12 shlokas
- 1
वानप्रस्थो नित्यस्वाध्यायी कुशेध्मादीन् अग्न्यर्थं शाकमूलफलान्य् अशनार्थं च शुचौ जातान्य् आहरेत्
vānaprastho nityasvādhyāyī kuśedhmādīn agnyarthaṃ śākamūlaphalāny aśanārthaṃ ca śucau jātāny āharet
- 2
अन्याधीनम् अन्योत्सृष्टम् अशुचौ जातं गोरसं च वर्जयेत्
anyādhīnam anyotsṛṣṭam aśucau jātaṃ gorasaṃ ca varjayet
- 3
धान्यधनसंचयं न कुर्वीत
dhānyadhanasaṃcayaṃ na kurvīta
- 4
वस्त्रं नाच्छादयेत्
vastraṃ nācchādayet
- 5
मधूक्ते तोयं मांसोक्ते पैष्टिकं गृह्णाति
madhūkte toyaṃ māṃsokte paiṣṭikaṃ gṛhṇāti
- 6
सर्वभूतेषु दयालुः समः क्षान्तः शुचिर्निरसूयकः सुखे निःस्पृहो मङ्गल्यवाणीर्ष्याकार्पण्यवर्जी मत्स्यादीन्दंशकान्सीरकृष्टजातानि कन्दमूलफलशाकादीनि च त्यजन्जटाश्मश्रुरोमनखानि धारयंस्त्रिकालस्नायी धराशयो वन्यैर् एव चरुपुरोडाशान्निर्वपेत्
sarvabhūteṣu dayāluḥ samaḥ kṣāntaḥ śucirnirasūyakaḥ sukhe niḥspṛho maṅgalyavāṇīrṣyākārpaṇyavarjī matsyādīndaṃśakānsīrakṛṣṭajātāni kandamūlaphalaśākādīni ca tyajanjaṭāśmaśruromanakhāni dhārayaṃstrikālasnāyī dharāśayo vanyair eva carupuroḍāśānnirvapet
- 7
पलाण्ड्वादीन्निर्यासं श्वेतवृन्ताकं सुनिषण्णकं श्लेष्मातकं व्रजकलिं चित्रकं शिग्रुं भूस्तृणं कोविदारं मूलकं च वर्जयति
palāṇḍvādīnniryāsaṃ śvetavṛntākaṃ suniṣaṇṇakaṃ śleṣmātakaṃ vrajakaliṃ citrakaṃ śigruṃ bhūstṛṇaṃ kovidāraṃ mūlakaṃ ca varjayati
- 8
मुनेः सर्वं मांसं गोमांसतुल्यं धान्याम्लं सुरासमं भवति
muneḥ sarvaṃ māṃsaṃ gomāṃsatulyaṃ dhānyāmlaṃ surāsamaṃ bhavati
- 9
पूर्वसंचिताशनं पूर्वाणि वसनान्य् आश्वयुजे मासि त्यजति
pūrvasaṃcitāśanaṃ pūrvāṇi vasanāny āśvayuje māsi tyajati
- 10
वेदवेदान्तेन ध्यानयोगी तपः समाचरति
vedavedāntena dhyānayogī tapaḥ samācarati
- 11
अपत्नीको ऽनग्निर् अदारो ऽनिकेतनो वृक्षमूले वसन्वनस्थाश्रमेषु गृहस्थानां गृहेषु वा भिक्षां भिक्षित्वाम्बुपार्श्वे शुद्धे पर्णे प्राणयात्रामात्रम् अन्नं भिक्षुवद् अश्नाति
apatnīko 'nagnir adāro 'niketano vṛkṣamūle vasanvanasthāśrameṣu gṛhasthānāṃ gṛheṣu vā bhikṣāṃ bhikṣitvāmbupārśve śuddhe parṇe prāṇayātrāmātram annaṃ bhikṣuvad aśnāti
- 12
शरीरं शोषयन्न् उत्तरम् उत्तरं तीव्रं तपः कुर्यात्
śarīraṃ śoṣayann uttaram uttaraṃ tīvraṃ tapaḥ kuryāt

