6 shlokas
- 1
ब्रह्मवादिनो वदन्ति
यद्दशहोतारः सत्त्रम् आसत
केन ते गृहपतिनार्ध्नुवन्
केन प्रजा असृजन्तेति
प्रजापतिना वै ते गृहपतिनार्ध्नुवन्
तेन प्रजा असृजन्त
यच्चतुर्होतारः सत्त्रम् आसत
केन ते गृहपतिनार्ध्नुवन्
केनौषधीर् असृजन्तेति
सोमेन वै ते गृहपतिनार्ध्नुवन्
brahmavādino vadanti
yaddaśahotāraḥ sattram āsata
kena te gṛhapatinārdhnuvan
kena prajā asṛjanteti
prajāpatinā vai te gṛhapatinārdhnuvan
tena prajā asṛjanta
yaccaturhotāraḥ sattram āsata
kena te gṛhapatinārdhnuvan
kenauṣadhīr asṛjanteti
somena vai te gṛhapatinārdhnuvan
- 2
तेनौषधीर् असृजन्त
यत्पञ्चहोतारः सत्त्रम् आसत
केन ते गृहपतिनार्ध्नुवन्
केनैभ्यो लोकेभ्यो ऽसुरान्प्राणुदन्त
केनैषां पशून् अवृञ्जतेति
अग्निना वै ते गृहपतिनार्ध्नुवन्
तेनैभ्यो लोकेभ्यो ऽसुरान्प्राणुदन्त
तेनैषां पशून् अवृञ्जत
यत्षड्ढोतारः सत्त्रम् आसत
केन ते गृहपतिनार्ध्नुवन्
tenauṣadhīr asṛjanta
yatpañcahotāraḥ sattram āsata
kena te gṛhapatinārdhnuvan
kenaibhyo lokebhyo 'surānprāṇudanta
kenaiṣāṃ paśūn avṛñjateti
agninā vai te gṛhapatinārdhnuvan
tenaibhyo lokebhyo 'surānprāṇudanta
tenaiṣāṃ paśūn avṛñjata
yatṣaḍḍhotāraḥ sattram āsata
kena te gṛhapatinārdhnuvan
- 3
केनर्तून् अकल्पयन्तेति
धात्रा वै ते गृहपतिनार्ध्नुवन्
तेनर्तून् अकल्पयन्त
यत्सप्तहोतारः सत्त्रम् आसत
केन ते गृहपतिनार्ध्नुवन्
केन सुवर् आयन्
केनेमांल्लोकान्त्समतन्वन्न् इति
अर्यम्णा वै ते गृहपतिनार्ध्नुवन्
तेन सुवर् आयन्
तेनेमांल्लोकान्समतन्वन्न् इति
kenartūn akalpayanteti
dhātrā vai te gṛhapatinārdhnuvan
tenartūn akalpayanta
yatsaptahotāraḥ sattram āsata
kena te gṛhapatinārdhnuvan
kena suvar āyan
kenemāṃllokāntsamatanvann iti
aryamṇā vai te gṛhapatinārdhnuvan
tena suvar āyan
tenemāṃllokānsamatanvann iti
- 4
एते वै देवा गृहपतयः
तान्य एवं विद्वान्
अप्य् अन्यस्य गार्हपते दीक्षते
अवान्तरम् एव सत्त्रिणाम् ऋध्नोति
यो वा अर्यमणं वेद
दानकामा अस्मै प्रजा भवन्ति
यज्ञो वा अर्यमा
आर्या वसतिर् इति वै तम् आहुर्यं प्रशंसन्ति
आर्या वसतिर्भवति
य एवं वेद
ete vai devā gṛhapatayaḥ
tānya evaṃ vidvān
apy anyasya gārhapate dīkṣate
avāntaram eva sattriṇām ṛdhnoti
yo vā aryamaṇaṃ veda
dānakāmā asmai prajā bhavanti
yajño vā aryamā
āryā vasatir iti vai tam āhuryaṃ praśaṃsanti
āryā vasatirbhavati
ya evaṃ veda
- 5
यद्वा इदं किं च
तत्सर्वं चतुर्होतारः
चतुर्होतृभ्यो ऽधि यज्ञो निर्मितः
स य एवं विद्वान्विवदेत
अहम् एव भूयो वेद
यश्चतुर्होतॄन्वेदेति
यश्चतुर्होतॄन्वेद
यो वै चतुर्होतॄणां होतॄन्वेद
सर्वासु प्रजास्व् अन्नम् अत्ति
yadvā idaṃ kiṃ ca
tatsarvaṃ caturhotāraḥ
caturhotṛbhyo 'dhi yajño nirmitaḥ
sa ya evaṃ vidvānvivadeta
aham eva bhūyo veda
yaścaturhotṝnvedeti
yaścaturhotṝnveda
yo vai caturhotṝṇāṃ hotṝnveda
sarvāsu prajāsv annam atti
- 6
सर्वा दिशो ऽभिजयति
प्रजापतिर्वै दशहोतॄणां होता
सोमश्चतुर्होतॄणां होता
अग्निः पञ्चहोतॄणां होता
धाता षड्ढोतॄणां होता
अर्यमा सप्तहोतॄणां होता
एते वै चतुर्होतॄणां होतारः
तान्य एवं वेद
सर्वासु प्रजास्व् अन्नम् अत्ति
सर्वा दिशो ऽभिजयति
sarvā diśo 'bhijayati
prajāpatirvai daśahotṝṇāṃ hotā
somaścaturhotṝṇāṃ hotā
agniḥ pañcahotṝṇāṃ hotā
dhātā ṣaḍḍhotṝṇāṃ hotā
aryamā saptahotṝṇāṃ hotā
ete vai caturhotṝṇāṃ hotāraḥ
tānya evaṃ veda
sarvāsu prajāsv annam atti
sarvā diśo 'bhijayati

