140 shlokas
- 1
अतिगम्भीरे भूपे कूप इव जनस्य निरवतारस्य
दधति समीहितसिद्धिं गुणवन्तः पार्थिवा घटकाः
atigambhīre bhūpe kūpa iva janasya niravatārasya
dadhati samīhitasiddhiṃ guṇavantaḥ pārthivā ghaṭakāḥ
- 2
रागिणि नलिने लक्ष्मीं दिवसो निदधाति दिनकरप्रभवाम्
अनपेक्षितगुणदोषः परोपकारः सतां व्यसनम्
rāgiṇi naline lakṣmīṃ divaso nidadhāti dinakaraprabhavām
anapekṣitaguṇadoṣaḥ paropakāraḥ satāṃ vyasanam
- 3
अथ तत्रानवरताध्ययनध्वनिमुखराणि भस्मपुण्ड्रकपाण्डुरललाटैः कपिलशिखाजालजटिलैः कृशानुभिरिव क्रतुलोभागतैर्बटुभिरध्यास्यमानानि सेकसुकुमारसोमकेदारिकाहरितायमानप्रघनानि कृष्णाजिनविकीर्णशुष्यत्पुरोडाशीयश्यामाकतण्डुलानि बालिकाविकीर्यमाणनीवारबलीनि शुचिशिष्यशतानीयमानहरितकुशपूलीपलाशसमिन्धि इन्धनगोमयपिण्डकूटसंकटानि आमिक्षीयक्षीरक्षारिणीनाम् अग्निहोत्रधेनूनां खुरवलयैर्विलिखिताजिरवितर्दिकानि कामण्डलव्यमृत्पिण्डमर्दनव्यग्रयतिजनानि वैतानवेदीशङ्कव्यानामौदुम्बरीणां शाखानां राशिभिः पवित्रितपर्यन्तानि वैश्वदेवपिण्डपाण्डुरितप्रदेशानि हविर्धूमधूसरिताङ्गणविटपिकिसलयानि वत्सीयबालकलालितललत्तरलतर्णकानि क्रीडत्कृष्णसारच्छागशावकप्रकटितपशुबन्धप्रबन्धानि शुकसारिकारब्धाध्ययनदीयमानोपाध्यायविश्रान्तिसुखानि साक्षात्त्रयीतपोवनानीव चिरदृष्टानां बान्धवानां प्रीयमाणो भ्रमन्भवनानि बाणः सुखमतिष्ठत्
atha tatrānavaratādhyayanadhvanimukharāṇi bhasmapuṇḍrakapāṇḍuralalāṭaiḥ kapilaśikhājālajaṭilaiḥ kṛśānubhiriva kratulobhāgatairbaṭubhiradhyāsyamānāni sekasukumārasomakedārikāharitāyamānapraghanāni kṛṣṇājinavikīrṇaśuṣyatpuroḍāśīyaśyāmākataṇḍulāni bālikāvikīryamāṇanīvārabalīni śuciśiṣyaśatānīyamānaharitakuśapūlīpalāśasamindhi indhanagomayapiṇḍakūṭasaṃkaṭāni āmikṣīyakṣīrakṣāriṇīnām agnihotradhenūnāṃ khuravalayairvilikhitājiravitardikāni kāmaṇḍalavyamṛtpiṇḍamardanavyagrayatijanāni vaitānavedīśaṅkavyānāmaudumbarīṇāṃ śākhānāṃ rāśibhiḥ pavitritaparyantāni vaiśvadevapiṇḍapāṇḍuritapradeśāni havirdhūmadhūsaritāṅgaṇaviṭapikisalayāni vatsīyabālakalālitalalattaralatarṇakāni krīḍatkṛṣṇasāracchāgaśāvakaprakaṭitapaśubandhaprabandhāni śukasārikārabdhādhyayanadīyamānopādhyāyaviśrāntisukhāni sākṣāttrayītapovanānīva ciradṛṣṭānāṃ bāndhavānāṃ prīyamāṇo bhramanbhavanāni bāṇaḥ sukhamatiṣṭhat
- 4
तत्रस्थस्य चास्य कदाचित्कुसुमसमययुगमुपसंहरन्नजृम्भत ग्रीष्माभिधानः समुत्फुल्लमल्लिकाधवलाट्टहासो महाकालः
tatrasthasya cāsya kadācitkusumasamayayugamupasaṃharannajṛmbhata grīṣmābhidhānaḥ samutphullamallikādhavalāṭṭahāso mahākālaḥ
- 5
प्रत्यग्रनिर्जितस्यास्तम् उपगतवतो वसन्तसामन्तस्य बालापत्येष्विव पयःपायिषु नवोद्यानेषु दर्शितस्नेहो मृदुरभूत्
pratyagranirjitasyāstam upagatavato vasantasāmantasya bālāpatyeṣviva payaḥpāyiṣu navodyāneṣu darśitasneho mṛdurabhūt
- 6
अभिनवोदितश्च सर्वस्यां पृथिव्यां सकलकुसुमबन्धनमोक्षमकरोत्प्रतपन्नुष्णसमयः
abhinavoditaśca sarvasyāṃ pṛthivyāṃ sakalakusumabandhanamokṣamakarotpratapannuṣṇasamayaḥ
- 7
स्वयमृतुराजस्याभिषेकार्द्राश्चामरकलापा इवागृह्यन्त कामिनीचिकुरचयाः कुसुमायुधेन हिमदग्धसकलकमलिनीकोपेनेव हिमालयाभिमुखीं यात्रामदादंशुमाली
svayamṛturājasyābhiṣekārdrāścāmarakalāpā ivāgṛhyanta kāminīcikuracayāḥ kusumāyudhena himadagdhasakalakamalinīkopeneva himālayābhimukhīṃ yātrāmadādaṃśumālī
- 8
अथ ललाटन्तपे तपति तपने चन्दनलिखितललाटिकापुण्ड्रकैर् अलकचीरचीवरसंवीतैः स्वेदोदबिन्दुमुक्ताक्षवलयवाहिभिर्दिनकराराधननियमा इवागृह्यन्त ललनाललाटेन्दुद्युतिभिः
atha lalāṭantape tapati tapane candanalikhitalalāṭikāpuṇḍrakair alakacīracīvarasaṃvītaiḥ svedodabindumuktākṣavalayavāhibhirdinakarārādhananiyamā ivāgṛhyanta lalanālalāṭendudyutibhiḥ
- 9
चन्दनधूसराभिर् असूर्यम्पश्याभिः कुमुदिनीभिरिव दिवसम् असुप्यत सुन्दरीभिः
candanadhūsarābhir asūryampaśyābhiḥ kumudinībhiriva divasam asupyata sundarībhiḥ
- 10
निद्रालसा रत्नालोकमपि नासहन्त दृशः किमुत जरठमातपम्
nidrālasā ratnālokamapi nāsahanta dṛśaḥ kimuta jaraṭhamātapam
- 11
अशिशिरसमयेन चक्रवाकमिथुनाभिनन्दिताः सरित इव तनिमानम् आनीयन्त सोडुपाः शर्वर्यः
aśiśirasamayena cakravākamithunābhinanditāḥ sarita iva tanimānam ānīyanta soḍupāḥ śarvaryaḥ
- 12
अभिनवपटुपाटलामोदसुरभिपरिमलं न केवलं जलम्जनस्य पवनमपि पातुमभूदभिलाषो दिवसकरसन्तापात्
abhinavapaṭupāṭalāmodasurabhiparimalaṃ na kevalaṃ jalamjanasya pavanamapi pātumabhūdabhilāṣo divasakarasantāpāt
- 13
क्रमेण च खरखगमयूखे खण्डितशैशवे शुष्यत्सरसि सीदत्स्रोतसि मन्दनिर्झरे झिल्लिकाझाङ्कारिणि कातरकपोतकूजितानुबन्धबधिरितविश्वे श्वसत्पतत्त्रिणि करीषकषमरुति विरलवीरुधि रुधिरकुतूहलिकेसरिकिशोरकलिह्यमानकठोरधातकीस्तबके ताम्यत्स्तम्बेरमयूथवमथुतिम्यन्महामहीधरनितम्बे दिनकरदूयमानद्विरददीनदानाश्यानदानश्यामिकालीनमूकमधुलिहि लोहितायमानमन्दारसिन्दूरितसीम्नि सलिलस्यन्दसंदोहसंदेहमुह्यन्महामहिषविषाणकोटिविलिख्यमानस्फुटत्स्फाटिकदृषदि घर्ममर्मरितगर्मुति तप्तपांशुकुकूलकातरविकिरे विवरशरणश्वाविधे तटार्जुनकुररकूजाज्वरविवर्तमानोत्तानशफरशारपङ्कशेषपल्वलाम्भसि दावजनितजगन्नीराजने रजनीराजयक्ष्मणि कठोरीभवति निदाघकाले प्रतिदिशम् आटीकमाना इवोषरेषु प्रपावाटकुटीपटलप्रकटलुण्ठकाः प्रपक्वकपिकच्छूगुच्छछटाच्छोटनचापलैर् अकाण्डकण्डूला इव कर्षन्तः शर्करिलाः कर्करस्थलीः स्थूलदृषच्चूर्णमुचः मुचुकुन्दकन्दलदलनदन्तुराः संतततपनतापमुखरचीरीगणमुखशीकरशीक्यमानतनवः तरुणतरतरणितापतरले तरन्त इव तरङ्गिणि मृगतृष्णिकातरङ्गिणीनामलीकवारिणि शुष्यच्छमीमर्मरमारवमार्गलङ्घनलाघवजवजङ्घालाः रैणवावर्तमण्डलीरेचकरासरसरभसारब्धनर्तनारम्भारभटीनटाः दावदग्धस्थलीमषीमिलनमलिनाः शिक्षितक्षपणकवृत्तय इव वनमयूरपिच्छचयानुच्चिन्वन्तः सप्रयाणगुञ्जा इव शिञ्जानजरत्करञ्जमञ्जरीबीजजालकैः सप्ररोहा इवातपातुरवनमहिषनासानिकुञ्जस्थूलनिःश्वासैः सापत्या इवोड्डीयमानजवनवातहरिणपरिपाटीपेटकैः सभ्रुकुटय इव दह्यमानखलधानबुसकूटकुटिलधूमकोटिभिः सावीचिवीचय इव महोष्ममुक्तिभिः लोमशा इव शीर्यमाणशाल्मलिफलतूलतन्तुभिः दद्रुणा इव शुष्कपत्रप्रकराकृष्टिभिः शिराला इव तृणवेणीविकरणैः उच्छ्मश्रव इव धूयमाननवयवशूकशकलशङ्कुभिः दंष्ट्राला इव चलितशललसूचीशतैः जिह्वाला इव वैश्वानरशिखाभिः उत्सर्पत्सर्पकञ्चुकैश्चूडाला इव ब्रह्मस्तम्भरसाभ्यवहरणाय कवलग्रहमिवोष्णैः कमलवनमधुभिरभ्यस्यन्तः सकलसलिलोच्छोषणघर्मघोषणाघोरपटहैरिव शुष्कवेणुवनास्फोटनपटुरवैस्त्रिभुवनबिभीषिकामुद्भावयन्तः च्युतचपलचाषपक्षश्रेणीशारितसृतयः त्विषिमन्मयूखलतालातप्लोषकल्माषवपुष इव स्फुटितगुञ्जाफलस्फुलिङ्गाङ्गाराङ्किताङ्गाः गिरिगुहागम्भीरझाङ्कारभीषणभ्रान्तयः भुवनभस्मीकरणाभिचारचरुपचनचतुराः रुधिराहुतिभिरिव पारिभद्रद्रुमस्तबकवृष्टिभिस्तर्पयन्तस्तारवान्वनविभावसून् अशिशिरसिकतातारकितरंहसः तप्तशैलविलीयमानशिलाजतुरसलवलिप्तदिशः दावदहनपच्यमानचटकाण्डखण्डखचिततरुकोटरकीटपटलपुटपाकगन्धकटवः प्रावर्तन्तोन्मत्ता मातरिश्वानः
krameṇa ca kharakhagamayūkhe khaṇḍitaśaiśave śuṣyatsarasi sīdatsrotasi mandanirjhare jhillikājhāṅkāriṇi kātarakapotakūjitānubandhabadhiritaviśve śvasatpatattriṇi karīṣakaṣamaruti viralavīrudhi rudhirakutūhalikesarikiśorakalihyamānakaṭhoradhātakīstabake tāmyatstamberamayūthavamathutimyanmahāmahīdharanitambe dinakaradūyamānadviradadīnadānāśyānadānaśyāmikālīnamūkamadhulihi lohitāyamānamandārasindūritasīmni salilasyandasaṃdohasaṃdehamuhyanmahāmahiṣaviṣāṇakoṭivilikhyamānasphuṭatsphāṭikadṛṣadi gharmamarmaritagarmuti taptapāṃśukukūlakātaravikire vivaraśaraṇaśvāvidhe taṭārjunakurarakūjājvaravivartamānottānaśapharaśārapaṅkaśeṣapalvalāmbhasi dāvajanitajagannīrājane rajanīrājayakṣmaṇi kaṭhorībhavati nidāghakāle pratidiśam āṭīkamānā ivoṣareṣu prapāvāṭakuṭīpaṭalaprakaṭaluṇṭhakāḥ prapakvakapikacchūgucchachaṭācchoṭanacāpalair akāṇḍakaṇḍūlā iva karṣantaḥ śarkarilāḥ karkarasthalīḥ sthūladṛṣaccūrṇamucaḥ mucukundakandaladalanadanturāḥ saṃtatatapanatāpamukharacīrīgaṇamukhaśīkaraśīkyamānatanavaḥ taruṇatarataraṇitāpatarale taranta iva taraṅgiṇi mṛgatṛṣṇikātaraṅgiṇīnāmalīkavāriṇi śuṣyacchamīmarmaramāravamārgalaṅghanalāghavajavajaṅghālāḥ raiṇavāvartamaṇḍalīrecakarāsarasarabhasārabdhanartanārambhārabhaṭīnaṭāḥ dāvadagdhasthalīmaṣīmilanamalināḥ śikṣitakṣapaṇakavṛttaya iva vanamayūrapicchacayānuccinvantaḥ saprayāṇaguñjā iva śiñjānajaratkarañjamañjarībījajālakaiḥ saprarohā ivātapāturavanamahiṣanāsānikuñjasthūlaniḥśvāsaiḥ sāpatyā ivoḍḍīyamānajavanavātahariṇaparipāṭīpeṭakaiḥ sabhrukuṭaya iva dahyamānakhaladhānabusakūṭakuṭiladhūmakoṭibhiḥ sāvīcivīcaya iva mahoṣmamuktibhiḥ lomaśā iva śīryamāṇaśālmaliphalatūlatantubhiḥ dadruṇā iva śuṣkapatraprakarākṛṣṭibhiḥ śirālā iva tṛṇaveṇīvikaraṇaiḥ ucchmaśrava iva dhūyamānanavayavaśūkaśakalaśaṅkubhiḥ daṃṣṭrālā iva calitaśalalasūcīśataiḥ jihvālā iva vaiśvānaraśikhābhiḥ utsarpatsarpakañcukaiścūḍālā iva brahmastambharasābhyavaharaṇāya kavalagrahamivoṣṇaiḥ kamalavanamadhubhirabhyasyantaḥ sakalasalilocchoṣaṇagharmaghoṣaṇāghorapaṭahairiva śuṣkaveṇuvanāsphoṭanapaṭuravaistribhuvanabibhīṣikāmudbhāvayantaḥ cyutacapalacāṣapakṣaśreṇīśāritasṛtayaḥ tviṣimanmayūkhalatālātaploṣakalmāṣavapuṣa iva sphuṭitaguñjāphalasphuliṅgāṅgārāṅkitāṅgāḥ giriguhāgambhīrajhāṅkārabhīṣaṇabhrāntayaḥ bhuvanabhasmīkaraṇābhicāracarupacanacaturāḥ rudhirāhutibhiriva pāribhadradrumastabakavṛṣṭibhistarpayantastāravānvanavibhāvasūn aśiśirasikatātārakitaraṃhasaḥ taptaśailavilīyamānaśilājaturasalavaliptadiśaḥ dāvadahanapacyamānacaṭakāṇḍakhaṇḍakhacitatarukoṭarakīṭapaṭalapuṭapākagandhakaṭavaḥ prāvartantonmattā mātariśvānaḥ
- 14
सर्वतश्च भूरिभस्त्रासहस्रसंधुक्षणक्षुभिता इव जरठाजगरगम्भीरगलगुहावाहिवायवः क्वचित्स्वच्छन्दतृणचारिणो हरिणाः क्वचित्तरुतलविवरविवर्तिनो बभ्रवः क्वचिज्जटावलम्बिनः कपिलाः क्वचिच्छकुनिकुलकुलायपातिनः श्येनाः क्वचिद्विलीनलाक्षारसलोहितच्छवयो ऽधराः क्वचिद् आसादितशकुनिपक्षकृतपटुगतयो विशिखाः क्वचिद्दग्धनिःशेषजन्महेतवो निर्वाणाः क्वचित्कुसुमवासिताम्बरसुरभयो रागिणः क्वचित्सधूमोद्गारा मन्दरुचयः क्वचित्सकलजगद्ग्रासघस्मराः सभस्मकाः क्वचिद्वेणुशिखरलग्नमूर्तयो ऽत्यन्तवृद्धाः क्वचिदचलोपयुक्तशिलाजतवः क्षयिणः क्वचित्सर्वरसभुजः पीवानः क्वचिद्दग्धगुग्गुलवो रौद्राः क्वचिज्ज्वलितनेत्रदहनदग्धसकुसुमशरमदनाः कृतस्थाणुस्थितयः चटुलशिखानर्तनारम्भारभटीनटाः क्वचिच्छुष्ककासारसृतिभिः स्फुटन्नीरसनीवारबीजलाजवर्षिभिर्ज्वालाञ्जलिभिर् अर्चयन्त इव घर्मघृणिम् अघृणा इव हठहूयमानकठोरस्थलकमठवसाविस्रगन्धगृध्नवः स्वमपि धूममम्भोदसमुद्भूतिभियेव भक्षयन्तः सतिलाहुतय इव स्फुटद्बहलबालकीटपटलाः कक्षेषु श्वित्रिण इव प्लोषविचटद्वल्कलधवलशम्बूकशुक्तयः शुष्केषु सरःसु स्वेदिन इव विलीयमानमधुपटलगोलगलितमधूच्छिष्टवृष्टयः काननेषु खलतय इव परिशीर्यमाणशिखासंहतयो महोषरेषु गृहीतशिलाकवला इव ज्वलितसूर्यमणिशकलेषु शिलोच्चयेषु प्रत्यदृश्यन्त दारुणा दावाग्नयः
sarvataśca bhūribhastrāsahasrasaṃdhukṣaṇakṣubhitā iva jaraṭhājagaragambhīragalaguhāvāhivāyavaḥ kvacitsvacchandatṛṇacāriṇo hariṇāḥ kvacittarutalavivaravivartino babhravaḥ kvacijjaṭāvalambinaḥ kapilāḥ kvacicchakunikulakulāyapātinaḥ śyenāḥ kvacidvilīnalākṣārasalohitacchavayo 'dharāḥ kvacid āsāditaśakunipakṣakṛtapaṭugatayo viśikhāḥ kvaciddagdhaniḥśeṣajanmahetavo nirvāṇāḥ kvacitkusumavāsitāmbarasurabhayo rāgiṇaḥ kvacitsadhūmodgārā mandarucayaḥ kvacitsakalajagadgrāsaghasmarāḥ sabhasmakāḥ kvacidveṇuśikharalagnamūrtayo 'tyantavṛddhāḥ kvacidacalopayuktaśilājatavaḥ kṣayiṇaḥ kvacitsarvarasabhujaḥ pīvānaḥ kvaciddagdhaguggulavo raudrāḥ kvacijjvalitanetradahanadagdhasakusumaśaramadanāḥ kṛtasthāṇusthitayaḥ caṭulaśikhānartanārambhārabhaṭīnaṭāḥ kvacicchuṣkakāsārasṛtibhiḥ sphuṭannīrasanīvārabījalājavarṣibhirjvālāñjalibhir arcayanta iva gharmaghṛṇim aghṛṇā iva haṭhahūyamānakaṭhorasthalakamaṭhavasāvisragandhagṛdhnavaḥ svamapi dhūmamambhodasamudbhūtibhiyeva bhakṣayantaḥ satilāhutaya iva sphuṭadbahalabālakīṭapaṭalāḥ kakṣeṣu śvitriṇa iva ploṣavicaṭadvalkaladhavalaśambūkaśuktayaḥ śuṣkeṣu saraḥsu svedina iva vilīyamānamadhupaṭalagolagalitamadhūcchiṣṭavṛṣṭayaḥ kānaneṣu khalataya iva pariśīryamāṇaśikhāsaṃhatayo mahoṣareṣu gṛhītaśilākavalā iva jvalitasūryamaṇiśakaleṣu śiloccayeṣu pratyadṛśyanta dāruṇā dāvāgnayaḥ
- 15
तथाभूते च तस्मिन्नत्युग्रे ग्रीष्मसमये कदाचिदस्य स्वगृहावस्थितस्य भुक्तवतो ऽपराह्णसमये भ्रात्रा पारशवश्चन्द्रसेननामा प्रविश्याकथयद् एष खलु देवस्य चतुःसमुद्राधिपतेः सकलराजचक्रचूडामणिश्रेणीशाणकोणकषणनिर्मलीकृतचरणनखमणेः सर्वचक्रवर्तिनां धौरेयस्य महाराजाधिराजपरमेश्वरश्रीहर्षदेवस्य भ्रात्रा कृष्णनाम्ना भवतामन्तिकं प्रज्ञाततमो दीर्घाध्वगः प्रहितो द्वारमध्यास्त इति
tathābhūte ca tasminnatyugre grīṣmasamaye kadācidasya svagṛhāvasthitasya bhuktavato 'parāhṇasamaye bhrātrā pāraśavaścandrasenanāmā praviśyākathayad eṣa khalu devasya catuḥsamudrādhipateḥ sakalarājacakracūḍāmaṇiśreṇīśāṇakoṇakaṣaṇanirmalīkṛtacaraṇanakhamaṇeḥ sarvacakravartināṃ dhaureyasya mahārājādhirājaparameśvaraśrīharṣadevasya bhrātrā kṛṣṇanāmnā bhavatāmantikaṃ prajñātatamo dīrghādhvagaḥ prahito dvāramadhyāsta iti
- 16
सो ऽब्रवीद् आयुष्मन् अविलम्बितं प्रवेशयैनम् इति
so 'bravīd āyuṣman avilambitaṃ praveśayainam iti
- 17
अथ तेनानीयमानम् अतिदूरगमनगुरुजडजङ्घाकाण्डम्कार्दमिकचेलचीरिकानियमितोच्चण्डचण्डातकम्पृष्ठप्रेङ्खत्पटच्चरकर्पटघटितगलग्रन्थिम् अतिनिबिडसूत्रबन्धनिम्नितान्तरालकृतलेखव्यवच्छेदया लेखमालिकया परिकलितमूर्धानम्प्रविशन्तं लेखहारकमद्राक्षीत्
atha tenānīyamānam atidūragamanagurujaḍajaṅghākāṇḍamkārdamikacelacīrikāniyamitoccaṇḍacaṇḍātakampṛṣṭhapreṅkhatpaṭaccarakarpaṭaghaṭitagalagranthim atinibiḍasūtrabandhanimnitāntarālakṛtalekhavyavacchedayā lekhamālikayā parikalitamūrdhānampraviśantaṃ lekhahārakamadrākṣīt
- 18
अप्राक्षीच्च दूरादेव भद्र भद्रम् अशेषभुवननिष्कारणबन्धोस्तत्रभवतः कृष्णस्येति
aprākṣīcca dūrādeva bhadra bhadram aśeṣabhuvananiṣkāraṇabandhostatrabhavataḥ kṛṣṇasyeti
- 19
स भद्रम् इत्युक्त्वा प्रणम्य नातिदूरे समुपाविशत्
sa bhadram ityuktvā praṇamya nātidūre samupāviśat
- 20
विश्रान्तश्चाब्रवीद् एष खलु स्वामिना माननीयस्य लेखः प्रहित इति विमुच्यार्पयत्
viśrāntaścābravīd eṣa khalu svāminā mānanīyasya lekhaḥ prahita iti vimucyārpayat
- 21
अथ बाणस्तु सादरं गृहीत्वा स्वयमेवावाचयन्मेखलकात्संदिष्टम् अवधार्य फलप्रतिबन्धी धीमता परिहरणीयः कालातिपात इत्येतावदत्रार्थजातम्
atha bāṇastu sādaraṃ gṛhītvā svayamevāvācayanmekhalakātsaṃdiṣṭam avadhārya phalapratibandhī dhīmatā pariharaṇīyaḥ kālātipāta ityetāvadatrārthajātam
- 22
इतरद्वार्त्तासंवादनमात्रकम्
itaradvārttāsaṃvādanamātrakam
- 23
अवधृतलेखार्थश्च समुत्सारितपरिजनः संदेशं पृष्टवान्
avadhṛtalekhārthaśca samutsāritaparijanaḥ saṃdeśaṃ pṛṣṭavān
- 24
मेखलकस्त्व् अवादीद् एवमाह मेधाविनं स्वामी जानात्य् एव मान्यो यथैकगोत्रता वा समानज्ञानता वा समानजातिता वा सहसंवर्धनं वा एकदेशनिवासो वा दर्शनाभ्यासो वा परस्परानुराग श्रवणं वा परोक्षोपकारकरणं वा समानशीलता वा स्नेहस्य हेतवः
mekhalakastv avādīd evamāha medhāvinaṃ svāmī jānāty eva mānyo yathaikagotratā vā samānajñānatā vā samānajātitā vā sahasaṃvardhanaṃ vā ekadeśanivāso vā darśanābhyāso vā parasparānurāga śravaṇaṃ vā parokṣopakārakaraṇaṃ vā samānaśīlatā vā snehasya hetavaḥ
- 25
त्वयि तु विना कारणेनादृष्टे ऽपि प्रत्यासन्ने बन्धाविव बद्धपक्षपातं किमपि स्निह्यति मे हृदयं दूरस्थे ऽपीन्दोरिव कुमुदाकरे
tvayi tu vinā kāraṇenādṛṣṭe 'pi pratyāsanne bandhāviva baddhapakṣapātaṃ kimapi snihyati me hṛdayaṃ dūrasthe 'pīndoriva kumudākare
- 26
यतो भवन्तमन्तरेणान्यथा चान्यथा चायं चक्रवर्ती दुर्जनैर्ग्राहित आसीत्
yato bhavantamantareṇānyathā cānyathā cāyaṃ cakravartī durjanairgrāhita āsīt
- 27
न च तत्तथा न सन्त्य् एव ते येषां सताम् अपि सतां न विद्यन्ते मित्रोदासीनशत्रवः
na ca tattathā na santy eva te yeṣāṃ satām api satāṃ na vidyante mitrodāsīnaśatravaḥ
- 28
शिशुचापलापराचीनचेतोवृत्तितया च भवतः केनचिद् असहिष्णुना यत्किंचिद् असदृशम् उदीरितम् इतरो लोकस्तथैव तद्गृह्णाति वक्ति च
śiśucāpalāparācīnacetovṛttitayā ca bhavataḥ kenacid asahiṣṇunā yatkiṃcid asadṛśam udīritam itaro lokastathaiva tadgṛhṇāti vakti ca
- 29
सलिलानीव गतानुगतिकानि लोलानि खलु भवन्त्य् अविवेकिनां मनांसि
salilānīva gatānugatikāni lolāni khalu bhavanty avivekināṃ manāṃsi
- 30
बहुमुखश्रवणनिश्चलीकृतनिश्चयश्च किं करोतु पृथिवीपतिः
bahumukhaśravaṇaniścalīkṛtaniścayaśca kiṃ karotu pṛthivīpatiḥ

