23 shlokas
- 1
प्रागुदीच्यां दिशि यद्ब्राह्मणकुलम् अभिरूपम्
prāgudīcyāṃ diśi yadbrāhmaṇakulam abhirūpam
- 2
तत्राग्निर् उपसमाहितो भवति
tatrāgnir upasamāhito bhavati
- 3
अपरेणाग्निम् आनडुहं रोहितं चर्म प्राग्ग्रीवम् उत्तरलोमास्तीर्णं भवति
apareṇāgnim ānaḍuhaṃ rohitaṃ carma prāggrīvam uttaralomāstīrṇaṃ bhavati
- 4
तस्मिन्न् एनां वाग्यताम् उपवेशयन्ति
tasminn enāṃ vāgyatām upaveśayanti
- 5
सा खल्व् आस्त एवानक्षत्रदर्शनात्
sā khalv āsta evānakṣatradarśanāt
- 6
प्रोक्ते नक्षत्रे षड् आज्याहुतीर्जुहोति लेखासन्धिष्व् इत्य् एतत्प्रभृतिभिः
prokte nakṣatre ṣaḍ ājyāhutīrjuhoti lekhāsandhiṣv ity etatprabhṛtibhiḥ
- 7
आहुतेर् आहुतेस्तु सम्पातं मूर्धनि वध्वा अवनयेत्
āhuter āhutestu sampātaṃ mūrdhani vadhvā avanayet
- 8
हुत्वोपोत्थायोपनिष्क्रम्य ध्रुवं दर्शयति
hutvopotthāyopaniṣkramya dhruvaṃ darśayati
- 9
ध्रुवम् असि ध्रुवाहं पतिकुले भूयासम् अमुष्यासाव् इति पतिनाम गृह्णीयाद् आत्मनश्च
dhruvam asi dhruvāhaṃ patikule bhūyāsam amuṣyāsāv iti patināma gṛhṇīyād ātmanaśca
- 10
अरुन्धतीं च
arundhatīṃ ca
- 11
रुद्धाहम् अस्मीत्य् एवम् एव
ruddhāham asmīty evam eva
- 12
अथैनाम् अनुमन्त्रयते ध्रुवा द्यौर् इत्य् एतयर्चा
athainām anumantrayate dhruvā dyaur ity etayarcā
- 13
अनुमन्त्रिता गुरुं गोत्रेणाभिवादयते
anumantritā guruṃ gotreṇābhivādayate
- 14
सो ऽस्या वाग्विसर्गः
so 'syā vāgvisargaḥ
- 15
ताव् उभौ तत्प्रभृति त्रिरात्रम् अक्षारालवणाशिनौ ब्रह्मचारिणौ भूमौ सह शयीयाताम्
tāv ubhau tatprabhṛti trirātram akṣārālavaṇāśinau brahmacāriṇau bhūmau saha śayīyātām
- 16
अत्रार्घ्यम् इत्य् आहुः
atrārghyam ity āhuḥ
- 17
आगतेष्व् इत्य् एके
āgateṣv ity eke
- 18
हविष्यम् अन्नं प्रथमं परिजपितं भुञ्जीत
haviṣyam annaṃ prathamaṃ parijapitaṃ bhuñjīta
- 19
श्वो भूते वा समशनीयं स्थालीपाकं कुर्वीत
śvo bhūte vā samaśanīyaṃ sthālīpākaṃ kurvīta
- 20
तस्य देवता अग्निः प्रजापतिर्विश्वे देवा अनुमतिर् इति
tasya devatā agniḥ prajāpatirviśve devā anumatir iti
- 21
उद्धृत्य स्थालीपाकं व्युह्यैकदेशं पाणिनाभिमृशेद् अन्नपाशेन मणिनेति
uddhṛtya sthālīpākaṃ vyuhyaikadeśaṃ pāṇinābhimṛśed annapāśena maṇineti
- 22
भुक्त्वोच्छिष्टं वध्वै प्रदाय यथार्थम्
bhuktvocchiṣṭaṃ vadhvai pradāya yathārtham
- 23
गौर्दक्षिणा
gaurdakṣiṇā

