6 shlokas
- 1
ब्रह्मचारिणश्चतुर्विधा गायत्रो ब्राह्मः प्राजापत्यो नैष्ठिक इति
brahmacāriṇaścaturvidhā gāyatro brāhmaḥ prājāpatyo naiṣṭhika iti
- 2
गायत्रोपनयनाद् ऊर्ध्वं त्रिरात्रम् अक्षारलवणाशी गायत्रीम् अधीत्या सावित्रव्रतसमाप्तेर् अत्र व्रतचारी
gāyatropanayanād ūrdhvaṃ trirātram akṣāralavaṇāśī gāyatrīm adhītyā sāvitravratasamāpter atra vratacārī
- 3
ब्राह्मः सावित्रव्रताद् ऊर्ध्वम् अनभिशस्तापतितानां गृहस्थानां गृहेषु भैक्षाचरणं वेदव्रतचरणं च कृत्वा द्वादश समा विंशतिसमा वा गुरुकुले स्थित्वा वेदान्वेदौ वेदं वा सूत्रसहितम् अध्ययनं कृत्वा गार्हस्थ्यानुसरणं कुर्यात्
brāhmaḥ sāvitravratād ūrdhvam anabhiśastāpatitānāṃ gṛhasthānāṃ gṛheṣu bhaikṣācaraṇaṃ vedavratacaraṇaṃ ca kṛtvā dvādaśa samā viṃśatisamā vā gurukule sthitvā vedānvedau vedaṃ vā sūtrasahitam adhyayanaṃ kṛtvā gārhasthyānusaraṇaṃ kuryāt
- 4
प्राजापत्यः स्नात्वा नित्यकर्मब्रह्मचर्यशीलो नारायणपरायणो वेदवेदाङ्गार्थान्विचार्य दारसंग्रहणं करोति
prājāpatyaḥ snātvā nityakarmabrahmacaryaśīlo nārāyaṇaparāyaṇo vedavedāṅgārthānvicārya dārasaṃgrahaṇaṃ karoti
- 5
प्राजापत्ये त्रिसंवत्सराद् ऊर्ध्वं न तिष्ठेद् इत्य् ऋषयो वदन्ति
prājāpatye trisaṃvatsarād ūrdhvaṃ na tiṣṭhed ity ṛṣayo vadanti
- 6
नैष्ठिकः काषायं धातुवस्त्रम् अजिनं वल्कलं वा परिधाय जटी शिखी वा मेखली दण्डी सूत्राजिनधारी ब्रह्मचारी शुचिर् अक्षारलवणाशी यावद् आत्मनो विप्रयोगस्तावद्गुरुकुले स्थित्वा निवेदितभैक्षभोजी भवति
naiṣṭhikaḥ kāṣāyaṃ dhātuvastram ajinaṃ valkalaṃ vā paridhāya jaṭī śikhī vā mekhalī daṇḍī sūtrājinadhārī brahmacārī śucir akṣāralavaṇāśī yāvad ātmano viprayogastāvadgurukule sthitvā niveditabhaikṣabhojī bhavati

