो ऽनुरागिभिः
evaṃ sa nivasaṃstatra vatseśasya piturgṛhe
gomukhādyaiḥ svasacivaiḥ sevyamāno 'nurāgibhiḥ
- 2
विहरंश्चाप्य् अलंकारवत्या देव्यानुरक्तया
मानविघ्नासहोद्गाढतत्प्रेममुषितेर्ष्यया
viharaṃścāpy alaṃkāravatyā devyānuraktayā
mānavighnāsahodgāḍhatatpremamuṣiterṣyayā
- 3
नरवाहनदत्तो ऽथ कदाचिन्मृगकाननम्
जगाम रथमारुह्य पश्चादारूढगोमुखः
naravāhanadatto 'tha kadācinmṛgakānanam
jagāma rathamāruhya paścādārūḍhagomukhaḥ
- 4
प्रलम्बबाहौ तस्मिंश्च विप्रवीरे ऽग्रयायिनि
चकाराखेटकक्रीडां स तत्र सहितो ऽनुगैः
pralambabāhau tasmiṃśca vipravīre 'grayāyini
cakārākheṭakakrīḍāṃ sa tatra sahito 'nugaiḥ
- 5
सर्वप्राणेन धावत्सु रथाश्वेष्वपि तस्य सः
प्रलम्बबाहुस्तद्वेगं विजित्य पुरतो ययौ
sarvaprāṇena dhāvatsu rathāśveṣvapi tasya saḥ
pralambabāhustadvegaṃ vijitya purato yayau
- 6
सो ऽवधीत्सायकैः सिंहव्याघ्रादीन्स्यन्दने स्थितः
प्रलम्बबाहुस्त्वसिना पादचारी जघान तान्
so 'vadhītsāyakaiḥ siṃhavyāghrādīnsyandane sthitaḥ
pralambabāhustvasinā pādacārī jaghāna tān
- 7
अहो शौर्यमहो जङ्घाजवो ऽस्येति विसिस्मिये
नरवाहनदत्तश्च दृष्ट्वा दृष्ट्वा स तं द्विजम्
aho śauryamaho jaṅghājavo 'syeti visismiye
naravāhanadattaśca dṛṣṭvā dṛṣṭvā sa taṃ dvijam
- 8
कृताखेटः परिश्रान्तः स ससारथिगोमुखः
प्रलम्बबाहौ सुभटे तस्मिन्नग्रसरे ततः
kṛtākheṭaḥ pariśrāntaḥ sa sasārathigomukhaḥ
pralambabāhau subhaṭe tasminnagrasare tataḥ
- 9
रथारूढस्तृषाक्रान्तः सलिलान्वेषणक्रमात्
वत्सेश्वरात्मजो दूरं विवेशान्यन्महावनम्
rathārūḍhastṛṣākrāntaḥ salilānveṣaṇakramāt
vatseśvarātmajo dūraṃ viveśānyanmahāvanam
- 10
तत्रोत्फुल्लहिरण्याब्जं दिव्यं प्राप महत्सरः
द्वितीयम् इव बह्वर्कबिम्बं भूमिगतं नभः
tatrotphullahiraṇyābjaṃ divyaṃ prāpa mahatsaraḥ
dvitīyam iva bahvarkabimbaṃ bhūmigataṃ nabhaḥ
- 11
तत्र स स्नातपीताम्भाः कृतस्नानादिसानुगः
तदेकदेशे चतुरो दूरादैक्षत पूरुषान्
tatra sa snātapītāmbhāḥ kṛtasnānādisānugaḥ
tadekadeśe caturo dūrādaikṣata pūruṣān
- 12
दिव्याकृतीन्दिव्यवस्त्रान्दिव्याभरणभूषितान्
हेमाम्बुजानि सरसस्तस्मादुच्चित्य गृह्णतः
divyākṛtīndivyavastrāndivyābharaṇabhūṣitān
hemāmbujāni sarasastasmāduccitya gṛhṇataḥ
- 13
उपागात्कौतुकात्तांश्च पृष्टः को ऽसीति तैर् अपि
अन्वयं नाम वृत्तान्तं निजं तेभ्यः शशंस सः
upāgātkautukāttāṃśca pṛṣṭaḥ ko 'sīti tair api
anvayaṃ nāma vṛttāntaṃ nijaṃ tebhyaḥ śaśaṃsa saḥ
- 14
ते ऽप्येवं दर्शनप्रीताः पृष्टवन्तं तमब्रुवन्
अस्ति मध्ये महाम्भोधेः श्रीमद्द्वीपवरं महत्
te 'pyevaṃ darśanaprītāḥ pṛṣṭavantaṃ tamabruvan
asti madhye mahāmbhodheḥ śrīmaddvīpavaraṃ mahat
- 15
यन्नारिकेलद्वीपाख्यं ख्यातं जगति सुन्दरम्
तत्र सन्ति च चत्वारः पर्वता दिव्यभूमयः
yannārikeladvīpākhyaṃ khyātaṃ jagati sundaram
tatra santi ca catvāraḥ parvatā divyabhūmayaḥ
- 16
मैनाको वृषभश्चक्रो बलाहक इति स्मृताः
चतुर्षु तेषु चत्वारो निवसाम इमे वयम्
maināko vṛṣabhaścakro balāhaka iti smṛtāḥ
caturṣu teṣu catvāro nivasāma ime vayam
- 17
एको ऽस्माकं रूपसिद्धिर्नाम्ना विविधरूपधृत्
प्रमाणसिद्धिरपरो बृहत्सूक्ष्मप्रमाणदृक्
eko 'smākaṃ rūpasiddhirnāmnā vividharūpadhṛt
pramāṇasiddhiraparo bṛhatsūkṣmapramāṇadṛk
- 18
ज्ञानसिद्धिस्तृतीयश्च भविष्यद्भूतभाव्यवित्
देवसिद्धिश्चतुर्थो ऽपि सर्वदैवतसिद्धिभृत्
jñānasiddhistṛtīyaśca bhaviṣyadbhūtabhāvyavit
devasiddhiścaturtho 'pi sarvadaivatasiddhibhṛt
- 19
ते वयं हेमकमलान्येतान्यादाय सांप्रतम्
देवं पूजयितुं यामः श्वेतद्वीपे श्रियः पतिम्
te vayaṃ hemakamalānyetānyādāya sāṃpratam
devaṃ pūjayituṃ yāmaḥ śvetadvīpe śriyaḥ patim
- 20
तद्भक्ता हि वयं सर्वे तत्प्रसादेन चाद्रिषु
तेषु स्वेष्वाधिपत्यं नः सिद्धियुक्ताश्च संपदः
tadbhaktā hi vayaṃ sarve tatprasādena cādriṣu
teṣu sveṣvādhipatyaṃ naḥ siddhiyuktāśca saṃpadaḥ
- 21
तदेहि दर्शयामस्ते श्वेतद्वीपे हरिं प्रभुम्
नयामस्त्वन्तरिक्षेण यदि ते रोचते सखे
tadehi darśayāmaste śvetadvīpe hariṃ prabhum
nayāmastvantarikṣeṇa yadi te rocate sakhe
- 22
इत्य् उक्तवद्भिस्तैः साकं देवपुत्रैस्तथेति सः
नरवाहनदत्तो ऽत्र स्वाधीनाम्बुफलादिके
ity uktavadbhistaiḥ sākaṃ devaputraistatheti saḥ
naravāhanadatto 'tra svādhīnāmbuphalādike
- 23
गोमुखादीनवस्थाप्य श्वेतद्वीपं विहायसा
ययौ गृहीतः स्वोत्सङ्गे तन्मध्याद्देवसिद्धिना
gomukhādīnavasthāpya śvetadvīpaṃ vihāyasā
yayau gṛhītaḥ svotsaṅge tanmadhyāddevasiddhinā
- 24
तत्रावतीर्य गगनाद्दूराद् एवोपसृत्य च
पार्श्वस्थिताब्धितनयं पादान्तस्थवसुंधरम्
tatrāvatīrya gaganāddūrād evopasṛtya ca
pārśvasthitābdhitanayaṃ pādāntasthavasuṃdharam
- 25
शङ्खचक्रगदापद्मैः सेव्यमानं सविग्रहैः
भक्त्योपगीयमानं च गन्धर्वैर्नारदादिभिः
śaṅkhacakragadāpadmaiḥ sevyamānaṃ savigrahaiḥ
bhaktyopagīyamānaṃ ca gandharvairnāradādibhiḥ
- 26
प्रणम्यमानं देवैश्च सिद्धैर्विद्याधरैस्तथा
अग्रोपविष्टगरुडं शेषशय्यागतं हरिम्
praṇamyamānaṃ devaiśca siddhairvidyādharaistathā
agropaviṣṭagaruḍaṃ śeṣaśayyāgataṃ harim
- 27
स ददर्श चतुर्भिस्तैः प्रापितो देवपुत्रकैः
कस्य नाभ्युदये हेतुर्भवेत्साधुसमागमः
sa dadarśa caturbhistaiḥ prāpito devaputrakaiḥ
kasya nābhyudaye heturbhavetsādhusamāgamaḥ
- 28
ततो ऽर्चितं देवपुत्रैः कश्यपाद्यैश्च संस्तुतम्
नरवाहनदत्तस्तमस्तौषीत्प्राञ्जलिः प्रभुम्
tato 'rcitaṃ devaputraiḥ kaśyapādyaiśca saṃstutam
naravāhanadattastamastauṣītprāñjaliḥ prabhum
- 29
नमो ऽस्तु तुभ्यं भगवन्भक्तकल्पमहीरुह
लक्ष्मीकल्पलताश्लिष्टवपुषे ऽभीष्टदायिने
namo 'stu tubhyaṃ bhagavanbhaktakalpamahīruha
lakṣmīkalpalatāśliṣṭavapuṣe 'bhīṣṭadāyine
- 30
नमस्ते दिव्यहंसाय सन्मानसनिवासिने
सततोदितनादाय पराकाशविहारिणे
namaste divyahaṃsāya sanmānasanivāsine
satatoditanādāya parākāśavihāriṇe

