11 shlokas
- 1
सो ऽत्युपयजति
यज्ञं गच्छ स्वाहेत्य् आपो वै यज्ञ आपो रेतो रेत एवैतत्सिञ्चति
so 'tyupayajati
yajñaṃ gaccha svāhety āpo vai yajña āpo reto reta evaitatsiñcati
- 2
सोमं गच्छ स्वाहेति
रेतो वै सोमो रेत एवैतत्सिञ्चति
somaṃ gaccha svāheti
reto vai somo reta evaitatsiñcati
- 3
दिव्यं नभो गच्छ स्वाहेति
आपो वै दिव्यं नभ आपो रेतो रेत एवैतत्सिञ्चति
divyaṃ nabho gaccha svāheti
āpo vai divyaṃ nabha āpo reto reta evaitatsiñcati
- 4
अग्निं वैश्वानरं गच्छ स्वाहेति
इयं वै पृथिव्यग्निर्वैश्वानरः सेयम्प्रतिष्ठेमाम् एवैतत्प्रतिष्ठाम् अभिप्रजनयति
agniṃ vaiśvānaraṃ gaccha svāheti
iyaṃ vai pṛthivyagnirvaiśvānaraḥ seyampratiṣṭhemām evaitatpratiṣṭhām abhiprajanayati
- 5
अथ मुखं विमृष्टे
मनो मे हार्दि यच्छेति तथो होपयष्टात्मानं नानुप्रवृणक्ति
atha mukhaṃ vimṛṣṭe
mano me hārdi yaccheti tatho hopayaṣṭātmānaṃ nānupravṛṇakti
- 6
अथ जाघन्या पत्नीः संयाजयन्ति
जघनार्धो वै जाघनी जघनार्धाद्वै योषायै प्रजाः प्रजायन्ते तत्प्रैवैतज्जनयति यज्जाघन्या पत्नीः संयाजयन्ति
atha jāghanyā patnīḥ saṃyājayanti
jaghanārdho vai jāghanī jaghanārdhādvai yoṣāyai prajāḥ prajāyante tatpraivaitajjanayati yajjāghanyā patnīḥ saṃyājayanti
- 7
अन्तरतो देवानाम्पत्नीभ्यो ऽवद्यति
अन्तरतो वै योषायै प्रजाः प्रजायन्त उपरिष्टादग्नये गृहपतय उपरिष्टाद्वै वृषा योषाम् अधिद्रवति
antarato devānāmpatnībhyo 'vadyati
antarato vai yoṣāyai prajāḥ prajāyanta upariṣṭādagnaye gṛhapataya upariṣṭādvai vṛṣā yoṣām adhidravati
- 8
अथ हृदयशूलेनावभृथं यन्ति
पशोर्ह वा आलभ्यमानस्य हृदयं शुक्समभ्यवैति हृदयाद्धृदयशूलम् अथ यच्छृतस्य परितृन्दन्ति तद् अलंजुषं तस्माद् उ परितृद्यैव शूलाकुर्यात्तत्त्रिः प्रच्युते पशौ हृदयम्प्रवृह्योत्तमम्प्रत्यवदधाति
atha hṛdayaśūlenāvabhṛthaṃ yanti
paśorha vā ālabhyamānasya hṛdayaṃ śuksamabhyavaiti hṛdayāddhṛdayaśūlam atha yacchṛtasya paritṛndanti tad alaṃjuṣaṃ tasmād u paritṛdyaiva śūlākuryāttattriḥ pracyute paśau hṛdayampravṛhyottamampratyavadadhāti
- 9
अथ हृदयशूलम्प्रयच्छति
तन्न पृथिव्याम्परास्येन्नाप्सु स यत्पृथिव्याम्परास्येदोषधीश्च वनस्पतींश्चैषा शुक्प्रविशेद्यद् अप्सु परास्येद् अप एषा शुक्प्रविशेत्तस्मान्न पृथिव्यां नाप्सु
atha hṛdayaśūlamprayacchati
tanna pṛthivyāmparāsyennāpsu sa yatpṛthivyāmparāsyedoṣadhīśca vanaspatīṃścaiṣā śukpraviśedyad apsu parāsyed apa eṣā śukpraviśettasmānna pṛthivyāṃ nāpsu
- 10
अप एवाभ्यवेत्य
यत्र शुष्कस्य चार्द्रस्य च संधिः स्यात्तद् उपगूहेद्यद्य् उ अभ्यवायनाय ग्लायेदग्रेण यूपम् उदपात्रं निनीय यत्र शुष्कस्य चार्द्रस्य च संधिर्भवति तदुपगूहति नापो नौषधीर्हिंसीरिति तथा नापो नौषधीर्हिनस्ति धाम्नो धाम्नो राजंस्ततो वरुण नो मुञ्च यद् आहुर् अघ्न्या इति वरुणेति शपामहे ततो वरुण नो मुञ्चेति तद् एनं सर्वस्माद्वरुणपाशात्सर्वस्माद्वरुण्यात्प्रमुञ्चति
apa evābhyavetya
yatra śuṣkasya cārdrasya ca saṃdhiḥ syāttad upagūhedyady u abhyavāyanāya glāyedagreṇa yūpam udapātraṃ ninīya yatra śuṣkasya cārdrasya ca saṃdhirbhavati tadupagūhati nāpo nauṣadhīrhiṃsīriti tathā nāpo nauṣadhīrhinasti dhāmno dhāmno rājaṃstato varuṇa no muñca yad āhur aghnyā iti varuṇeti śapāmahe tato varuṇa no muñceti tad enaṃ sarvasmādvaruṇapāśātsarvasmādvaruṇyātpramuñcati
- 11
अथाभिमन्त्रयते
सुमित्रिया न आप ओषधयः सन्तु दुर्मित्रियास्तस्मै सन्तु यो ऽस्मान्द्वेष्टि यं च वयं द्विष्म इति यत्र वा एतेन प्रचरन्त्य् आपश्च ह वा अस्मात्तावदोषधयश्चापक्रम्येव तिष्ठन्ति तद् उ ताभिर्मित्रधेयं कुरुते तथो हैनं ताः पुनः प्रविशन्त्य् एषो तत्र प्रायश्चित्तिः क्रियते स वै नाग्नीषोमीयस्य पशोः करोति नाग्नेयस्य वशाया एवानूबन्ध्यायै तां हि सर्वो ऽनु यज्ञः संतिष्ठत एतद् उ हास्याग्नीषोमीयस्य च पशोर् आग्नेयस्य च हृदयशूलेन चरितं भवति यद्वशायाश्चरति
athābhimantrayate
sumitriyā na āpa oṣadhayaḥ santu durmitriyāstasmai santu yo 'smāndveṣṭi yaṃ ca vayaṃ dviṣma iti yatra vā etena pracaranty āpaśca ha vā asmāttāvadoṣadhayaścāpakramyeva tiṣṭhanti tad u tābhirmitradheyaṃ kurute tatho hainaṃ tāḥ punaḥ praviśanty eṣo tatra prāyaścittiḥ kriyate sa vai nāgnīṣomīyasya paśoḥ karoti nāgneyasya vaśāyā evānūbandhyāyai tāṃ hi sarvo 'nu yajñaḥ saṃtiṣṭhata etad u hāsyāgnīṣomīyasya ca paśor āgneyasya ca hṛdayaśūlena caritaṃ bhavati yadvaśāyāścarati

