13 shlokas
- 1
अथातो धान्यानाम्
athāto dhānyānām
- 2
शुक्लवाससा प्रयोगः स्नानम् अवलेखनम् अनिष्ठीवनं सदा चाञ्जनं सत्यवचनं सुमनसां धारणं केशश्मश्रुलोमनखानां तु नान्यत्र व्रताद्दारान् एवोपेयात्काले
एवंव्रतो यद् उदीरत आ हर्यतायेति वर्ग एतेषाम् एकम् अनेकं वा सर्वाणि वा प्रयुञ्जानः श्रीमान्यशस्वी पुष्टिमान्धन्यो भवति
śuklavāsasā prayogaḥ snānam avalekhanam aniṣṭhīvanaṃ sadā cāñjanaṃ satyavacanaṃ sumanasāṃ dhāraṇaṃ keśaśmaśrulomanakhānāṃ tu nānyatra vratāddārān evopeyātkāle
evaṃvrato yad udīrata ā haryatāyeti varga eteṣām ekam anekaṃ vā sarvāṇi vā prayuñjānaḥ śrīmānyaśasvī puṣṭimāndhanyo bhavati
- 3
गिर्वणः पाहि नः सुतम् इति चैतत्सदा प्रयुञ्जीत
मयि श्रीर् इति चास्य निधनं कुर्याच्छ्रीमान्भवति
girvaṇaḥ pāhi naḥ sutam iti caitatsadā prayuñjīta
mayi śrīr iti cāsya nidhanaṃ kuryācchrīmānbhavati
- 4
त्रीन्वोदकाञ्जलीन्त्सदाचामेद् अयं सहस्रमानव इत्य् एताभ्यां श्रीर् इति चोत्तरस्य निधनं कुर्यात्
श्रीमान्भवति
trīnvodakāñjalīntsadācāmed ayaṃ sahasramānava ity etābhyāṃ śrīr iti cottarasya nidhanaṃ kuryāt
śrīmānbhavati
- 5
सक्तुमन्थं दधिमधुघृतमिश्रम् आ त्वा विशन्त्व् इन्दव इत्य् एतेन संनयेत्
आ मा विशन्त्व् इन्दवो न माम् इन्द्रातिरिच्यत इत्य् एतेन पिबेत्
अलक्ष्मीं नुदते
saktumanthaṃ dadhimadhughṛtamiśram ā tvā viśantv indava ity etena saṃnayet
ā mā viśantv indavo na mām indrātiricyata ity etena pibet
alakṣmīṃ nudate
- 6
तिष्येण घृतं क्रीणीयात्
आयाहि सुषुमा हि त इत्य् एतेन पिबेत्
अलक्ष्मीं नुदते
tiṣyeṇa ghṛtaṃ krīṇīyāt
āyāhi suṣumā hi ta ity etena pibet
alakṣmīṃ nudate
- 7
गौरान्त्सर्षपांस्तिष्येण चूर्णं कारयित्वेन्द्रेहि मत्स्यन्धस इत्य् एतेन संयूय तैर्मुखं पाणी च सर्वाणि चाङ्गानि सर्वांश्च संश्लेषानुत्सादयन्न् अलक्ष्मीं नुदते
gaurāntsarṣapāṃstiṣyeṇa cūrṇaṃ kārayitvendrehi matsyandhasa ity etena saṃyūya tairmukhaṃ pāṇī ca sarvāṇi cāṅgāni sarvāṃśca saṃśleṣānutsādayann alakṣmīṃ nudate
- 8
गौरान्त्सर्षपान् अग्नौ जुहुयाद्यद्वीडाव् इन्द्र यत्स्थिर इत्य् एतेन हिरण्यं लभते
gaurāntsarṣapān agnau juhuyādyadvīḍāv indra yatsthira ity etena hiraṇyaṃ labhate
- 9
व्रीहियवान् अग्नौ जुहुयात्सुनीथो घ स मर्त्य इत्य् एतेन
धान्यं लभते
vrīhiyavān agnau juhuyātsunītho gha sa martya ity etena
dhānyaṃ labhate
- 10
व्रीहियवौ सर्पिर्मधुमिश्राव् आस्ये ऽवधाय स पूर्व्यो महोनाम् इत्य् एतन्मनसानुद्रुत्यान्ते स्वाहाकारेण निगिरेत्
एवं सदा प्रयुञ्जानः सहस्रं लभते
vrīhiyavau sarpirmadhumiśrāv āsye 'vadhāya sa pūrvyo mahonām ity etanmanasānudrutyānte svāhākāreṇa nigiret
evaṃ sadā prayuñjānaḥ sahasraṃ labhate
- 11
इम उ त्वा विचक्षत इत्य् एतेनाहुतिसहस्रं जुहुयात्
सहस्रं लभते
ima u tvā vicakṣata ity etenāhutisahasraṃ juhuyāt
sahasraṃ labhate
- 12
मासोपोषितो बिल्वानां दधिमधुघृताक्तानां श्रायन्तीयेनाष्टसहस्रं जुहुयात्
सिद्धे सौवर्णान्य् असिद्धे राजतानि
māsopoṣito bilvānāṃ dadhimadhughṛtāktānāṃ śrāyantīyenāṣṭasahasraṃ juhuyāt
siddhe sauvarṇāny asiddhe rājatāni
- 13
नैयग्रोधं दन्तपवनं घृतमधुलिप्तं गव्यो षु ण इत्य् एताभ्याम् अनिष्ठीवन्त्संवत्सरं भक्षयन्त्सहस्रं लभते सहस्रं लभते
naiyagrodhaṃ dantapavanaṃ ghṛtamadhuliptaṃ gavyo ṣu ṇa ity etābhyām aniṣṭhīvantsaṃvatsaraṃ bhakṣayantsahasraṃ labhate sahasraṃ labhate

