23 shlokas
- 1
पान्तम् आ वो अन्धस इति वैतहव्यम् अन्यक्षेत्रं वा एते प्रयन्ति ये रात्रिम् उपयन्ति यद् ओकोनिधनं रात्रेर्मुखे भवत्य् ओकसो ऽप्रच्यावाय
pāntam ā vo andhasa iti vaitahavyam anyakṣetraṃ vā ete prayanti ye rātrim upayanti yad okonidhanaṃ rātrermukhe bhavaty okaso 'pracyāvāya
- 2
प्र व इन्द्राय मादनम् इति गौरीवितम्
pra va indrāya mādanam iti gaurīvitam
- 3
ब्रह्म यद्देवा व्यकुर्वत ततो यद् अत्यरिच्यत तद्गौरीवितम् अभवत्
brahma yaddevā vyakurvata tato yad atyaricyata tadgaurīvitam abhavat
- 4
अतिरिक्तं गौरीवितम् अतिरिक्तम् एतत्स्तोत्रं यद्रात्रिर् अतिरिक्त एवातिरिक्तं दधाति
atiriktaṃ gaurīvitam atiriktam etatstotraṃ yadrātrir atirikta evātiriktaṃ dadhāti
- 5
वयम् उ त्वा तद् इद् अर्था इति काण्वम्
vayam u tvā tad id arthā iti kāṇvam
- 6
एतेन वै कण्व इन्द्रस्य सांविद्यम् अगच्छद् इन्द्रस्यैवैतेन सांविद्यं गच्छति
etena vai kaṇva indrasya sāṃvidyam agacchad indrasyaivaitena sāṃvidyaṃ gacchati
- 7
इन्द्राय मद्वने सुतम् इति श्रौतकक्षं क्षत्रसाम प्र क्षत्रम् एवैतेन भवति
indrāya madvane sutam iti śrautakakṣaṃ kṣatrasāma pra kṣatram evaitena bhavati
- 8
अयं त इन्द्र सोम इति दैवोदासम्
ayaṃ ta indra soma iti daivodāsam
- 9
अग्निष्टोमेन वै देवा इमं लोकम् अभ्यजयन्न् अन्तरिक्षम् उक्थेनातिरात्रेणामुं त इमं लोकं पुनर् अभ्यकामयन्त त इहेत्य् अस्मिंल्लोके प्रत्यतिष्ठन्यद् एतत्साम भवति प्रतिष्ठित्यै
agniṣṭomena vai devā imaṃ lokam abhyajayann antarikṣam ukthenātirātreṇāmuṃ ta imaṃ lokaṃ punar abhyakāmayanta ta ihety asmiṃlloke pratyatiṣṭhanyad etatsāma bhavati pratiṣṭhityai
- 10
ऊर्ध्वसद्मनम् अपि शर्वरीषु प्रोहन्ति
ūrdhvasadmanam api śarvarīṣu prohanti
- 11
असुरा वा एषु लोकेष्व् आसंस्तान्देवा ऊर्ध्वसद्मनेनैभ्यो लोकेभ्यः प्राणुदन्त
asurā vā eṣu lokeṣv āsaṃstāndevā ūrdhvasadmanenaibhyo lokebhyaḥ prāṇudanta
- 12
तद्य एवं वेदैभ्यो लोकेभ्यो भ्रातृव्यं प्रणुद्य स्व आयतने सत्त्रम् आस्ते
tadya evaṃ vedaibhyo lokebhyo bhrātṛvyaṃ praṇudya sva āyatane sattram āste
- 13
आ तू न इन्द्र क्षुमन्तम् इत्य् आकूपारम्
ā tū na indra kṣumantam ity ākūpāram
- 14
अकूपाराङ्गिरस्यासीत्तस्या यथा गोधायास्त्वग् एव त्वग् आसीत्ताम् एतेन त्रिःसाम्नेन्द्रः पूत्वा सूर्यत्वचसम् अकरोत्तद्वाव सा तर्ह्य् अकामयत यत्कामा एतेन साम्ना स्तुवते स एभ्यः कामः समृध्यते
akūpārāṅgirasyāsīttasyā yathā godhāyāstvag eva tvag āsīttām etena triḥsāmnendraḥ pūtvā sūryatvacasam akarottadvāva sā tarhy akāmayata yatkāmā etena sāmnā stuvate sa ebhyaḥ kāmaḥ samṛdhyate
- 15
अभि त्वा वृषभा सुतं इत्य् आर्षभं क्षत्रसाम क्षत्रम् एवैतेन भवति
abhi tvā vṛṣabhā sutaṃ ity ārṣabhaṃ kṣatrasāma kṣatram evaitena bhavati
- 16
इदं वसो सुतम् अन्ध इति गारम् एतेन वै गर इन्द्रम् अप्रीणात्प्रीत एवास्यैतेनेन्द्रो भवति
idaṃ vaso sutam andha iti gāram etena vai gara indram aprīṇātprīta evāsyaitenendro bhavati
- 17
इदं ह्य् अन्व् ओजसेति माधुच्छन्दसं प्रजापतेर्वा एषा तनूर् अयातयाम्नी प्रयुज्यते
idaṃ hy anv ojaseti mādhucchandasaṃ prajāpatervā eṣā tanūr ayātayāmnī prayujyate
- 18
आ त्व् एता निषीदतेति दैवातिथम्
ā tv etā niṣīdateti daivātitham
- 19
देवातिथिः सपुत्रो ऽशनायंश्चरन्न् अरण्य उर्वारूण्य् अविन्दत्तान्य् एतेन साम्नोपासीदत्ता अस्मै गावः पृश्नयो भूत्वोदतिष्ठन्यद् एतत्साम भवति पशूनां पुष्ट्यै
devātithiḥ saputro 'śanāyaṃścarann araṇya urvārūṇy avindattāny etena sāmnopāsīdattā asmai gāvaḥ pṛśnayo bhūtvodatiṣṭhanyad etatsāma bhavati paśūnāṃ puṣṭyai
- 20
योगे योगे तवस्तरम् इति सौमेधं रात्रिषाम रात्रेर् एव समृद्ध्यै
yoge yoge tavastaram iti saumedhaṃ rātriṣāma rātrer eva samṛddhyai
- 21
इन्द्र सुतेषु सोमेष्व् इति कौत्सम्
indra suteṣu someṣv iti kautsam
- 22
कुत्सश्च लुशश्चेन्द्रं व्यह्वयेतां स इन्द्रः कुत्सम् उपावर्तत तं शतेन वार्ध्रीभिर् आण्डयोर् अबध्नात्तं लुशो ऽभ्यवदत्प्रमुच्यस्व परि कुत्साद् इहागहि किम् उ त्वावान् आण्डयोर्बद्ध आसाता इति ताः संछिद्य प्राद्रवत्स एतत्कुत्सः सामापश्यत्तेनैनम् अन्ववदत्स उपावर्तत
kutsaśca luśaścendraṃ vyahvayetāṃ sa indraḥ kutsam upāvartata taṃ śatena vārdhrībhir āṇḍayor abadhnāttaṃ luśo 'bhyavadatpramucyasva pari kutsād ihāgahi kim u tvāvān āṇḍayorbaddha āsātā iti tāḥ saṃchidya prādravatsa etatkutsaḥ sāmāpaśyattenainam anvavadatsa upāvartata
- 23
यद् एतत्साम भवति सेन्द्रत्वाय
yad etatsāma bhavati sendratvāya

