11 shlokas
- 1
अथातो ऽदृष्टदर्शनम्
athāto 'dṛṣṭadarśanam
- 2
संकरात्संकरेवासिनीम् आवहेच्छूर्पेणाक्षतान्गन्धान्त्सुमनसश्चात्र कृत्वा संविष्टिः प्राक्शिराः शुचौ देशे शिरस्तः कृत्वा क इमम् उ हुवेत्य् एतद्गीत्वा वाग्यतः प्रस्वपेत्पश्यति ह
saṃkarātsaṃkarevāsinīm āvahecchūrpeṇākṣatāngandhāntsumanasaścātra kṛtvā saṃviṣṭiḥ prākśirāḥ śucau deśe śirastaḥ kṛtvā ka imam u huvety etadgītvā vāgyataḥ prasvapetpaśyati ha
- 3
गरगोलिकां वा समुद्गे ऽवधायायाहि सुषमा हि त इत्य् एतद्गीत्वा वाग्यतः प्रस्वपेत्पश्यति ह
garagolikāṃ vā samudge 'vadhāyāyāhi suṣamā hi ta ity etadgītvā vāgyataḥ prasvapetpaśyati ha
- 4
कन्यां वोपवासयेद् अदृष्टरजसम् आदर्शं चायम् अग्निः श्रेष्ठतम इत्य् एतेन
व्युष्टायां रात्राव् एतेनैवाभिगीय परिमृज्य ब्रूयात्पश्येति
पश्यति ह
kanyāṃ vopavāsayed adṛṣṭarajasam ādarśaṃ cāyam agniḥ śreṣṭhatama ity etena
vyuṣṭāyāṃ rātrāv etenaivābhigīya parimṛjya brūyātpaśyeti
paśyati ha
- 5
उदशरावं वोपवासयेत्प्र मित्राय प्रार्यम्ण इत्य् एतेन व्युष्टायां रात्राव् एतेनैवाभिगीय परिमृज्य ब्रूयात्पश्येति
पश्यति ह
udaśarāvaṃ vopavāsayetpra mitrāya prāryamṇa ity etena vyuṣṭāyāṃ rātrāv etenaivābhigīya parimṛjya brūyātpaśyeti
paśyati ha
- 6
वंशमय्यौ वा शलाके गन्धैः प्रलिप्य मध्यमेनोपवासयेद्व्युष्टायां रात्राव् एतेनैवाभिगीय परिमृज्य ब्रह्मचारिणौ ब्रूयाद्धारयतम् इति संनमत्योः सिद्धिं विद्यात्
vaṃśamayyau vā śalāke gandhaiḥ pralipya madhyamenopavāsayedvyuṣṭāyāṃ rātrāv etenaivābhigīya parimṛjya brahmacāriṇau brūyāddhārayatam iti saṃnamatyoḥ siddhiṃ vidyāt
- 7
यष्टिं वान्त्येन चतुरङ्गुलशो निमायोपवासयेत्
व्युष्टायां रात्राव् एतेनैवाभिगीय परिमृज्य प्रमिणुयाद् अङ्गुलिपर्वभिः पूर्यमाणेषु सिध्यति
yaṣṭiṃ vāntyena caturaṅgulaśo nimāyopavāsayet
vyuṣṭāyāṃ rātrāv etenaivābhigīya parimṛjya pramiṇuyād aṅguliparvabhiḥ pūryamāṇeṣu sidhyati
- 8
आषाढ्यां पौर्णमास्यां बीजानि धारयित्वोपवासयेत्तुलां चेन्द्रम् इद्देवतातय इत्य् एतेन
व्युष्टायां रात्राव् एतेनैवाभिगीय परिमृज्य प्रोक्ष्य धारयेत्
यानि गरीयांसि तान्य् ऋध्यन्ते
āṣāḍhyāṃ paurṇamāsyāṃ bījāni dhārayitvopavāsayettulāṃ cendram iddevatātaya ity etena
vyuṣṭāyāṃ rātrāv etenaivābhigīya parimṛjya prokṣya dhārayet
yāni garīyāṃsi tāny ṛdhyante
- 9
अक्षतानां द्वौ राशी कुर्याद्भावाभावयोर् आ नो विश्वासु हव्यम् इत्य् एतेन
व्युष्टायां रात्राव् एतेनैवाभिगीय प्रोक्ष्य ब्रूयाद् आलभस्वेति
भावम् आलभमाने सिध्यति
akṣatānāṃ dvau rāśī kuryādbhāvābhāvayor ā no viśvāsu havyam ity etena
vyuṣṭāyāṃ rātrāv etenaivābhigīya prokṣya brūyād ālabhasveti
bhāvam ālabhamāne sidhyati
- 10
ज्योतिष्मतां विधूमानाम् अङ्गाराणां द्वौ राशी कुर्यात्
यावन्तो वा स्युस्तेनार्थिनः श्रुष्ट्य् अग्ने नवस्य म इत्य् एतेनैनान्युगपद्घृतेनाभिषिञ्चेत्
यः पूर्वः प्रज्वलितो विधूमेनार्चिषा प्रदक्षिणम् अभिपर्यावर्तते स जयतीति विद्यात्
jyotiṣmatāṃ vidhūmānām aṅgārāṇāṃ dvau rāśī kuryāt
yāvanto vā syustenārthinaḥ śruṣṭy agne navasya ma ity etenainānyugapadghṛtenābhiṣiñcet
yaḥ pūrvaḥ prajvalito vidhūmenārciṣā pradakṣiṇam abhiparyāvartate sa jayatīti vidyāt
- 11
ज्योतिष्कान्कुर्यान्मानुषीणां घृतेन सद्योमथितेन प्र सोम देववीतय इत्य् एतेनैनान्ज्वलयेत्
यः पश्चाच्छाम्यति स चिरं जीवति स चिरं जीवति
jyotiṣkānkuryānmānuṣīṇāṃ ghṛtena sadyomathitena pra soma devavītaya ity etenainānjvalayet
yaḥ paścācchāmyati sa ciraṃ jīvati sa ciraṃ jīvati

