6 shlokas
- 1
गृहस्थाश्चतुर्विधा वार्त्तावृत्तिः शालीनवृत्तिर्यायावरो घोराचारिकश्चेति
gṛhasthāścaturvidhā vārttāvṛttiḥ śālīnavṛttiryāyāvaro ghorācārikaśceti
- 2
वार्त्तावृत्तिः कृषिगोरक्ष्यवाणिज्योपजीवी
vārttāvṛttiḥ kṛṣigorakṣyavāṇijyopajīvī
- 3
शालीनवृत्तिर्नियमैर्युतः पाकयज्ञैर् इष्ट्वाग्नीन् आधाय पक्षे पक्षे दर्शपूर्णमासयाजी चतुर्षु चतुर्षु मासेषु चातुर्मास्ययाजी षट्सु षट्सु मासेषु पशुबन्धयाजी प्रतिसंवत्सरं सोमयाजी च
śālīnavṛttirniyamairyutaḥ pākayajñair iṣṭvāgnīn ādhāya pakṣe pakṣe darśapūrṇamāsayājī caturṣu caturṣu māseṣu cāturmāsyayājī ṣaṭsu ṣaṭsu māseṣu paśubandhayājī pratisaṃvatsaraṃ somayājī ca
- 4
यायावरो हविर्यज्ञैः सोमयज्ञैश्च यजते याजयत्य् अधीते ऽध्यापयति ददाति प्रतिगृह्णाति षट्कर्मनिरतो नित्यमग्निपरिचरणम् अतिथिभ्यो ऽभ्यागतेभ्यो ऽन्नाद्यं च कुरुते
yāyāvaro haviryajñaiḥ somayajñaiśca yajate yājayaty adhīte 'dhyāpayati dadāti pratigṛhṇāti ṣaṭkarmanirato nityamagniparicaraṇam atithibhyo 'bhyāgatebhyo 'nnādyaṃ ca kurute
- 5
घोराचारिको नियमैर्युक्तो यजते न याजयत्य् अधीते नाध्यापयति ददाति न प्रतिगृह्णात्य् उञ्छवृत्तिम् उपजीवति
ghorācāriko niyamairyukto yajate na yājayaty adhīte nādhyāpayati dadāti na pratigṛhṇāty uñchavṛttim upajīvati
- 6
नारायणपरायणः सायं प्रातर् अग्निहोत्रं हुत्वा मार्गशीर्षज्येष्ठमासयोर् असिधाराव्रतं वनौषधिभिर् अग्निपरिचरणं करोति
nārāyaṇaparāyaṇaḥ sāyaṃ prātar agnihotraṃ hutvā mārgaśīrṣajyeṣṭhamāsayor asidhārāvrataṃ vanauṣadhibhir agniparicaraṇaṃ karoti

