25 shlokas
- 1
जननाद्यस्तृतीयो ज्यौत्स्नस्तस्य तृतीयायां प्रातः सशिरस्कं कुमारम् आप्लाव्यास्तमिते वीते लोहितिम्न्य् अञ्जलिकृतः पितोपतिष्ठते
jananādyastṛtīyo jyautsnastasya tṛtīyāyāṃ prātaḥ saśiraskaṃ kumāram āplāvyāstamite vīte lohitimny añjalikṛtaḥ pitopatiṣṭhate
- 2
अथ माता शुचिना वसनेन कुमारम् आच्छाद्य दक्षिणत उदञ्चं पित्रे प्रयच्छत्य् उदक्शिरसम्
atha mātā śucinā vasanena kumāram ācchādya dakṣiṇata udañcaṃ pitre prayacchaty udakśirasam
- 3
अनुपृष्ठं परिक्रम्योत्तरतो ऽवतिष्ठते
anupṛṣṭhaṃ parikramyottarato 'vatiṣṭhate
- 4
अथ जपति यत्ते सुसीम इति यथायं न प्रमीयेत पुत्रो जनित्र्या अधीति
atha japati yatte susīma iti yathāyaṃ na pramīyeta putro janitryā adhīti
- 5
उदञ्चं मात्रे प्रदाय यथार्थम्
udañcaṃ mātre pradāya yathārtham
- 6
अथ ये ऽत ऊर्ध्वं ज्यौत्स्नाः प्रथमोद्दिष्ट एव तेषु पितोपतिष्ठते ऽपाम् अञ्जलिं पूरयित्वाभिमुखश्चन्द्रमसम्
atha ye 'ta ūrdhvaṃ jyautsnāḥ prathamoddiṣṭa eva teṣu pitopatiṣṭhate 'pām añjaliṃ pūrayitvābhimukhaścandramasam
- 7
यद् अदश्चन्द्रमसीति सकृद्यजुषा द्विस्तूष्णीम् उत्सृज्य यथार्थम्
yad adaścandramasīti sakṛdyajuṣā dvistūṣṇīm utsṛjya yathārtham
- 8
जननाद्दशरात्रे व्युष्टे शतरात्रे संवत्सरे वा नामधेयकरणम्
jananāddaśarātre vyuṣṭe śatarātre saṃvatsare vā nāmadheyakaraṇam
- 9
अथ यस्तत्करिष्यन्भवति पश्चाद् अग्नेर् उदगग्रेषु दर्भेषु प्राङ् उपविशति
atha yastatkariṣyanbhavati paścād agner udagagreṣu darbheṣu prāṅ upaviśati
- 10
अथ माता शुचिना वसनेन कुमारम् आच्छाद्य दक्षिणत उदञ्चं कर्त्रे प्रयच्छत्य् उदक्शिरसम्
atha mātā śucinā vasanena kumāram ācchādya dakṣiṇata udañcaṃ kartre prayacchaty udakśirasam
- 11
अनुपृष्ठम्परिक्रम्योत्तरत उपविशत्य् उदगग्रेष्व् एव दर्भेषु
anupṛṣṭhamparikramyottarata upaviśaty udagagreṣv eva darbheṣu
- 12
अथ जुहोति प्रजापतये तिथये नक्षत्राय देवताया इति
atha juhoti prajāpataye tithaye nakṣatrāya devatāyā iti
- 13
तस्य मुख्यान्प्राणान्संमृशन्को ऽसि कतमो ऽसीत्य् एतं मन्त्रं जपति
tasya mukhyānprāṇānsaṃmṛśanko 'si katamo 'sīty etaṃ mantraṃ japati
- 14
आहस्पत्यं मासं प्रविशासाव् इत्य् अन्ते च मन्त्रस्य घोषवदाद्य् अन्तरन्तस्थं दीर्घाभिनिष्ठानान्तं कृतं नाम दध्यात्
āhaspatyaṃ māsaṃ praviśāsāv ity ante ca mantrasya ghoṣavadādy antarantasthaṃ dīrghābhiniṣṭhānāntaṃ kṛtaṃ nāma dadhyāt
- 15
एतद् अतद्धितम्
etad ataddhitam
- 16
अयुग्दान्तं स्त्रीणाम्
ayugdāntaṃ strīṇām
- 17
मात्रे चैव प्रथमं नामधेयम् आख्याय यथार्थम्
mātre caiva prathamaṃ nāmadheyam ākhyāya yathārtham
- 18
गौर्दक्षिणा
gaurdakṣiṇā
- 19
कुमारस्य मासि मासि संवत्सरे सांवत्सरिकेषु वा पर्वस्वग्नीन्द्रौ द्यावापृथिवी विश्वान्देवांश्च यजेत
kumārasya māsi māsi saṃvatsare sāṃvatsarikeṣu vā parvasvagnīndrau dyāvāpṛthivī viśvāndevāṃśca yajeta
- 20
दैवतम् इष्ट्वा तिथिं नक्षत्रं च यजेत
daivatam iṣṭvā tithiṃ nakṣatraṃ ca yajeta
- 21
विप्रोष्य ज्येष्ठस्य पुत्रस्योभाभ्यां पाणिभ्यां मूर्धानं परिगृह्य जपेद्यदा वा पिता म इति विद्याद् उपेतस्य वाङ्गाद् अङ्गात्सम्भवसीति
viproṣya jyeṣṭhasya putrasyobhābhyāṃ pāṇibhyāṃ mūrdhānaṃ parigṛhya japedyadā vā pitā ma iti vidyād upetasya vāṅgād aṅgātsambhavasīti
- 22
पशूनां त्वा हिङ्कारेणाभिजिघ्रामीत्य् अभिजिघ्र्य यथार्थम्
paśūnāṃ tvā hiṅkāreṇābhijighrāmīty abhijighrya yathārtham
- 23
एवम् एवावरेषाम्
evam evāvareṣām
- 24
यथाज्येष्ठं यथोपलम्भं वा
yathājyeṣṭhaṃ yathopalambhaṃ vā
- 25
स्त्रियास्तूष्णीं मूर्धन्य् अभिजिघ्रणं मूर्धन्यभिजिघ्रणम्
striyāstūṣṇīṃ mūrdhany abhijighraṇaṃ mūrdhanyabhijighraṇam

