7 shlokas
- 1
देवस्य त्वा यो मे दण्डः सखा मे गोपायेति त्रिभिस्त्रिदण्डं यद् अस्य पारे रजस इति शिक्यं येन देवाः पवित्रेणेत्य् अप्पवित्रं येन देवा ज्योतिषेति कमण्डलुमृद्ग्रहण्याव् आददीत
devasya tvā yo me daṇḍaḥ sakhā me gopāyeti tribhistridaṇḍaṃ yad asya pāre rajasa iti śikyaṃ yena devāḥ pavitreṇety appavitraṃ yena devā jyotiṣeti kamaṇḍalumṛdgrahaṇyāv ādadīta
- 2
स्नात्वाघमर्षणसूक्तेनाघमर्षणं कुर्यात्
snātvāghamarṣaṇasūktenāghamarṣaṇaṃ kuryāt
- 3
आचम्य षोडश प्राणायामान्कृत्वा सहस्रं शतं वा सावित्रीं जप्त्वा तथा भिक्षापात्रम् अलाबु दारवं मृन्मयं वा गृह्णाति
ācamya ṣoḍaśa prāṇāyāmānkṛtvā sahasraṃ śataṃ vā sāvitrīṃ japtvā tathā bhikṣāpātram alābu dāravaṃ mṛnmayaṃ vā gṛhṇāti
- 4
प्रणवाद्यादिभिः पृथक्पृथक्सप्तव्याहृतिभिस्तर्पयामीति देवेभ्यो जले ऽद्भिस्तर्पयित्वाद्याभिश्चतसृभिः स्वधेति पितृभ्यस्तर्पयेत्
praṇavādyādibhiḥ pṛthakpṛthaksaptavyāhṛtibhistarpayāmīti devebhyo jale 'dbhistarpayitvādyābhiścatasṛbhiḥ svadheti pitṛbhyastarpayet
- 5
उद्वयं तमस इत्य् आदित्यम् उपतिष्ठेत
udvayaṃ tamasa ity ādityam upatiṣṭheta
- 6
जलाञ्जलिं विसृज्याभयं सर्वभूतेभ्यो दद्यात्
jalāñjaliṃ visṛjyābhayaṃ sarvabhūtebhyo dadyāt
- 7
अध्यात्मरतो यतिर्भिक्षाशी नियमयमांश्च समाचरन्संयतेन्द्रियो ध्यानयोगेन परमात्मानम् ईक्षते
adhyātmarato yatirbhikṣāśī niyamayamāṃśca samācaransaṃyatendriyo dhyānayogena paramātmānam īkṣate

