409 shlokas
- 1
ततो ऽलंकारवत्या स युक्तो वत्सेश्वरात्मजः
नरवाहनदत्तो ऽत्र नववध्वा पितुर्गृहे
tato 'laṃkāravatyā sa yukto vatseśvarātmajaḥ
naravāhanadatto 'tra navavadhvā piturgṛhe
- 2
तच्चेटिकानां दिव्येन नृत्यगीतेन रञ्जितः
आपानं सेवमानश्च सचिवैः सह तस्थिवान्
tacceṭikānāṃ divyena nṛtyagītena rañjitaḥ
āpānaṃ sevamānaśca sacivaiḥ saha tasthivān
- 3
एकदा च तमागत्य सा श्वश्रूः काञ्चनप्रभा
अलंकारवतीमाता विहितातिथ्यम् अब्रवीत्
ekadā ca tamāgatya sā śvaśrūḥ kāñcanaprabhā
alaṃkāravatīmātā vihitātithyam abravīt
- 4
आगच्छास्मद्गृहं पश्य तत्सुन्दरपुरं पुरम्
रमस्व तत्रोपवनेष्व् अलंकारवतीयुतः
āgacchāsmadgṛhaṃ paśya tatsundarapuraṃ puram
ramasva tatropavaneṣv alaṃkāravatīyutaḥ
- 5
एतच्छ्रुत्वा तथेत्य् उक्त्वा पितुरावेद्य तद्गिरा
वसन्तकं सहादाय वध्वा सह समन्त्रिकः
etacchrutvā tathety uktvā piturāvedya tadgirā
vasantakaṃ sahādāya vadhvā saha samantrikaḥ
- 6
श्वश्र्वा विद्याप्रभावेण तयैव स विनिर्मितम्
विमानवरमारुह्य प्रतस्थे व्योमवर्त्मना
śvaśrvā vidyāprabhāveṇa tayaiva sa vinirmitam
vimānavaramāruhya pratasthe vyomavartmanā
- 7
विमानस्थश्च गगनात्सो ऽधस्तात्प्रविलोकयन्
स्थलीपरिमितां पृथ्वीं समुद्रान्परिखालघून्
vimānasthaśca gaganātso 'dhastātpravilokayan
sthalīparimitāṃ pṛthvīṃ samudrānparikhālaghūn
- 9
श्वश्रूभार्यादिभिः साकं क्रमात्प्राप हिमाचलम्
नादितं किंनरीगीतैः स्वर्वधूसंघसुन्दरम्
śvaśrūbhāryādibhiḥ sākaṃ kramātprāpa himācalam
nāditaṃ kiṃnarīgītaiḥ svarvadhūsaṃghasundaram
- 10
तत्राश्चर्याणि सुबहून्येष पश्यन्नवाप्तवान्
नरवाहनदत्तो ऽथ तत्सुन्दरपुरं युवा
tatrāścaryāṇi subahūnyeṣa paśyannavāptavān
naravāhanadatto 'tha tatsundarapuraṃ yuvā
- 11
सौवर्णै रत्ननिचितैः प्रासादैर्हिमवत्यपि
सुमेरुशिखरभ्रान्तिं कुर्वद्भिर् उपशोभितम्
sauvarṇai ratnanicitaiḥ prāsādairhimavatyapi
sumeruśikharabhrāntiṃ kurvadbhir upaśobhitam
- 12
व्योमावतीर्णश्चोत्तीर्य विमानात्प्रविवेश तत्
सानाथ्यदर्शनान्नृत्यदिव लोलैर्ध्वजांशुकैः
vyomāvatīrṇaścottīrya vimānātpraviveśa tat
sānāthyadarśanānnṛtyadiva lolairdhvajāṃśukaiḥ
- 13
प्रविशद्राजधानीं च स श्वश्र्वा कृतमङ्गलः
अलंकारवतीयुक्तः सवयस्यवसन्तकः
praviśadrājadhānīṃ ca sa śvaśrvā kṛtamaṅgalaḥ
alaṃkāravatīyuktaḥ savayasyavasantakaḥ
- 14
तत्र तं दिवसं दिव्यैर्भोगैः श्वश्रूप्रभावजैः
उवास सुकृती स्वर्ग इव श्वशुरवेश्मनि
tatra taṃ divasaṃ divyairbhogaiḥ śvaśrūprabhāvajaiḥ
uvāsa sukṛtī svarga iva śvaśuraveśmani
- 15
अन्येद्युस्तं च सा श्वश्रूर् अवोचत्काञ्चनप्रभा
अस्ति स्वयंभूर्भगवान्नगरे ऽस्मिन्नुमापतिः
anyedyustaṃ ca sā śvaśrūr avocatkāñcanaprabhā
asti svayaṃbhūrbhagavānnagare 'sminnumāpatiḥ
- 16
स दृष्टपूजितो भोगं मोक्षं चैव प्रयच्छति
अलंकारवतीपित्रा तत्रोद्यानं कृतं महत्
sa dṛṣṭapūjito bhogaṃ mokṣaṃ caiva prayacchati
alaṃkāravatīpitrā tatrodyānaṃ kṛtaṃ mahat
- 17
तीर्थं गङ्गासरःसंज्ञमन्वर्थं चावतारितम्
तं तत्रार्चयितुं देवं विहर्तुं चाद्य गच्छत
tīrthaṃ gaṅgāsaraḥsaṃjñamanvarthaṃ cāvatāritam
taṃ tatrārcayituṃ devaṃ vihartuṃ cādya gacchata
- 18
एवं श्वश्र्वा तयोक्तस्तु शार्वोद्यानं सहानुगः
नरवाहनदत्तो ऽगादलंकारवतीसखः
evaṃ śvaśrvā tayoktastu śārvodyānaṃ sahānugaḥ
naravāhanadatto 'gādalaṃkāravatīsakhaḥ
- 19
तरुभिः काञ्चनस्कन्धै रत्नशाखामनोरमैः
मुक्तागुच्छाच्छकुसुमैः कान्तं विद्रुमपल्लवैः
tarubhiḥ kāñcanaskandhai ratnaśākhāmanoramaiḥ
muktāgucchācchakusumaiḥ kāntaṃ vidrumapallavaiḥ
- 20
तत्र गङ्गासरःस्नातः पूजितोमापतिश्च सः
बभ्राम रत्नसोपाना वापीः काञ्चनपङ्कजाः
tatra gaṅgāsaraḥsnātaḥ pūjitomāpatiśca saḥ
babhrāma ratnasopānā vāpīḥ kāñcanapaṅkajāḥ
- 21
तासां तीरेषु हृद्येषु कल्पवल्लिगृहेषु च
सहालंकारवत्या स विजहारानुगान्वितः
tāsāṃ tīreṣu hṛdyeṣu kalpavalligṛheṣu ca
sahālaṃkāravatyā sa vijahārānugānvitaḥ
- 22
दिव्यैर् आपानसंगीतैः परिहासैश्च पेशलैः
मरुभूत्यार्जवकृतै रमते स्म च तेषु सः
divyair āpānasaṃgītaiḥ parihāsaiśca peśalaiḥ
marubhūtyārjavakṛtai ramate sma ca teṣu saḥ
- 23
मासमात्रम् उवासैवं क्रीडन्नुद्यानभूमिषु
नरवाहनदत्तो ऽत्र श्वश्रूविद्याविभूतिभिः
māsamātram uvāsaivaṃ krīḍannudyānabhūmiṣu
naravāhanadatto 'tra śvaśrūvidyāvibhūtibhiḥ
- 24
ततो देवोचितैर्वस्त्रैर् अलंकारैश्च पूजितः
सवधूकः सहामात्यः काञ्चनप्रभया तया
tato devocitairvastrair alaṃkāraiśca pūjitaḥ
savadhūkaḥ sahāmātyaḥ kāñcanaprabhayā tayā
- 25
आययौ स विमानेन तेनैव सह सानुगः
कौशाम्बीं सहितो वध्वा पित्रोर्दत्तेक्षणोत्सवः
āyayau sa vimānena tenaiva saha sānugaḥ
kauśāmbīṃ sahito vadhvā pitrordattekṣaṇotsavaḥ
- 26
तत्र वासवदत्ताया वत्सराजस्य चाग्रतः
अलंकारवतीम् आह माता सा काञ्चनप्रभा
tatra vāsavadattāyā vatsarājasya cāgrataḥ
alaṃkāravatīm āha mātā sā kāñcanaprabhā
- 27
दुःखं स्थाप्यस्त्वया भर्ता नेर्ष्याकोपेन जातुचित्
तत्पापजो हि विरहः पुत्रि गाढानुतापकृत्
duḥkhaṃ sthāpyastvayā bhartā nerṣyākopena jātucit
tatpāpajo hi virahaḥ putri gāḍhānutāpakṛt
- 28
ईर्ष्यावत्या मया पूर्वं दुःखं यत्स्थापितः पतिः
ततो ऽद्य पश्चात्तापेन दह्ये तस्मिन्गते वनम्
īrṣyāvatyā mayā pūrvaṃ duḥkhaṃ yatsthāpitaḥ patiḥ
tato 'dya paścāttāpena dahye tasmingate vanam
- 29
इत्य् उक्त्वा तां समाश्लिष्य बाष्पसंरुद्धनेत्रया
काञ्चनप्रभया जग्मे खमुत्पत्य निजं पुरम्
ity uktvā tāṃ samāśliṣya bāṣpasaṃruddhanetrayā
kāñcanaprabhayā jagme khamutpatya nijaṃ puram
- 30
ततस्तस्मिन्दिने याते प्रातः कृत्वोचिताः क्रियाः
नरवाहनदत्ते ऽत्र स्थिते स्वसचिवान्विते
tatastasmindine yāte prātaḥ kṛtvocitāḥ kriyāḥ
naravāhanadatte 'tra sthite svasacivānvite
- 31
अलंकारवतीपार्श्वं प्रविश्यैव विलासिनी
एकाब्रवीद्भीतभीता देवि स्त्रीं रक्ष रक्ष माम्
alaṃkāravatīpārśvaṃ praviśyaiva vilāsinī
ekābravīdbhītabhītā devi strīṃ rakṣa rakṣa mām

