16 shlokas
- 1
यत्ते पावक चकृमा कच्चिद् आगः पूर्वो यः सन्न् अपरो भवति
घृतेनाग्ने तन्वं वर्धयस्व मा मा हिंसीर् अधिगतं पुरस्तात्
इत्य् उद्यते ऽग्नाव् आहवनीये जुहोति
yatte pāvaka cakṛmā kaccid āgaḥ pūrvo yaḥ sann aparo bhavati
ghṛtenāgne tanvaṃ vardhayasva mā mā hiṃsīr adhigataṃ purastāt
ity udyate 'gnāv āhavanīye juhoti
- 2
अग्नये प्रणीयमानायानुब्रूहीति संप्रेष्यति
agnaye praṇīyamānāyānubrūhīti saṃpreṣyati
- 3
उपयच्छत्य् उपयमनीः
upayacchaty upayamanīḥ
- 4
ऊर्णावन्तम् इत्य् उच्यमाने
यज्ञः प्रत्यष्ठात्सुमतिः सुमेधा आ त्वा वसूनि पुरोधार्हन्ति
दीर्घम् आयुर्यजमानाय कृण्वन्न् अथामृतेन जरितारम् अङ्धि
इति संभारेष्व् अध्वर्युर् अग्निं सादयति
ūrṇāvantam ity ucyamāne
yajñaḥ pratyaṣṭhātsumatiḥ sumedhā ā tvā vasūni purodhārhanti
dīrgham āyuryajamānāya kṛṇvann athāmṛtena jaritāram aṅdhi
iti saṃbhāreṣv adhvaryur agniṃ sādayati
- 5
यस्माद् अधि प्रणयति तस्मिन्गार्हपत्यकर्माणि कुर्वीताग्निहोत्रं च जुहुयाद् औत्तरवेदिके
yasmād adhi praṇayati tasmingārhapatyakarmāṇi kurvītāgnihotraṃ ca juhuyād auttaravedike
- 6
वरुणप्रघासेष्व् अग्निहोत्रं प्रणयनी पूर्णाहुतिर् इति यथाग्न्याधेये
varuṇapraghāseṣv agnihotraṃ praṇayanī pūrṇāhutir iti yathāgnyādheye
- 7
अतिमुक्तीर्जुहोति
अग्निर्यज्ञं नयतु प्रजानन्मैनं यज्ञहनो विदन्
देवेभ्यो यज्ञं नयतात्प्र प्र यज्ञपतिं तिर स्वाहा
इति
वायुः सूर्यो यज्ञं नयत्व् इति समानम्
atimuktīrjuhoti
agniryajñaṃ nayatu prajānanmainaṃ yajñahano vidan
devebhyo yajñaṃ nayatātpra pra yajñapatiṃ tira svāhā
iti
vāyuḥ sūryo yajñaṃ nayatv iti samānam
- 8
प्रणीते ऽग्न्यन्वाधानं व्रतोपायनम्
praṇīte 'gnyanvādhānaṃ vratopāyanam
- 9
पाणिप्रक्षालनप्रभृति समानम् आ पात्रप्रयोगात्
pāṇiprakṣālanaprabhṛti samānam ā pātraprayogāt
- 10
एकादशकपालः पुरोडाशो द्वादशकपालो वा
ekādaśakapālaḥ puroḍāśo dvādaśakapālo vā
- 11
द्वे जुह्वे वसाहोमहवनी द्वितीया
द्वे उपभृतौ पृषदाज्यधानी द्वितीया
द्वे आज्यस्थाल्यौ
यूपशल्कम्
शूलम्
पशूखाम्
कार्ष्मर्यमय्यौ वपाश्रपण्यौ
द्विशृङ्गैकशृङ्गे
औदुम्बरम् आस्यदघ्नं मैत्रावरुणदण्डम्
दर्भाणां रशने द्विगुणां द्विव्यायामां त्रिगुणां त्रिव्यायामां संसाद्य प्रोक्ष्य पात्राण्य् आज्यं निर्वपति दधि च
dve juhve vasāhomahavanī dvitīyā
dve upabhṛtau pṛṣadājyadhānī dvitīyā
dve ājyasthālyau
yūpaśalkam
śūlam
paśūkhām
kārṣmaryamayyau vapāśrapaṇyau
dviśṛṅgaikaśṛṅge
audumbaram āsyadaghnaṃ maitrāvaruṇadaṇḍam
darbhāṇāṃ raśane dviguṇāṃ dvivyāyāmāṃ triguṇāṃ trivyāyāmāṃ saṃsādya prokṣya pātrāṇy ājyaṃ nirvapati dadhi ca
- 12
पृषदाज्यधूमैर्दधि संस्करोत्य् उपभृद्धर्मैः पृषदाज्यधानीं पात्राणि च पात्रधर्मैः द्वितीयानि
pṛṣadājyadhūmairdadhi saṃskaroty upabhṛddharmaiḥ pṛṣadājyadhānīṃ pātrāṇi ca pātradharmaiḥ dvitīyāni
- 13
स्फ्यप्रक्षालनप्रभृति समानम् आज्यग्रहेभ्यः
sphyaprakṣālanaprabhṛti samānam ājyagrahebhyaḥ
- 14
चतुर् उपभृति गृहीत्वा पञ्चगृहीतं पृषदाज्यधान्याम् आज्येन संनीय महीनां पयो ऽसि विश्वेषां देवानां तनूरसि
ऋध्यासम् अद्य पृषतीनां ग्रहम्
पृषतीनां ग्रहो ऽसि विष्णोर्हृदयम् असीति पर्यायैः
catur upabhṛti gṛhītvā pañcagṛhītaṃ pṛṣadājyadhānyām ājyena saṃnīya mahīnāṃ payo 'si viśveṣāṃ devānāṃ tanūrasi
ṛdhyāsam adya pṛṣatīnāṃ graham
pṛṣatīnāṃ graho 'si viṣṇorhṛdayam asīti paryāyaiḥ
- 15
सन्नेष्व् आज्येषु यूपावटं परिलिखति इदम् अहं रक्षसो ग्रीवा अपिकृन्तामीति पूर्वस्य वेद्यन्तस्य मध्ये ऽर्धम् अन्तर्वेद्य् अर्धं बहिर्वेदि
sanneṣv ājyeṣu yūpāvaṭaṃ parilikhati idam ahaṃ rakṣaso grīvā apikṛntāmīti pūrvasya vedyantasya madhye 'rdham antarvedy ardhaṃ bahirvedi
- 16
उत्तरतश्चात्वालस्य शामित्रलक्षणम् उद्धन्ति
uttarataścātvālasya śāmitralakṣaṇam uddhanti

