6 shlokas
- 1
अथ प्रवदने कन्यामुपवसितां स्नातां सशिरस्काम् अहतेनाच्छिन्नदशेन वाससा संवीतां संस्तीर्णस्य पुरस्ताद्विहितानि वादित्राणि विधिवदुपकल्प्य पुरस्तात्स्विष्टकृतो वाचे पथ्यायै पूष्णे पृथिव्या अग्नये सेनायै धेनायै गायत्र्यै त्रिष्टुभे जगत्या अनुष्टुभे पङ्क्तये विराजे राकायै सिनीवाल्यै कुह्वै त्वष्ट्र आशायै सम्पत्त्यै भूत्यै निरृत्या अनुमत्यै पर्जन्यायाग्नये स्विष्टकृते च जुहुयात्
atha pravadane kanyāmupavasitāṃ snātāṃ saśiraskām ahatenācchinnadaśena vāsasā saṃvītāṃ saṃstīrṇasya purastādvihitāni vāditrāṇi vidhivadupakalpya purastātsviṣṭakṛto vāce pathyāyai pūṣṇe pṛthivyā agnaye senāyai dhenāyai gāyatryai triṣṭubhe jagatyā anuṣṭubhe paṅktaye virāje rākāyai sinīvālyai kuhvai tvaṣṭra āśāyai sampattyai bhūtyai nirṛtyā anumatyai parjanyāyāgnaye sviṣṭakṛte ca juhuyāt
- 2
आज्यशेषेण पाणी प्रलिप्य कन्याया मुखं संमार्ष्टि प्रियां करोमि पतये देवराणां श्वशुराय च
रुच्यै त्वाग्निः संसृजतु रुचिष्या पतये भव
सौभाग्येन त्वा संसृजत्व् इळा देवी घृतपदीन्द्राण्य् अग्नाय्यश्विनी राट्
वाग् इळा द्यौर् अरुन्धती
इति च
ājyaśeṣeṇa pāṇī pralipya kanyāyā mukhaṃ saṃmārṣṭi priyāṃ karomi pataye devarāṇāṃ śvaśurāya ca
rucyai tvāgniḥ saṃsṛjatu ruciṣyā pataye bhava
saubhāgyena tvā saṃsṛjatv il̤ā devī ghṛtapadīndrāṇy agnāyyaśvinī rāṭ
vāg il̤ā dyaur arundhatī
iti ca
- 3
सर्वाणि वादित्राण्य् अभिमन्त्रयते या चतुर्धा प्रवदत्य् अग्नौ या वाते या बृहत्युत
पशूनां यां ब्राह्मणे न्यदधुः शिवा सा प्रवदत्व् इह
इति
sarvāṇi vāditrāṇy abhimantrayate yā caturdhā pravadaty agnau yā vāte yā bṛhatyuta
paśūnāṃ yāṃ brāhmaṇe nyadadhuḥ śivā sā pravadatv iha
iti
- 4
सर्वाणि वादित्राण्य् अलंकृत्य कन्या प्रवादयते शुभं वद दुन्दुभे सुप्रजास्त्वाय गोमुख
प्रक्रीडन्तु कन्याः सुमनस्यमानाः सहेन्द्राण्या सवयसः सनीडाः
प्रजापतिर्यो वसति प्रजासु प्रजास्तन्वते सुमनस्यमानाः
स इमाः प्रजा रमयतु प्रजात्यै स्वयं च नो रमतां शं दधानः
इति
sarvāṇi vāditrāṇy alaṃkṛtya kanyā pravādayate śubhaṃ vada dundubhe suprajāstvāya gomukha
prakrīḍantu kanyāḥ sumanasyamānāḥ sahendrāṇyā savayasaḥ sanīḍāḥ
prajāpatiryo vasati prajāsu prajāstanvate sumanasyamānāḥ
sa imāḥ prajā ramayatu prajātyai svayaṃ ca no ramatāṃ śaṃ dadhānaḥ
iti
- 5
प्रवदन्ति कारालिकानि
pravadanti kārālikāni
- 6
कन्याम् उदकेनाभिषिञ्चेत्
kanyām udakenābhiṣiñcet

