4 shlokas
- 1
अथ पुण्याहं पञ्चावराञ्छ्रोत्रियान् आहूयाभिपूजयति
atha puṇyāhaṃ pañcāvarāñchrotriyān āhūyābhipūjayati
- 2
आचार्यः करकं धारास्वित्य् अद्भिर् आपूर्येदम् आपः शिवा इत्य् अपो ऽभिमन्त्र्य पुष्पाद्यैः सर्वतीर्थजलम् इत्यभ्यर्च्य प्रतिवाचकान्प्राङ्मुखान् उदङ्मुखान्वा स्थापयित्वोदङ्मुखः सुपुण्याहं करोमीति संकल्प्य स्वस्ति सुप्रोक्षितम् अस्त्विति स्थानं प्रोक्ष्य प्रजापतिः प्रियताम् इत्युक्त्वा तैः प्रियताम् इति वाचयति
ācāryaḥ karakaṃ dhārāsvity adbhir āpūryedam āpaḥ śivā ity apo 'bhimantrya puṣpādyaiḥ sarvatīrthajalam ityabhyarcya prativācakānprāṅmukhān udaṅmukhānvā sthāpayitvodaṅmukhaḥ supuṇyāhaṃ karomīti saṃkalpya svasti suprokṣitam astviti sthānaṃ prokṣya prajāpatiḥ priyatām ityuktvā taiḥ priyatām iti vācayati
- 3
शाम्यन्तु घोराणीत्युत्तरान्तं त्रिर् अपः स्रावयति
śāmyantu ghorāṇītyuttarāntaṃ trir apaḥ srāvayati
- 4
अतो देवा इत्यग्रं दैविके सं त्वा सिञ्चामीत्यग्रं सूतके शुची वो हव्येत्यग्रं प्रेतके द्रविणोदाः सविता नवो नवो विद्युच्छतं जीवाष्टौ देवा हिरण्यरूप ऋध्याम स्तोममाहार्षं त्वार्यमणं सोमम्राजानम् इन्द्रावरुणा श्रिये जातो या गुङ्गुर्यस्त्वा हृदा यस्मै त्वं नर्य प्रजां सुत्रामाणं शतायुधाय दक्षिणावतां भद्रं कर्णेभिः शतमिन्न्व् अदितिर्द्यौर् इत्यृत्विजः सर्वे वदेयुः
ato devā ityagraṃ daivike saṃ tvā siñcāmītyagraṃ sūtake śucī vo havyetyagraṃ pretake draviṇodāḥ savitā navo navo vidyucchataṃ jīvāṣṭau devā hiraṇyarūpa ṛdhyāma stomamāhārṣaṃ tvāryamaṇaṃ somamrājānam indrāvaruṇā śriye jāto yā guṅguryastvā hṛdā yasmai tvaṃ narya prajāṃ sutrāmāṇaṃ śatāyudhāya dakṣiṇāvatāṃ bhadraṃ karṇebhiḥ śataminnv aditirdyaur ityṛtvijaḥ sarve vadeyuḥ

