23 shlokas
- 1
अथातो हस्त्यारोहणम्
athāto hastyārohaṇam
- 2
एत्य हस्तिनम् अभिमृशति हस्तियशसम् असि हस्तिवर्चसम् असीति
etya hastinam abhimṛśati hastiyaśasam asi hastivarcasam asīti
- 3
अथारोहतीन्द्रस्य त्वा वज्रेणाभितिष्ठामि स्वस्ति मा संपारयेति
athārohatīndrasya tvā vajreṇābhitiṣṭhāmi svasti mā saṃpārayeti
- 4
एतेनैवाश्वारोहणं व्याख्यातम्
etenaivāśvārohaṇaṃ vyākhyātam
- 5
उष्ट्रम् आरोक्ष्यन्न् अभिमन्त्रयते त्वाष्ट्रो ऽसि त्वष्टृदैवत्यः स्वस्ति मा संपारयेति
uṣṭram ārokṣyann abhimantrayate tvāṣṭro 'si tvaṣṭṛdaivatyaḥ svasti mā saṃpārayeti
- 6
रासभमारोक्ष्यन्नभिमन्त्रयते शूद्रो ऽसि शूद्रजन्माग्नेयो वै द्विरेताः स्वस्ति मा संपारयेति
rāsabhamārokṣyannabhimantrayate śūdro 'si śūdrajanmāgneyo vai dviretāḥ svasti mā saṃpārayeti
- 7
चतुष्पथम् अभिमन्त्रयते नमो रुद्राय पथिषदे स्वस्ति मा संपारयेति
catuṣpatham abhimantrayate namo rudrāya pathiṣade svasti mā saṃpārayeti
- 8
नदीम् उत्तरिष्यन्न् अभिमन्त्रयते नमो रुद्रायाप्सुषदे स्वस्ति मा संपारयेति
nadīm uttariṣyann abhimantrayate namo rudrāyāpsuṣade svasti mā saṃpārayeti
- 9
नावम् आरोक्ष्यन्न् अभिमन्त्रयते सुनावमिति
nāvam ārokṣyann abhimantrayate sunāvamiti
- 10
उत्तरिष्यन्नभिमन्त्रयते सुत्रामाणमिति
uttariṣyannabhimantrayate sutrāmāṇamiti
- 11
वनमभिमन्त्रयते नमो रुद्राय वनसदे स्वस्ति मा संपारयेति
vanamabhimantrayate namo rudrāya vanasade svasti mā saṃpārayeti
- 12
गिरिमभिमन्त्रयते नमो रुद्राय गिरिषदे स्वस्ति मा संपारयेति
girimabhimantrayate namo rudrāya giriṣade svasti mā saṃpārayeti
- 13
श्मशानमभिमन्त्रयते नमो रुद्राय पितृषदे स्वस्ति मा संपारयेति
śmaśānamabhimantrayate namo rudrāya pitṛṣade svasti mā saṃpārayeti
- 14
गोष्ठमभिमन्त्रयते नमो रुद्राय शकृत्पिण्डसदे स्वस्ति मा संपारयेति
goṣṭhamabhimantrayate namo rudrāya śakṛtpiṇḍasade svasti mā saṃpārayeti
- 15
यत्र चान्यत्रापि नमो रुद्रायेत्येव ब्रूयाद्रुद्रो ह्येवेदं सर्वमिति श्रुतेः
yatra cānyatrāpi namo rudrāyetyeva brūyādrudro hyevedaṃ sarvamiti śruteḥ
- 16
सिचावधूतो ऽभिमन्त्रयते सिगसि न वज्रोऽसि नमस्ते ऽस्तु मा मा हिंसीरिति
sicāvadhūto 'bhimantrayate sigasi na vajro'si namaste 'stu mā mā hiṃsīriti
- 17
स्तनयित्नुमभिमन्त्रयते शिवा नो वर्षाः सन्तु शिवा नः सन्तु हेतयः
शिवा नस्ताः सन्तु यास्त्वं सृजसि वृत्रहन्निति
stanayitnumabhimantrayate śivā no varṣāḥ santu śivā naḥ santu hetayaḥ
śivā nastāḥ santu yāstvaṃ sṛjasi vṛtrahanniti
- 18
शिवां वाश्यमानाम् अभिमन्त्रयते शिवो नामेति
śivāṃ vāśyamānām abhimantrayate śivo nāmeti
- 19
शकुनिं वाश्यमानम् अभिमन्त्रयते हिरण्यपर्ण शकुने देवानां प्रहितंगम
यमदूत नमस्ते ऽस्तु किं त्वा कार्कारिणो ऽब्रवीद् इति
śakuniṃ vāśyamānam abhimantrayate hiraṇyaparṇa śakune devānāṃ prahitaṃgama
yamadūta namaste 'stu kiṃ tvā kārkāriṇo 'bravīd iti
- 20
लक्षण्यं वृक्षमभिमन्त्रयते मा त्वाशनिर्मा परशुर्मा वातो मा राजप्रेषितो दण्डः
अङ्कुरास्ते प्ररोहन्तु निवाते त्वाभिवर्षतु
अग्निष्टे मूलं मा हिंसीत्स्वस्ति ते ऽस्तु वनस्पते स्वस्ति मे ऽस्तु वनस्पत इति
lakṣaṇyaṃ vṛkṣamabhimantrayate mā tvāśanirmā paraśurmā vāto mā rājapreṣito daṇḍaḥ
aṅkurāste prarohantu nivāte tvābhivarṣatu
agniṣṭe mūlaṃ mā hiṃsītsvasti te 'stu vanaspate svasti me 'stu vanaspata iti
- 21
स यदि किंचिल्लभेत तत्प्रतिगृह्णाति द्यौस्त्वा ददातु पृथिवी त्वा प्रतिगृह्णात्विति सास्य न ददतः क्षीयते भूयसी च प्रतिगृहीता भवति
अथ यद्य् ओदनं लभेत तत्प्रतिगृह्य द्यौस्त्वेति तस्य द्विः प्राश्नाति ब्रह्मा त्वाश्नातु ब्रह्मा त्वा प्राश्नात्विति
sa yadi kiṃcillabheta tatpratigṛhṇāti dyaustvā dadātu pṛthivī tvā pratigṛhṇātviti sāsya na dadataḥ kṣīyate bhūyasī ca pratigṛhītā bhavati
atha yady odanaṃ labheta tatpratigṛhya dyaustveti tasya dviḥ prāśnāti brahmā tvāśnātu brahmā tvā prāśnātviti
- 22
अथ यदि मन्थं लभेत तं प्रतिगृह्य द्यौस्त्वेति तस्य त्रिः प्राश्नाति ब्रह्मा त्वाश्नातु ब्रह्मा त्वा प्राश्नातु ब्रह्मा त्वा पिबत्विति
atha yadi manthaṃ labheta taṃ pratigṛhya dyaustveti tasya triḥ prāśnāti brahmā tvāśnātu brahmā tvā prāśnātu brahmā tvā pibatviti
- 23
अथातो ऽधीत्याधीत्यानिराकरणं प्रतीकं मे विचक्षणं जिह्वा मे मधु यद्वचः
कर्णाभ्यां भूरि शुश्रुवे मा त्वं हार्षीः श्रुतं मयि
ब्रह्मणः प्रवचनमसि ब्रह्मणः प्रतिष्ठानमसि ब्रह्मकोशो ऽसि सनिर् असि शान्तिर् अस्य् अनिराकरणम् असि ब्रह्मकोशं मे विश
वाचा त्वा पिदधामि वाचा त्वा पिदधामीति स्वरकरणकण्ठ्यौरसदन्त्यौष्ठ्यग्रहणधारणोच्चारणशक्तिर्मयि भवतु आप्यायन्तु मे ऽङ्गानि वाक्प्राणश्चक्षुः श्रोत्रं यशो बलम्
यन्मे श्रुतम् अधीतं तन्मे मनसि तिष्ठतु तिष्ठतु
athāto 'dhītyādhītyānirākaraṇaṃ pratīkaṃ me vicakṣaṇaṃ jihvā me madhu yadvacaḥ
karṇābhyāṃ bhūri śuśruve mā tvaṃ hārṣīḥ śrutaṃ mayi
brahmaṇaḥ pravacanamasi brahmaṇaḥ pratiṣṭhānamasi brahmakośo 'si sanir asi śāntir asy anirākaraṇam asi brahmakośaṃ me viśa
vācā tvā pidadhāmi vācā tvā pidadhāmīti svarakaraṇakaṇṭhyaurasadantyauṣṭhyagrahaṇadhāraṇoccāraṇaśaktirmayi bhavatu āpyāyantu me 'ṅgāni vākprāṇaścakṣuḥ śrotraṃ yaśo balam
yanme śrutam adhītaṃ tanme manasi tiṣṭhatu tiṣṭhatu

