21 shlokas
- 1
षोडशवर्षस्य गोदानम्
अग्निं वाध्येष्यमाणस्य
अग्निगोदानो मैत्रायणिः
ṣoḍaśavarṣasya godānam
agniṃ vādhyeṣyamāṇasya
agnigodāno maitrāyaṇiḥ
- 2
जटाकरणेनोक्तो मन्त्रविधिः
jaṭākaraṇenokto mantravidhiḥ
- 3
उपस्थ उपकक्षयोश्चाधिको मन्त्रप्रयोगः
यत्क्षुरेण मर्चयता सुपेशसा वप्तर्वपसि केशश्मश्रून्
शुन्ध शिरो मुखं मास्यायुः प्रमोषीः
इति
upastha upakakṣayoścādhiko mantraprayogaḥ
yatkṣureṇa marcayatā supeśasā vaptarvapasi keśaśmaśrūn
śundha śiro mukhaṃ māsyāyuḥ pramoṣīḥ
iti
- 4
भूमौ केशान्निखनेत्
bhūmau keśānnikhanet
- 5
अन्ते गां दद्यात्
ante gāṃ dadyāt
- 6
वेदे गुरुणानुज्ञातः स्नायात्
vede guruṇānujñātaḥ snāyāt
- 7
छन्दस्य् अर्थान्बुद्ध्वा स्नास्यन्गां कारयेत्
chandasy arthānbuddhvā snāsyangāṃ kārayet
- 8
आचार्यमर्हयेत्
ācāryamarhayet
- 9
आपो हि ष्ठेति तिसृभिः हिरण्यवर्णाः शुचय इति चतसृभिः स्नात्वाहते वाससी परिदधीत वस्वसि वसुमन्तं मां कुरु सौवर्चसाय वां तेजसे ब्रह्मवर्चसाय परिदधानीति
āpo hi ṣṭheti tisṛbhiḥ hiraṇyavarṇāḥ śucaya iti catasṛbhiḥ snātvāhate vāsasī paridadhīta vasvasi vasumantaṃ māṃ kuru sauvarcasāya vāṃ tejase brahmavarcasāya paridadhānīti
- 10
विश्वजनस्य छायासीति छत्त्रं धारयते
viśvajanasya chāyāsīti chattraṃ dhārayate
- 11
मालामाबध्नीते याम् अश्विनौ धारयेतां बृहतीं पुष्करस्रजम्
तां विश्वैर्देवैर् अनुमतां मालामारोपयामि
इति
mālāmābadhnīte yām aśvinau dhārayetāṃ bṛhatīṃ puṣkarasrajam
tāṃ viśvairdevair anumatāṃ mālāmāropayāmi
iti
- 12
तेजो ऽसीति हिरण्यं बिभृयात्
tejo 'sīti hiraṇyaṃ bibhṛyāt
- 13
प्रतिष्ठे स्थो देवते मा मा संताप्तम् इत्युपानहौ
pratiṣṭhe stho devate mā mā saṃtāptam ityupānahau
- 14
विष्टम्भो ऽसीति धारयेद्वैणवीं यष्टिम्
viṣṭambho 'sīti dhārayedvaiṇavīṃ yaṣṭim
- 15
सोदकं च कमण्डलुम्
sodakaṃ ca kamaṇḍalum
- 16
नित्यव्रतान्य् आहुर् आचार्याः
nityavratāny āhur ācāryāḥ
- 17
द्विवस्त्रो ऽत ऊर्ध्वम्
शोभनं वासो भर्तव्यमिति श्रुतिः
dvivastro 'ta ūrdhvam
śobhanaṃ vāso bhartavyamiti śrutiḥ
- 18
आमन्त्र्य गुरून्गुर्वधीनांश्च स्वान्गृहान्व्रजेत्
āmantrya gurūngurvadhīnāṃśca svāngṛhānvrajet
- 19
प्रतिषिद्धम् अपरया द्वारा निःसरणं मलवद्वाससा सह सम्भाषा रजस्वद्वाससा सह शय्या गोर्गुरोर्दुरुक्तवचनम् अस्थाने शयनं स्थानं स्मयनं यानं गानं स्मरणमिति
तानि वर्जयेत्
pratiṣiddham aparayā dvārā niḥsaraṇaṃ malavadvāsasā saha sambhāṣā rajasvadvāsasā saha śayyā gorgurorduruktavacanam asthāne śayanaṃ sthānaṃ smayanaṃ yānaṃ gānaṃ smaraṇamiti
tāni varjayet
- 20
याजनं वृत्तिः
उञ्छं शिलम् अयाचितप्रतिग्रहः साधुभ्यो वा याचितम्
असंसिध्यमानायां वा वैश्यवृत्तिः
yājanaṃ vṛttiḥ
uñchaṃ śilam ayācitapratigrahaḥ sādhubhyo vā yācitam
asaṃsidhyamānāyāṃ vā vaiśyavṛttiḥ
- 21
स्वाध्यायविरोधिनो ऽर्थान् उत्सृजेत्
svādhyāyavirodhino 'rthān utsṛjet

