8 shlokas
- 1
वानप्रस्थाः सपत्नीकापत्नीकाश्चेति
vānaprasthāḥ sapatnīkāpatnīkāśceti
- 2
सपत्नीकाश्चतुर्विधा औदुम्बरो वैरिञ्चो वालखिल्यः फेनपश्चेति
sapatnīkāścaturvidhā audumbaro vairiñco vālakhilyaḥ phenapaśceti
- 3
औदुम्बरो ऽकृष्टफलावाप्यौषधिभोजी मूलफलाशी वाणहिङ्गुलशुनमधुमत्स्यमांसपूत्यन्नधान्याम्लपरस्पर्शनपरपाकवर्जी देवर्षिपितृमनुष्यपूजी वनचरो ग्रामबहिष्कृतः सायं प्रातर् अग्निहोत्रं हुत्वा श्रामणकाग्निहोमं वैश्वदेवहोमं कुर्वंस्तपः समाचरति
audumbaro 'kṛṣṭaphalāvāpyauṣadhibhojī mūlaphalāśī vāṇahiṅgulaśunamadhumatsyamāṃsapūtyannadhānyāmlaparasparśanaparapākavarjī devarṣipitṛmanuṣyapūjī vanacaro grāmabahiṣkṛtaḥ sāyaṃ prātar agnihotraṃ hutvā śrāmaṇakāgnihomaṃ vaiśvadevahomaṃ kurvaṃstapaḥ samācarati
- 4
श्रामणकाग्निम् एकम् एवाधाय जुहोतीत्य् एके
śrāmaṇakāgnim ekam evādhāya juhotīty eke
- 5
वैरिञ्चः प्रातर्यां दिशं प्रेक्षते तां दिशं गत्वा तत्र प्रियङ्गुयवश्यामाकनीवारादिभिर्लब्धैः स्वकीयान् अतिथींश्च पोषयित्वाग्निहोत्रश्रामणकवैश्वदेवहोमी नारायणपरायणस्तपःशीलो भवति
vairiñcaḥ prātaryāṃ diśaṃ prekṣate tāṃ diśaṃ gatvā tatra priyaṅguyavaśyāmākanīvārādibhirlabdhaiḥ svakīyān atithīṃśca poṣayitvāgnihotraśrāmaṇakavaiśvadevahomī nārāyaṇaparāyaṇastapaḥśīlo bhavati
- 6
वालखिल्यो जटाधरश्चीरवल्कलवसनो ऽर्काग्निः कार्त्तिक्यां पौर्णमास्यां पुष्कलं भुक्तम् उत्सृज्यान्यथा शेषान्मासान् उपजीव्य तपः कुर्यात्
vālakhilyo jaṭādharaścīravalkalavasano 'rkāgniḥ kārttikyāṃ paurṇamāsyāṃ puṣkalaṃ bhuktam utsṛjyānyathā śeṣānmāsān upajīvya tapaḥ kuryāt
- 7
अस्य सूर्य एवाग्निर्भवतीत्य् आमनन्ति
asya sūrya evāgnirbhavatīty āmananti
- 8
फेनप उद्दण्डक उन्मत्तको निरोधकः शीर्णपतितपत्त्राहारी चान्द्रायणव्रतं चरन्पृथिवीशायी नारायणं ध्यायन्मोक्षम् एव प्रार्थयते
phenapa uddaṇḍaka unmattako nirodhakaḥ śīrṇapatitapattrāhārī cāndrāyaṇavrataṃ caranpṛthivīśāyī nārāyaṇaṃ dhyāyanmokṣam eva prārthayate

