13 shlokas
- 1
दक्षिणाप्रत्यक्प्रवणम् अगारावकाशम् उद्धत्य पलाशेन शमीमयेन वोदूहेनैताम् एव दिशम् उत्तरयोदूहति
dakṣiṇāpratyakpravaṇam agārāvakāśam uddhatya palāśena śamīmayena vodūhenaitām eva diśam uttarayodūhati
- 2
एवं त्रिः
evaṃ triḥ
- 3
कॢप्तम् उत्तरयाभिमृश्य प्रदक्षिणं स्थूणागर्तान्खानयित्वाभ्यन्तरं पांसून् उदुप्योत्तराभ्यां दक्षिणां द्वारस्थूणाम् अवदधाति
kḷptam uttarayābhimṛśya pradakṣiṇaṃ sthūṇāgartānkhānayitvābhyantaraṃ pāṃsūn udupyottarābhyāṃ dakṣiṇāṃ dvārasthūṇām avadadhāti
- 4
एवम् इतराम्
evam itarām
- 5
यथाखातम् इतरा अन्ववधाय वंशम् आधीयमानम् उत्तरेण यजुषाभिमन्त्रयते
yathākhātam itarā anvavadhāya vaṃśam ādhīyamānam uttareṇa yajuṣābhimantrayate
- 6
सम्मितम् उत्तरैर्यथालिङ्गम्
sammitam uttarairyathāliṅgam
- 7
पालाशं शमीमयं वेध्मम् आदीप्योत्तरयर्चाग्निम् उद्धृत्योत्तरेण यजुषागारं प्रपाद्योत्तरपूर्वदेशे ऽगारस्योत्तरयाग्निं प्रतिष्ठापयति
pālāśaṃ śamīmayaṃ vedhmam ādīpyottarayarcāgnim uddhṛtyottareṇa yajuṣāgāraṃ prapādyottarapūrvadeśe 'gārasyottarayāgniṃ pratiṣṭhāpayati
- 8
तस्माद्दक्षिणम् उदधानायतनं भवति
tasmāddakṣiṇam udadhānāyatanaṃ bhavati
- 9
तस्मिन्विषूचीनाग्रान्दर्भान्संस्तीर्य तेषूत्तरया व्रीहियवान्न्युप्य तत्रोदधानं प्रतिष्ठापयति
tasminviṣūcīnāgrāndarbhānsaṃstīrya teṣūttarayā vrīhiyavānnyupya tatrodadhānaṃ pratiṣṭhāpayati
- 10
तस्मिन्न् उत्तरेण यजुषा चतुर उदकुम्भान् आनयति
tasminn uttareṇa yajuṣā catura udakumbhān ānayati
- 11
दीर्णम् उत्तरयानुमन्त्रयते
dīrṇam uttarayānumantrayate
- 12
अग्नेर् उपसमाधानाद्याज्यभागान्ते उत्तरा आहुतीर्हुत्वा जयादि प्रतिपद्यते
agner upasamādhānādyājyabhāgānte uttarā āhutīrhutvā jayādi pratipadyate
- 13
परिषेचनान्तं कृत्वोत्तरेण यजुषोदकुम्भेन त्रिः प्रदक्षिणम् अन्तरतो ऽगारं निवेशनं वा परिषिच्य ब्राह्मणान्भोजयेद् अपूपैः सक्तुभिर् ओदनेनेति
pariṣecanāntaṃ kṛtvottareṇa yajuṣodakumbhena triḥ pradakṣiṇam antarato 'gāraṃ niveśanaṃ vā pariṣicya brāhmaṇānbhojayed apūpaiḥ saktubhir odaneneti

