230 shlokas
- 1
योगं स्वप्ने ऽपि नेच्छन्ति कुर्वते न करग्रहम्
महन्तो नाममात्रेण भवन्ति पतयो भुवः
yogaṃ svapne 'pi necchanti kurvate na karagraham
mahanto nāmamātreṇa bhavanti patayo bhuvaḥ
- 2
सकलमहीभृत्कम्पकृद् उत्पद्यत एक एव नृपवंशे
विपुले ऽपि पृथुप्रतिमो दन्त इव गणाधिपस्य मुखे
sakalamahībhṛtkampakṛd utpadyata eka eva nṛpavaṃśe
vipule 'pi pṛthupratimo danta iva gaṇādhipasya mukhe
- 3
अथ तस्मात्पुष्पभूतेर्द्विजवरस्वेच्छागृहीतकोषो नाभिपद्म इव पुण्डरीकेक्षणात्लक्ष्मीपुरःसरो रत्नसंचय इव रत्नाकरात्गुरुबुधकविकलाभृत्तेजस्विभूनन्दनप्रायो ग्रहगण इवोदयस्थानात्महाभारवाहनयोग्यः सागर इव सगरप्रभावात्दुर्जयबलसनाथो हरिवंश इव शूरान्निर्जगाम राजवंशः
atha tasmātpuṣpabhūterdvijavarasvecchāgṛhītakoṣo nābhipadma iva puṇḍarīkekṣaṇātlakṣmīpuraḥsaro ratnasaṃcaya iva ratnākarātgurubudhakavikalābhṛttejasvibhūnandanaprāyo grahagaṇa ivodayasthānātmahābhāravāhanayogyaḥ sāgara iva sagaraprabhāvātdurjayabalasanātho harivaṃśa iva śūrānnirjagāma rājavaṃśaḥ
- 4
यस्माद् अविनष्टधर्मधवलाः प्रजासर्गा इव कृतमुखात्प्रतापाक्रान्तभुवनाः किरणा इव तेजोनिधेः विग्रहव्याप्तिदिङ्मुखा गिरय इव भूभृत्प्रवरात्धरणिधारणक्षमा दिग्गजा इव ब्रह्मकरात् उदधीन्पातुम् उद्यता जलधरा इव घनागमात् इच्छाफलदायिनः कल्पतरव इव नन्दनात्सर्वभूताश्रया विश्वरूपप्रकारा इव श्रीधराद् अजायन्त राजानः
yasmād avinaṣṭadharmadhavalāḥ prajāsargā iva kṛtamukhātpratāpākrāntabhuvanāḥ kiraṇā iva tejonidheḥ vigrahavyāptidiṅmukhā giraya iva bhūbhṛtpravarātdharaṇidhāraṇakṣamā diggajā iva brahmakarāt udadhīnpātum udyatā jaladharā iva ghanāgamāt icchāphaladāyinaḥ kalpatarava iva nandanātsarvabhūtāśrayā viśvarūpaprakārā iva śrīdharād ajāyanta rājānaḥ
- 5
तेषु चैवम् उत्पद्यमानेषु क्रमेणोदपादि हूणहरिणकेसरी सिन्धुराजज्वरो गुर्जरप्रजागरो गान्धाराधिपगन्धद्विपकूटपाकलो लाटपाटवपाटच्चरो मालवलक्ष्मीलतापरशुः प्रतापशील इति प्रथितापरनामा प्रभाकरवर्धनो नाम राजाधिराजः
teṣu caivam utpadyamāneṣu krameṇodapādi hūṇahariṇakesarī sindhurājajvaro gurjaraprajāgaro gāndhārādhipagandhadvipakūṭapākalo lāṭapāṭavapāṭaccaro mālavalakṣmīlatāparaśuḥ pratāpaśīla iti prathitāparanāmā prabhākaravardhano nāma rājādhirājaḥ
- 6
यो राज्याङ्गसङ्गीन्य् अभिषिच्यमान एव मलानीव मुमोच धनानि
yo rājyāṅgasaṅgīny abhiṣicyamāna eva malānīva mumoca dhanāni
- 7
यः परकीयेनापि कातरवल्लभेन रणमुखे तृणेनेव धृतेनालज्जत जीवितेन
yaḥ parakīyenāpi kātaravallabhena raṇamukhe tṛṇeneva dhṛtenālajjata jīvitena
- 8
यः करधृतधौतासिप्रतिबिम्बितेनात्मनाप्य् अदूयत समितिषु सहायेन रिपूणां पुरः प्रधनेषु धनुषापि नमता
यो मानी मानसेनाखिद्यत
yaḥ karadhṛtadhautāsipratibimbitenātmanāpy adūyata samitiṣu sahāyena ripūṇāṃ puraḥ pradhaneṣu dhanuṣāpi namatā
yo mānī mānasenākhidyata
- 9
यश्चान्तर्गतापरिमितरिपुशस्त्रशल्यशङ्कुकीलिताम् इव निश्चलाम् उवाह राजलक्ष्मीम्
yaścāntargatāparimitaripuśastraśalyaśaṅkukīlitām iva niścalām uvāha rājalakṣmīm
- 10
यश्च सर्वासु दिक्षु समीकृततटावटविटपाटवीतरुतृणगुल्मवल्मीकगिरिगहनैर्दण्डयात्रापथैः पृथुभिर्भृत्योपयोगाय व्यभजतेव वसुधां बहुधा
yaśca sarvāsu dikṣu samīkṛtataṭāvaṭaviṭapāṭavītarutṛṇagulmavalmīkagirigahanairdaṇḍayātrāpathaiḥ pṛthubhirbhṛtyopayogāya vyabhajateva vasudhāṃ bahudhā
- 11
यं चालब्धयुद्धदोहदम् आत्मीयो ऽपि सकलरिपुसमुत्सारकः परकीय इव तताप प्रतापः
yaṃ cālabdhayuddhadohadam ātmīyo 'pi sakalaripusamutsārakaḥ parakīya iva tatāpa pratāpaḥ
- 12
यस्य च वह्निमयो हृदयेषु जलमयो लोचनपुटेषु मारुतमयो निःश्वसितेषु क्षमामयो ऽङ्गेषु आकाशमयः शून्यतायां पञ्चमहाभूतमयो मूर्त इवादृश्यत निहतप्रतिसामन्तान्तःपुरेषु प्रतापः
yasya ca vahnimayo hṛdayeṣu jalamayo locanapuṭeṣu mārutamayo niḥśvasiteṣu kṣamāmayo 'ṅgeṣu ākāśamayaḥ śūnyatāyāṃ pañcamahābhūtamayo mūrta ivādṛśyata nihatapratisāmantāntaḥpureṣu pratāpaḥ
- 13
यस्य चासन्नेषु भृत्यरत्नेषु प्रतिबिम्बितेव तुल्यरूपा समलक्ष्यत लक्ष्मीः
yasya cāsanneṣu bhṛtyaratneṣu pratibimbiteva tulyarūpā samalakṣyata lakṣmīḥ
- 14
तथा च यस्य प्रतापाग्निना भूतिः शौर्योष्मणा सिद्धिः असिधाराजलेन वंशवृद्धिः शस्त्रव्रणमुखैः पुरुषकारोक्तिः धनुर्गुणकिणेन करगृहीतिर् अभवत्
tathā ca yasya pratāpāgninā bhūtiḥ śauryoṣmaṇā siddhiḥ asidhārājalena vaṃśavṛddhiḥ śastravraṇamukhaiḥ puruṣakāroktiḥ dhanurguṇakiṇena karagṛhītir abhavat
- 15
यश्च वैरम् उपायनं विग्रहम् अनुग्रहं समरागमं महोत्सवं शत्रुं निधिदर्शनम् अरिबाहुल्यम् अभ्युदयम् आहवाह्वानं वरप्रदानम् अवस्कन्दपातं दिष्टवृद्धिं शस्त्रप्रहारपतनं वसुधारारसम् अमन्यत
yaśca vairam upāyanaṃ vigraham anugrahaṃ samarāgamaṃ mahotsavaṃ śatruṃ nidhidarśanam aribāhulyam abhyudayam āhavāhvānaṃ varapradānam avaskandapātaṃ diṣṭavṛddhiṃ śastraprahārapatanaṃ vasudhārārasam amanyata
- 16
यस्मिंश्च राजनि निरन्तरैर्यूपनिकरैर् अङ्कुरितम् इव कृतयुगेन दिङ्मुखविसर्पिभिर् अध्वरधूमैः पलायितम् इव कलिना ससुधैः सुरालयैर् अवतीर्णम् इव स्वर्गेण सुरालयशिखरोद्धूयमानैर्धवलध्वजैः पल्लवितम् इव धर्मेण बहिरुपरचितविकटसभासत्रप्रपाप्राग्वंशमण्डपैः प्रसूतम् इव ग्रामैः काञ्चनमयसर्वोपकरणैर्विभवैर्विशीर्णम् इव मेरुणा द्विजदीयमानैर् अर्थकलशैः फलितम् इव भाग्यसंपदा
yasmiṃśca rājani nirantarairyūpanikarair aṅkuritam iva kṛtayugena diṅmukhavisarpibhir adhvaradhūmaiḥ palāyitam iva kalinā sasudhaiḥ surālayair avatīrṇam iva svargeṇa surālayaśikharoddhūyamānairdhavaladhvajaiḥ pallavitam iva dharmeṇa bahiruparacitavikaṭasabhāsatraprapāprāgvaṃśamaṇḍapaiḥ prasūtam iva grāmaiḥ kāñcanamayasarvopakaraṇairvibhavairviśīrṇam iva meruṇā dvijadīyamānair arthakalaśaiḥ phalitam iva bhāgyasaṃpadā
- 17
तस्य च जन्मान्तरे ऽपि सती पार्वतीव शङ्करस्य गृहीतपरहृदया लक्ष्मीर् इव लोकगुरोः स्फुरत्तरलतारका रोहिणीव कलावतः सर्वजनजननी बुद्धिर् इव प्रजापतेः महाभूभृत्कुलोद्गता गङ्गेव वाहिनीनायकस्य मानसानुवर्तनचतुरा हंसीव राजहंसस्य सकललोकार्चितचरणा त्रयीव धर्मस्य दिवानिशम् अमुक्तपार्श्वस्थितिर् अरुन्धतीव महामुनेर्हंसमयीव गतिषु परपुष्टमयीवालापेषु चक्रवाकमयीव पतिप्रेम्णि प्रावृण्मयीव पयोधरोन्नतौ मदिरामयीव विलासेषु निधिमयीवार्थसंचयेषु वसुधारामयीव प्रसादेषु कमलमयीव कोशसंग्रहेषु कुसुममयीव फलदानेषु संध्यामयीव वन्द्यत्वे चन्द्रमयीव निरूष्मत्वे दर्पणमयीव प्रतिप्राणिग्रहणेषु सामुद्रमयीव परचित्तज्ञानेषु परमात्ममयीव व्याप्तिषु स्मृतिमयीव पुण्यवृत्तिषु मधुमयीव संभाषणेषु अमृतमयीव तृष्यत्सु वृष्टिमयीव भृत्येषु निर्वृतिमयीव सखीषु वेतसमयीव गुरुषु गोत्रवृद्धिर् इव विलासानाम्प्रायश्चित्तशुद्धिर् इव स्त्रीत्वस्य आज्ञासिद्धिर् इव मकरध्वजस्य व्युत्थानबुद्धिर् इव रूपस्य दिष्टवृद्धिर् इव रतेः मनोरथसिद्धिर् इव रामणीयकस्य दैवसंपत्तिर् इव लावण्यस्य वंशोत्पत्तिर् इवानुरागस्य वरप्राप्तिर् इव सौभाग्यस्य उत्पत्तिभूमिर् इव कान्तेः सर्गसमाप्तिर् इव सौन्दर्यस्य आयतिर् इव यौवनस्य अनभ्रवृष्टिर् इव वैदग्ध्यस्य अयशःप्रमृष्टिर् इव लक्ष्म्याः यशःपुष्टिर् इव चारित्रस्य हृदयतुष्टिर् इव धर्मस्य सौभाग्यपरमाणुसृष्टिर् इव प्रजापतेः शमस्यापि शान्तिर् इव विनयस्यापि विनीतिर् इव आभिजात्यस्याप्य् अभिजातिर् इव संयमस्यापि संयतिर् इव धैर्यस्यापि धृतिर् इव विभ्रमस्यापि विभ्रान्तिर् इव यशोमती नाम महादेवी प्राणानां प्रणयस्य विस्रम्भस्य धर्मस्य सुखस्य च भूमिर् अभूत्
tasya ca janmāntare 'pi satī pārvatīva śaṅkarasya gṛhītaparahṛdayā lakṣmīr iva lokaguroḥ sphurattaralatārakā rohiṇīva kalāvataḥ sarvajanajananī buddhir iva prajāpateḥ mahābhūbhṛtkulodgatā gaṅgeva vāhinīnāyakasya mānasānuvartanacaturā haṃsīva rājahaṃsasya sakalalokārcitacaraṇā trayīva dharmasya divāniśam amuktapārśvasthitir arundhatīva mahāmunerhaṃsamayīva gatiṣu parapuṣṭamayīvālāpeṣu cakravākamayīva patipremṇi prāvṛṇmayīva payodharonnatau madirāmayīva vilāseṣu nidhimayīvārthasaṃcayeṣu vasudhārāmayīva prasādeṣu kamalamayīva kośasaṃgraheṣu kusumamayīva phaladāneṣu saṃdhyāmayīva vandyatve candramayīva nirūṣmatve darpaṇamayīva pratiprāṇigrahaṇeṣu sāmudramayīva paracittajñāneṣu paramātmamayīva vyāptiṣu smṛtimayīva puṇyavṛttiṣu madhumayīva saṃbhāṣaṇeṣu amṛtamayīva tṛṣyatsu vṛṣṭimayīva bhṛtyeṣu nirvṛtimayīva sakhīṣu vetasamayīva guruṣu gotravṛddhir iva vilāsānāmprāyaścittaśuddhir iva strītvasya ājñāsiddhir iva makaradhvajasya vyutthānabuddhir iva rūpasya diṣṭavṛddhir iva rateḥ manorathasiddhir iva rāmaṇīyakasya daivasaṃpattir iva lāvaṇyasya vaṃśotpattir ivānurāgasya varaprāptir iva saubhāgyasya utpattibhūmir iva kānteḥ sargasamāptir iva saundaryasya āyatir iva yauvanasya anabhravṛṣṭir iva vaidagdhyasya ayaśaḥpramṛṣṭir iva lakṣmyāḥ yaśaḥpuṣṭir iva cāritrasya hṛdayatuṣṭir iva dharmasya saubhāgyaparamāṇusṛṣṭir iva prajāpateḥ śamasyāpi śāntir iva vinayasyāpi vinītir iva ābhijātyasyāpy abhijātir iva saṃyamasyāpi saṃyatir iva dhairyasyāpi dhṛtir iva vibhramasyāpi vibhrāntir iva yaśomatī nāma mahādevī prāṇānāṃ praṇayasya visrambhasya dharmasya sukhasya ca bhūmir abhūt
- 18
यास्य वक्षसि नरकजितो लक्ष्मीर् इव ललास
yāsya vakṣasi narakajito lakṣmīr iva lalāsa
- 19
निसर्गत एव च स नृपतिर् आदित्यभक्तो बभूव
nisargata eva ca sa nṛpatir ādityabhakto babhūva
- 20
प्रतिदिनम् उदये दिनकृतः स्नातः सितदुकूलधारी धवलकर्पटप्रावृतशिराः प्राङ्मुखः क्षितौ जानुभ्यां स्थित्वा कुङ्कुमपङ्कानुलिप्ते मण्डलके पवित्रपद्मरागपात्रीनिहितेन स्वहृदयेनेव सूर्यानुरक्तेन रक्तकमलषण्डेनार्घं ददौ
pratidinam udaye dinakṛtaḥ snātaḥ sitadukūladhārī dhavalakarpaṭaprāvṛtaśirāḥ prāṅmukhaḥ kṣitau jānubhyāṃ sthitvā kuṅkumapaṅkānulipte maṇḍalake pavitrapadmarāgapātrīnihitena svahṛdayeneva sūryānuraktena raktakamalaṣaṇḍenārghaṃ dadau
- 21
अजपच्च जप्यं सुचरितः प्रत्युषसि मध्यन्दिने दिनान्ते चापत्यहेतोः प्राध्वं प्रयतेन मनसा जञ्जपूको मन्त्रम् आदित्यहृदयम्
ajapacca japyaṃ sucaritaḥ pratyuṣasi madhyandine dinānte cāpatyahetoḥ prādhvaṃ prayatena manasā jañjapūko mantram ādityahṛdayam
- 22
भक्तजनानुरोधविधेयानि तु भवन्ति देवतानां मनांसि
bhaktajanānurodhavidheyāni tu bhavanti devatānāṃ manāṃsi
- 23
यतः स राजा कदाचिद्ग्रीष्मसमये यदृच्छया सितकरकरसितसुधाधवलस्य हर्म्यस्य पृष्ठे सुष्वाप
yataḥ sa rājā kadācidgrīṣmasamaye yadṛcchayā sitakarakarasitasudhādhavalasya harmyasya pṛṣṭhe suṣvāpa
- 24
वामपार्श्वे चास्य द्वितीयशयने देवी यशोमती शिश्ये
vāmapārśve cāsya dvitīyaśayane devī yaśomatī śiśye
- 25
परिणतप्रायायां तु श्यामायाम् आसन्नप्रभातवेलाविलुप्यमानलावण्ये लिलम्बिषमाणे सीदत्तेजसि तारकेश्वरे कराग्रस्पृष्टकुमुदिनीप्रमोदजन्मनि शशधरस्वेद इव गलत्य् अतिशीतले ऽवश्यायपयसि मधुमदमत्तप्रसुप्तसीमन्तिनीनिःश्वासाहतेषु संक्रान्तमदेष्व् इव घूर्णमानेष्व् अन्तःपुरप्रदीपेषु राजनि च विमलनखप्रतिबिम्बिताभिः संवाह्यमानचरण इव तारकाभिः विस्रब्धप्रसारितैर्दिगङ्गनानाम् इवार्पितैर् अङ्गैर्मधुसुगन्धिभिः स्वहस्तकमलतालवृन्तवातैर् इव श्वसितैर्मुखश्रिया वीज्यमाने विमलकपोलस्थलस्थितेन सितकुसुमशेखरेणेव रतिकेलिकचग्रहलम्बितेन प्रतिमाशशिबिम्बेन विराजिते स्वपति देवी यशोमती सहसैव आर्यपुत्र परित्रायस्व परित्रायस्व इति भाषमाणा भूषणरवेण व्याहरन्तीव परिजनम् उत्कम्पमानाङ्गयष्टिर् उदतिष्ठत्
pariṇataprāyāyāṃ tu śyāmāyām āsannaprabhātavelāvilupyamānalāvaṇye lilambiṣamāṇe sīdattejasi tārakeśvare karāgraspṛṣṭakumudinīpramodajanmani śaśadharasveda iva galaty atiśītale 'vaśyāyapayasi madhumadamattaprasuptasīmantinīniḥśvāsāhateṣu saṃkrāntamadeṣv iva ghūrṇamāneṣv antaḥpurapradīpeṣu rājani ca vimalanakhapratibimbitābhiḥ saṃvāhyamānacaraṇa iva tārakābhiḥ visrabdhaprasāritairdigaṅganānām ivārpitair aṅgairmadhusugandhibhiḥ svahastakamalatālavṛntavātair iva śvasitairmukhaśriyā vījyamāne vimalakapolasthalasthitena sitakusumaśekhareṇeva ratikelikacagrahalambitena pratimāśaśibimbena virājite svapati devī yaśomatī sahasaiva āryaputra paritrāyasva paritrāyasva iti bhāṣamāṇā bhūṣaṇaraveṇa vyāharantīva parijanam utkampamānāṅgayaṣṭir udatiṣṭhat
- 26
अथ तेन सर्वस्याम् अपि पृथिव्याम् अश्रुतपूर्वेण किम् उत देवीमुखे परित्रायस्वेति ध्वनिना दग्ध इव श्रवणयोर् एकपद एव निद्रां तत्याज राजा
atha tena sarvasyām api pṛthivyām aśrutapūrveṇa kim uta devīmukhe paritrāyasveti dhvaninā dagdha iva śravaṇayor ekapada eva nidrāṃ tatyāja rājā
- 27
शिरोभागाच्च कोपकम्पमानदक्षिणकराकृष्टेन कर्णोत्पलेनेव निर्गच्छताच्छधारेण धौतासिना सीमन्तयन्न् इव निशाम् अन्तरालव्यवधायकम् आकाशम् इवोत्तरीयांशुकं विक्षिपन्वामकरपल्लवेन करविक्षेपवेगगलितेन हृदयेनेव भयनिमित्तान्वेषिणा भ्रमता दिक्षु कनकवलयेन विराजमानः सत्वरावतारितवामचरणाक्रान्तिकम्पितप्रासादः पुरःपतितेनासिधारागोचरगतेन शशिमयूखखण्डेनेव खण्डितेन हारेण राजमानः लक्ष्मीचुम्बनलग्नताम्बूलरसरञ्जिताभ्याम् इव निद्रया कोपेन चातिलोहिताभ्यां लोचनाभ्यां पाटलयन्पर्यन्तान् आशानाम्बद्धान्धकारया त्रिपताकया भ्रुकुट्या पुनर् इव त्रियामां परिवर्तयन्देवि न भेतव्यं न भेतव्यम् इत्य् अभिदधानो वेगेनोत्पपात
śirobhāgācca kopakampamānadakṣiṇakarākṛṣṭena karṇotpaleneva nirgacchatācchadhāreṇa dhautāsinā sīmantayann iva niśām antarālavyavadhāyakam ākāśam ivottarīyāṃśukaṃ vikṣipanvāmakarapallavena karavikṣepavegagalitena hṛdayeneva bhayanimittānveṣiṇā bhramatā dikṣu kanakavalayena virājamānaḥ satvarāvatāritavāmacaraṇākrāntikampitaprāsādaḥ puraḥpatitenāsidhārāgocaragatena śaśimayūkhakhaṇḍeneva khaṇḍitena hāreṇa rājamānaḥ lakṣmīcumbanalagnatāmbūlarasarañjitābhyām iva nidrayā kopena cātilohitābhyāṃ locanābhyāṃ pāṭalayanparyantān āśānāmbaddhāndhakārayā tripatākayā bhrukuṭyā punar iva triyāmāṃ parivartayandevi na bhetavyaṃ na bhetavyam ity abhidadhāno vegenotpapāta
- 28
सर्वासु च दिक्षु विक्षिप्तचक्षुर्यदा नाद्राक्षीत्किंचिद् अपि तदा पप्रच्छ तां भयकारणम्
sarvāsu ca dikṣu vikṣiptacakṣuryadā nādrākṣītkiṃcid api tadā papraccha tāṃ bhayakāraṇam
- 29
अथ गृहदेवतास्व् इव प्रधावितासु यामिकिनीषु प्रबुद्धे च समीपशायिनि परिजने शान्ते च हृदयोत्कम्पकारिणि साध्वसे सा समभाषत आर्यपुत्र जानामि स्वप्ने भगवतः सवितुर्मण्डलान्निर्गत्य द्वौ कुमारकौ तेजोमयौ बालातपेनेवापूरयन्तौ दिग्भागान्वैद्युतम् इव जीवलोकं कुर्वाणौ मुकुटिनौ कुण्डलिनौ अङ्गदिनौ कवचिनौ गृहीतशस्त्रौ इन्द्रगोपकरुचा रुधिरेण स्नातौ उन्मुखेनोत्तमाङ्गघटमानाञ्जलिना जगता निखिलेन प्रणम्यमानौ कन्ययैकया च चन्द्रमूर्त्येव सुषुम्णरश्मिनिर्गतयानुगम्यमानौ क्षितितलम् अवतीर्णौ
atha gṛhadevatāsv iva pradhāvitāsu yāmikinīṣu prabuddhe ca samīpaśāyini parijane śānte ca hṛdayotkampakāriṇi sādhvase sā samabhāṣata āryaputra jānāmi svapne bhagavataḥ saviturmaṇḍalānnirgatya dvau kumārakau tejomayau bālātapenevāpūrayantau digbhāgānvaidyutam iva jīvalokaṃ kurvāṇau mukuṭinau kuṇḍalinau aṅgadinau kavacinau gṛhītaśastrau indragopakarucā rudhireṇa snātau unmukhenottamāṅgaghaṭamānāñjalinā jagatā nikhilena praṇamyamānau kanyayaikayā ca candramūrtyeva suṣumṇaraśminirgatayānugamyamānau kṣititalam avatīrṇau
- 30
तौ च मे विलपन्त्याः शस्त्रेणोदरं विदार्य प्रवेष्टुम् आरब्धौ
tau ca me vilapantyāḥ śastreṇodaraṃ vidārya praveṣṭum ārabdhau

