11 shlokas
- 1
यदि कलशो दीर्येत वषट्कारणिधनं ब्रह्मसाम कुर्यात्
yadi kalaśo dīryeta vaṣaṭkāraṇidhanaṃ brahmasāma kuryāt
- 2
अवषट्कृतो वा एतस्य सोमः परासिच्यते यस्य कलशो दीर्यते यद्वषट्कारणिधनं ब्रह्मसाम भवति वषट्कृत एवास्य सोमो भवति
avaṣaṭkṛto vā etasya somaḥ parāsicyate yasya kalaśo dīryate yadvaṣaṭkāraṇidhanaṃ brahmasāma bhavati vaṣaṭkṛta evāsya somo bhavati
- 3
विधुं दद्राणं समने बहूनाम् इत्य् एतासु कार्यम्
vidhuṃ dadrāṇaṃ samane bahūnām ity etāsu kāryam
- 4
एष हि बहूनां समने दीर्यते यत्कलशः
eṣa hi bahūnāṃ samane dīryate yatkalaśaḥ
- 5
तद् आहुर्न वा आर्त्यार्तिर् अनूद्यार्त्या वा एष आर्तिम् अनुवदति यः कलशे दीर्णे दद्राणवतीषु करोतीति
tad āhurna vā ārtyārtir anūdyārtyā vā eṣa ārtim anuvadati yaḥ kalaśe dīrṇe dadrāṇavatīṣu karotīti
- 6
श्रायन्तीयम् एव कार्यम्
śrāyantīyam eva kāryam
- 7
प्रजापतिः प्रजा असृजत स दुग्धो रिरिचानो ऽमन्यत स एतच्छ्रायन्तीयम् अपश्यत्तेनात्मानं समश्रीणात्प्रजया पशुभिर् इन्द्रियेण
prajāpatiḥ prajā asṛjata sa dugdho riricāno 'manyata sa etacchrāyantīyam apaśyattenātmānaṃ samaśrīṇātprajayā paśubhir indriyeṇa
- 8
दुग्ध इव एष रिरिचानो यस्य कलशो दीर्यते यच्छ्रायन्तीयं ब्रह्मसाम भवति पुनर् एवात्मानं संश्रीणाति प्रजया पशुभिर् इन्द्रियेण
dugdha iva eṣa riricāno yasya kalaśo dīryate yacchrāyantīyaṃ brahmasāma bhavati punar evātmānaṃ saṃśrīṇāti prajayā paśubhir indriyeṇa
- 9
यदि श्रायन्तीयं ब्रह्मसाम स्याद्वैष्णवीष्व् अनुष्टुप्सु वषट्कारणिधनं कुर्यात्
yadi śrāyantīyaṃ brahmasāma syādvaiṣṇavīṣv anuṣṭupsu vaṣaṭkāraṇidhanaṃ kuryāt
- 10
यद्वै यज्ञस्य स्रवति वाचं प्रतिस्रवति वाग् अनुष्टुप्यज्ञो विष्णुर्वाचैव यज्ञस्य छिद्रम् अपिदधाति
yadvai yajñasya sravati vācaṃ pratisravati vāg anuṣṭupyajño viṣṇurvācaiva yajñasya chidram apidadhāti
- 11
यद्वै यज्ञस्य स्रवत्य् अन्ततः स्रवति वारवन्तीयम् अग्निष्टोमसाम कार्यं यज्ञस्यैव छिद्रं वारयते
yadvai yajñasya sravaty antataḥ sravati vāravantīyam agniṣṭomasāma kāryaṃ yajñasyaiva chidraṃ vārayate

