38 shlokas
- 1
देवा वा उक्थान्य् अभिजित्य रात्रिं नाशक्नुवन्न् अभिजेतुं ते ऽसुरान्रात्रिं तमः प्रविष्टान्नानुव्यपश्यंस्त एतम् अनुष्टुप्शिरसं प्रगाथम् अपश्यन्विराजं ज्योतिः तान्विराजा ज्योतिषानुपश्यन्तो ऽनुष्टुभा वज्रेण रात्रेर्निराघ्नन्
devā vā ukthāny abhijitya rātriṃ nāśaknuvann abhijetuṃ te 'surānrātriṃ tamaḥ praviṣṭānnānuvyapaśyaṃsta etam anuṣṭupśirasaṃ pragātham apaśyanvirājaṃ jyotiḥ tānvirājā jyotiṣānupaśyanto 'nuṣṭubhā vajreṇa rātrernirāghnan
- 2
यद् एषो ऽनुष्टुप्शिराः प्रगाथो भवति विराजैव ज्योतिषानुपश्यन्न् अनुष्टुभा वज्रेण रात्रेर्भ्रातृव्यं निर्हन्ति
yad eṣo 'nuṣṭupśirāḥ pragātho bhavati virājaiva jyotiṣānupaśyann anuṣṭubhā vajreṇa rātrerbhrātṛvyaṃ nirhanti
- 3
तान्समन्तं पर्यायं प्राणुदन्त यत्पर्यायं प्राणुदन्त तत्पर्यायाणां पर्यायत्वम्
tānsamantaṃ paryāyaṃ prāṇudanta yatparyāyaṃ prāṇudanta tatparyāyāṇāṃ paryāyatvam
- 4
प्रथमानि पदानि पुनरादीनि भवन्ति प्रथमस्य पर्यायस्य
prathamāni padāni punarādīni bhavanti prathamasya paryāyasya
- 5
प्रथमैर्हि पदैः पुनर् आदाय प्रथमरात्रात्प्राणुदन्त
prathamairhi padaiḥ punar ādāya prathamarātrātprāṇudanta
- 6
पान्तम् आ वो अन्धस इति प्रस्तौति
pāntam ā vo andhasa iti prastauti
- 7
अहर्वै पान्तम् अन्धो रात्रिर् अह्नैव तद्रात्रिम् आरभन्ते
aharvai pāntam andho rātrir ahnaiva tadrātrim ārabhante
- 8
तासु वैतहव्यम्
tāsu vaitahavyam
- 9
वीतहव्यः श्रायसो ज्योग्निरुद्ध एतत्सामापश्यत्सो ऽवगच्छत्प्रत्यतिष्ठद् अवगच्छति प्रतितिष्ठत्य् एतेन तुष्टुवानः
vītahavyaḥ śrāyaso jyogniruddha etatsāmāpaśyatso 'vagacchatpratyatiṣṭhad avagacchati pratitiṣṭhaty etena tuṣṭuvānaḥ
- 10
तम इव वा एते प्रविशन्ति ये रात्रिम् उपयन्ति यद् ओको निधनं रात्रेर्मुखे भवति प्रज्ञात्यै
tama iva vā ete praviśanti ye rātrim upayanti yad oko nidhanaṃ rātrermukhe bhavati prajñātyai
- 11
यदा वै पुरुषः स्वम् ओक आगच्छति सर्वं तर्हि प्रजानाति सर्वम् अस्मै दिवा भवति
yadā vai puruṣaḥ svam oka āgacchati sarvaṃ tarhi prajānāti sarvam asmai divā bhavati
- 12
ते मध्यमं पर्यायम् अश्रयन्त तेषाम् और्ध्वसद्मनेन वाचम् अवृञ्जत
te madhyamaṃ paryāyam aśrayanta teṣām aurdhvasadmanena vācam avṛñjata
- 13
वाचं भ्रातृव्यस्य वृङ्क्ते य एवं वेद
vācaṃ bhrātṛvyasya vṛṅkte ya evaṃ veda
- 14
त्रिणिधनं भवति
triṇidhanaṃ bhavati
- 15
यथा वा अह्नो माध्यन्दिनं सवनं त्रिणिधनायतनम् एवम् एष रात्रेर्मध्यमः पर्यायस्त्रिणिधनायतनः सलोकत्वाय
yathā vā ahno mādhyandinaṃ savanaṃ triṇidhanāyatanam evam eṣa rātrermadhyamaḥ paryāyastriṇidhanāyatanaḥ salokatvāya
- 16
मध्यमानि पदानि पुनरादीनि भवन्ति मध्यमस्य पर्यायस्य मध्यमैर्हि पदैः पुनर् आदायं मध्यमरात्रात्प्राणुदन्त
madhyamāni padāni punarādīni bhavanti madhyamasya paryāyasya madhyamairhi padaiḥ punar ādāyaṃ madhyamarātrātprāṇudanta
- 17
त उत्तमं पर्यायम् अश्रयन्त तेषां घृतश्च्युन्निधनेन पशून् अवृञ्जत पशवो वै घृतश्च्युतः
ta uttamaṃ paryāyam aśrayanta teṣāṃ ghṛtaścyunnidhanena paśūn avṛñjata paśavo vai ghṛtaścyutaḥ
- 18
पशून्भ्रातृव्यस्य वृङ्क्ते य एवं वेद
paśūnbhrātṛvyasya vṛṅkte ya evaṃ veda
- 19
उत्तमानि पदानि पुनरादीनि भवन्त्य् उत्तमस्य पर्यायस्योत्तमैर्हि पदैः पुनर् आदायम् उत्तमरात्रात्प्राणुदन्त
uttamāni padāni punarādīni bhavanty uttamasya paryāyasyottamairhi padaiḥ punar ādāyam uttamarātrātprāṇudanta
- 20
तान्सन्धिनाभिपलायन्त
tānsandhinābhipalāyanta
- 21
तान् आश्विनेनासंहाय्यम् अगमयन्
tān āśvinenāsaṃhāyyam agamayan
- 22
असंहाय्यं भ्रातृव्यं गमयति य एवं वेद
asaṃhāyyaṃ bhrātṛvyaṃ gamayati ya evaṃ veda
- 23
एषा वा अग्निष्टोमस्य संमा यद्रात्रिः
eṣā vā agniṣṭomasya saṃmā yadrātriḥ
- 24
द्वादश स्तोत्राण्य् अग्निष्टोमो द्वादश स्तोत्राणि रात्रिः
dvādaśa stotrāṇy agniṣṭomo dvādaśa stotrāṇi rātriḥ
- 25
एषा वा उक्थस्य संमा यद्रात्रिः
eṣā vā ukthasya saṃmā yadrātriḥ
- 26
त्रीण्य् उक्थानि त्रिदेवत्यः सन्धिः
trīṇy ukthāni tridevatyaḥ sandhiḥ
- 27
यथा वा अह्न उक्थान्य् एवम् एष रात्रेः सन्धिर्नानारूपाण्य् अह्न उक्थानि नानारूपा एते तृचा भवन्ति
yathā vā ahna ukthāny evam eṣa rātreḥ sandhirnānārūpāṇy ahna ukthāni nānārūpā ete tṛcā bhavanti
- 28
रथन्तरं प्रतिष्ठाकामाय सन्धिं कुर्यात्
rathantaraṃ pratiṣṭhākāmāya sandhiṃ kuryāt
- 29
इयं वै रथन्तरम् अस्याम् एव प्रतितिष्ठति
iyaṃ vai rathantaram asyām eva pratitiṣṭhati
- 30
बृहत्स्वर्गकामाय सन्धिं कुर्यात्
bṛhatsvargakāmāya sandhiṃ kuryāt

