3 shlokas
- 1
एकविंश एष भवति
एतेन वै देवा एकविंशेन
आदित्यम् इत उत्तमं सुवर्गं लोकम् आरोहयन्
स वा एष इत एकविंशः
तस्य दशावस्ताद् अहानि
दश परस्तात्
स वा एष विराज्य् उभयतः प्रतिष्ठितः
विराजि हि वा एष उभयतः प्रतिष्ठितः
तस्माद् अन्तरेमौ लोकौ यन्
सर्वेषु सुवर्गेषु लोकेष्व् अभितपन्न् एति
ekaviṃśa eṣa bhavati
etena vai devā ekaviṃśena
ādityam ita uttamaṃ suvargaṃ lokam ārohayan
sa vā eṣa ita ekaviṃśaḥ
tasya daśāvastād ahāni
daśa parastāt
sa vā eṣa virājy ubhayataḥ pratiṣṭhitaḥ
virāji hi vā eṣa ubhayataḥ pratiṣṭhitaḥ
tasmād antaremau lokau yan
sarveṣu suvargeṣu lokeṣv abhitapann eti
- 2
देवा वा आदित्यस्य सुवर्गस्य लोकस्य
पराचो ऽतिपादाद् अबिभयुः
तं छन्दोभिर् अदृंहन्धृत्यै
देवा वा आदित्यस्य सुवर्गस्य लोकस्य
अवाचो ऽवपादाद् अबिभयुः
तं पञ्चभी रश्मिभिर् उदवयन्
तस्माद् एकविंशे ऽहन्पञ्च दिवाकीर्त्यानि क्रियन्ते
रश्मयो वै दिवाकीर्त्यानि
ये गायत्रे
ते गायत्रीषूत्तरयोः पवमानयोः
devā vā ādityasya suvargasya lokasya
parāco 'tipādād abibhayuḥ
taṃ chandobhir adṛṃhandhṛtyai
devā vā ādityasya suvargasya lokasya
avāco 'vapādād abibhayuḥ
taṃ pañcabhī raśmibhir udavayan
tasmād ekaviṃśe 'hanpañca divākīrtyāni kriyante
raśmayo vai divākīrtyāni
ye gāyatre
te gāyatrīṣūttarayoḥ pavamānayoḥ
- 3
महादिवाकीर्त्यं होतुः पृष्ठम्
विकर्णं ब्रह्मसाम
भासो ऽग्निष्टोमः
अथैतानि पराणि
परैर्वै देवा आदित्यं सुवर्गं लोकम् अपारयन्
यद् अपारयन्
तत्पराणां परत्वम्
पारयन्त्य् एनं पराणि
य एवं वेद
अथैतानि स्पराणि
स्परैर्वै देवा आदित्यं सुवर्गं लोकम् अस्पारयन्
यद् अस्पारयन्
तत्स्पराणां स्परत्वम्
स्पारयन्त्य् एनं स्पराणि
य एवं वेद
mahādivākīrtyaṃ hotuḥ pṛṣṭham
vikarṇaṃ brahmasāma
bhāso 'gniṣṭomaḥ
athaitāni parāṇi
parairvai devā ādityaṃ suvargaṃ lokam apārayan
yad apārayan
tatparāṇāṃ paratvam
pārayanty enaṃ parāṇi
ya evaṃ veda
athaitāni sparāṇi
sparairvai devā ādityaṃ suvargaṃ lokam aspārayan
yad aspārayan
tatsparāṇāṃ sparatvam
spārayanty enaṃ sparāṇi
ya evaṃ veda

