14 shlokas
- 1
चातुर्वर्ण्यसंकरेणोत्पन्नानाम् अनुलोमप्रतिलोमान्तरालव्रात्यानाम् उत्पत्तिं नाम वृत्तिं च
cāturvarṇyasaṃkareṇotpannānām anulomapratilomāntarālavrātyānām utpattiṃ nāma vṛttiṃ ca
- 2
ऊर्ध्वजाताद् अधोजातायां जातो ऽनुलोमः
ūrdhvajātād adhojātāyāṃ jāto 'nulomaḥ
- 3
अधरोत्पन्नाद् ऊर्ध्वजातायां जातः प्रतिलोमः
adharotpannād ūrdhvajātāyāṃ jātaḥ pratilomaḥ
- 4
ततो ऽनुलोमाद् अनुलोम्यां जातो ऽन्तरालः
tato 'nulomād anulomyāṃ jāto 'ntarālaḥ
- 5
प्रतिलोमात्प्रतिलोम्यां जातो व्रात्यो भवति
pratilomātpratilomyāṃ jāto vrātyo bhavati
- 6
ब्रह्मणो मुखाद् उद्भूता ब्राह्मणा ब्राह्मण्यश्च ब्रह्मर्षयः पत्न्यो बभूवुः
brahmaṇo mukhād udbhūtā brāhmaṇā brāhmaṇyaśca brahmarṣayaḥ patnyo babhūvuḥ
- 7
तेषां गात्रोत्पन्नाद्ब्राह्मण्याम् असगोत्रायां विधिना समन्त्रकं गृहीतायां जातो ब्राह्मणः शुद्धो भवेत्
teṣāṃ gātrotpannādbrāhmaṇyām asagotrāyāṃ vidhinā samantrakaṃ gṛhītāyāṃ jāto brāhmaṇaḥ śuddho bhavet
- 8
विधिहीनम् अन्यपूर्वायां मृतभर्तृकायां गोलको जीवभर्तृकायां कुण्डश्च विप्रौ द्वौ निन्दितौ स्याताम्
vidhihīnam anyapūrvāyāṃ mṛtabhartṛkāyāṃ golako jīvabhartṛkāyāṃ kuṇḍaśca viprau dvau ninditau syātām
- 9
तस्माद् अधो बाहुभ्याम् उत्पन्नात्क्षत्रियात्क्षत्रियायां विधिवज्जातः क्षत्रियः शुद्धः
tasmād adho bāhubhyām utpannātkṣatriyātkṣatriyāyāṃ vidhivajjātaḥ kṣatriyaḥ śuddhaḥ
- 10
तयोर् अविधिकं गूढोत्पन्नो ऽशुद्धो भोजाख्यो नैवाभिषेच्यः पट्टबन्धो राज्ञः सैनापत्यं करोति
tayor avidhikaṃ gūḍhotpanno 'śuddho bhojākhyo naivābhiṣecyaḥ paṭṭabandho rājñaḥ saināpatyaṃ karoti
- 11
शुद्धाभावे ऽपट्टबन्धो नॄन्पायात्
śuddhābhāve 'paṭṭabandho nṝnpāyāt
- 12
तद्वृत्तं राजवत्स्यात्
tadvṛttaṃ rājavatsyāt
- 13
अधस्ताद् ऊरुभ्याम् उत्पन्नाद्वैश्याद्वैश्यायां तथा वैश्यः शुद्धः
adhastād ūrubhyām utpannādvaiśyādvaiśyāyāṃ tathā vaiśyaḥ śuddhaḥ
- 14
विधिवर्जं मणिकारो ऽशुद्धो मणिमुक्तादिवेधः शङ्खवलयकारी स्यात्
vidhivarjaṃ maṇikāro 'śuddho maṇimuktādivedhaḥ śaṅkhavalayakārī syāt

