4 shlokas
- 1
संततिर्वा एते ग्रहाः
यत्परःसामानः
विषूवान्दिवाकीर्त्यम्
यथा शालायै पक्षसी
एवं संवत्सरस्य पक्षसी
यद् एते न गृह्येरन्
विषूची संवत्सरस्य पक्षसी व्यवस्रंसेयाताम्
आर्तिम् आर्छेयुः
यद् एते गृह्यन्ते
यथा शालायै पक्षसी मध्यमं वंशम् अभि समायच्छति
saṃtatirvā ete grahāḥ
yatparaḥsāmānaḥ
viṣūvāndivākīrtyam
yathā śālāyai pakṣasī
evaṃ saṃvatsarasya pakṣasī
yad ete na gṛhyeran
viṣūcī saṃvatsarasya pakṣasī vyavasraṃseyātām
ārtim ārcheyuḥ
yad ete gṛhyante
yathā śālāyai pakṣasī madhyamaṃ vaṃśam abhi samāyacchati
- 2
एवं संवत्सरस्य पक्षसी दिवाकीर्त्यम् अभि संतन्वन्ति
नार्तिम् आर्छन्ति
एकविंशम् अहर्भवति
शुक्राग्रा ग्रहा गृह्यन्ते
प्रत्युत्तब्ध्यै सयत्वाय
सौर्य एतद् अहः पशुर् आलभ्यते
सौर्यो ऽतिग्राह्यो गृह्यते
अहर् एव रूपेण समर्धयन्ति
अथो अह्न एवैष बलिर्ह्रियते
सप्तैतद् अहर् अतिग्राह्या गृह्यन्ते
evaṃ saṃvatsarasya pakṣasī divākīrtyam abhi saṃtanvanti
nārtim ārchanti
ekaviṃśam aharbhavati
śukrāgrā grahā gṛhyante
pratyuttabdhyai sayatvāya
saurya etad ahaḥ paśur ālabhyate
sauryo 'tigrāhyo gṛhyate
ahar eva rūpeṇa samardhayanti
atho ahna evaiṣa balirhriyate
saptaitad ahar atigrāhyā gṛhyante
- 3
सप्त वै शीर्षण्याः प्राणाः
असाव् आदित्यः शिरः प्रजानाम्
शीर्षन्न् एव प्रजानां प्राणान्दधाति
तस्मात्सप्त शीर्षन्प्राणाः
इन्द्रो वृत्रं हत्वा
असुरान्पराभाव्य
स इमांल्लोकान् अभ्यजयत्
तस्यासौ लोको ऽनभिजित आसीत्
तं विश्वकर्मा भूत्वाभ्यजयत्
यद्वैश्वकर्मणो गृह्यते
sapta vai śīrṣaṇyāḥ prāṇāḥ
asāv ādityaḥ śiraḥ prajānām
śīrṣann eva prajānāṃ prāṇāndadhāti
tasmātsapta śīrṣanprāṇāḥ
indro vṛtraṃ hatvā
asurānparābhāvya
sa imāṃllokān abhyajayat
tasyāsau loko 'nabhijita āsīt
taṃ viśvakarmā bhūtvābhyajayat
yadvaiśvakarmaṇo gṛhyate
- 4
सुवर्गस्य लोकस्याभिजित्यै
प्र वा एते ऽस्माल्लोकाच्च्यवन्ते
ये वैश्वकर्मणं गृह्णते
आदित्यः श्वो गृह्यते
इयं वा अदितिः
अस्याम् एव प्रतितिष्ठन्ति
अन्योन्यो गृह्येते
विश्वान्य् एवान्येन कर्माणि कुर्वाणा यन्ति
अस्याम् अन्येन प्रतितिष्ठन्ति
ताव् आपरार्धात्संवत्सरस्यान्योन्यो गृह्येते
ताव् उभौ सह महाव्रते गृह्येते
यज्ञस्यैवान्तं गत्वा
उभयोर्लोकयोः प्रतितिष्ठन्ति
अर्क्यम् उक्थं भवति
अन्नाद्यस्यावरुद्ध्यै
suvargasya lokasyābhijityai
pra vā ete 'smāllokāccyavante
ye vaiśvakarmaṇaṃ gṛhṇate
ādityaḥ śvo gṛhyate
iyaṃ vā aditiḥ
asyām eva pratitiṣṭhanti
anyonyo gṛhyete
viśvāny evānyena karmāṇi kurvāṇā yanti
asyām anyena pratitiṣṭhanti
tāv āparārdhātsaṃvatsarasyānyonyo gṛhyete
tāv ubhau saha mahāvrate gṛhyete
yajñasyaivāntaṃ gatvā
ubhayorlokayoḥ pratitiṣṭhanti
arkyam ukthaṃ bhavati
annādyasyāvaruddhyai

