4 shlokas
- 1
अप्रतिष्ठां वा एते गच्छन्ति
येषां संवत्सरे ऽनाप्ते ऽथ
एकादशिन्य् आप्यते
वैष्णवं वामनम् आलभन्ते
यज्ञो वै विष्णुः
यज्ञम् एवालभन्ते प्रतिष्ठित्यै
ऐन्द्राग्नम् आलभन्ते
इन्द्राग्नी वै देवानाम् अयातयामानौ
ये एव देवते अयातयाम्नी
ते एवालभन्ते
apratiṣṭhāṃ vā ete gacchanti
yeṣāṃ saṃvatsare 'nāpte 'tha
ekādaśiny āpyate
vaiṣṇavaṃ vāmanam ālabhante
yajño vai viṣṇuḥ
yajñam evālabhante pratiṣṭhityai
aindrāgnam ālabhante
indrāgnī vai devānām ayātayāmānau
ye eva devate ayātayāmnī
te evālabhante
- 2
वैश्वदेवम् आलभन्ते
देवता एवावरुन्धते
द्यावापृथिव्यां धेनुम् आलभन्ते
द्यावापृथिव्योर् एव प्रतितिष्ठन्ति
वायव्यं वत्सम् आलभन्ते
वायुर् एवैभ्यो यथायतनाद्देवता अवरुन्धे
आदित्याम् अविं वशाम् आलभन्ते
इयं वा अदितिः
अस्याम् एव प्रतितिष्ठन्ति
मैत्रावरुणीम् आलभन्ते
vaiśvadevam ālabhante
devatā evāvarundhate
dyāvāpṛthivyāṃ dhenum ālabhante
dyāvāpṛthivyor eva pratitiṣṭhanti
vāyavyaṃ vatsam ālabhante
vāyur evaibhyo yathāyatanāddevatā avarundhe
ādityām aviṃ vaśām ālabhante
iyaṃ vā aditiḥ
asyām eva pratitiṣṭhanti
maitrāvaruṇīm ālabhante
- 3
मित्रेणैव यज्ञस्य स्विष्टं शमयन्ति
वरुणेन दुरिष्टम्
प्राजापत्यं तूपरं महाव्रत आलभन्ते
प्राजापत्यो ऽतिग्राह्यो गृह्यते
अहर् एव रूपेण समर्धयन्ति
अथो अह्न एवैष बलिर्ह्रियते
आग्नेयम् आलभन्ते प्रति प्रज्ञात्यै
अजपेत्वान्वा एते पूर्वैर्मासैर् अवरुन्धते
यद् एते गव्याः पशव आलभ्यन्ते
उभयेषां पशूनाम् अवरुद्ध्यै
mitreṇaiva yajñasya sviṣṭaṃ śamayanti
varuṇena duriṣṭam
prājāpatyaṃ tūparaṃ mahāvrata ālabhante
prājāpatyo 'tigrāhyo gṛhyate
ahar eva rūpeṇa samardhayanti
atho ahna evaiṣa balirhriyate
āgneyam ālabhante prati prajñātyai
ajapetvānvā ete pūrvairmāsair avarundhate
yad ete gavyāḥ paśava ālabhyante
ubhayeṣāṃ paśūnām avaruddhyai
- 4
यद् अतिरिक्ताम् एकादशिनीम् आलभेरन्
अप्रियं भ्रातृव्यम् अभ्यतिरिच्येत
यद्द्वौद्वौ पशू समस्येयुः
कनीय आयुः कुर्वीरन्
यद् एते ब्राह्मणवन्तः पशव आलभ्यन्ते
नाप्रियं भ्रातृव्यम् अभ्यतिरिच्यते
न कनीय आयुः कुर्वते
yad atiriktām ekādaśinīm ālabheran
apriyaṃ bhrātṛvyam abhyatiricyeta
yaddvaudvau paśū samasyeyuḥ
kanīya āyuḥ kurvīran
yad ete brāhmaṇavantaḥ paśava ālabhyante
nāpriyaṃ bhrātṛvyam abhyatiricyate
na kanīya āyuḥ kurvate

