14 shlokas
- 1
इतो वै प्रातर् ऊर्ध्वाणि छन्दांसि युज्यन्ते ऽमुतो ऽवाञ्चि यज्ञायज्ञीयस्य स्तोत्रे युज्यन्ते यज्ञा वो अग्नये गिरा च दक्षस इति द्वादशाक्षरं प्र वयम् अमृतं जातवेदसम् इत्य् एकादशाक्षरं प्रियं मित्रं न शंसिषम् इत्य् अष्टाक्षरम्
ito vai prātar ūrdhvāṇi chandāṃsi yujyante 'muto 'vāñci yajñāyajñīyasya stotre yujyante yajñā vo agnaye girā ca dakṣasa iti dvādaśākṣaraṃ pra vayam amṛtaṃ jātavedasam ity ekādaśākṣaraṃ priyaṃ mitraṃ na śaṃsiṣam ity aṣṭākṣaram
- 2
अनुष्टुभम् उत्तमां सम्पादयतीयं वा अनुष्टुब् अस्याम् एव प्रतितिष्ठति
anuṣṭubham uttamāṃ sampādayatīyaṃ vā anuṣṭub asyām eva pratitiṣṭhati
- 3
वाग्वा अनुष्टुब्वाच्य् एव प्रतितिष्ठति ज्यैष्ठ्यं वा अनुष्टुब्ज्यैष्ठ्य एव प्रतितिष्ठति
vāgvā anuṣṭubvācy eva pratitiṣṭhati jyaiṣṭhyaṃ vā anuṣṭubjyaiṣṭhya eva pratitiṣṭhati
- 4
कथम् इव यज्ञायज्ञीयं गेयम् इत्य् आहुर्यथानड्वान्प्रस्रावयमाण इत्थम् इव चेत्थम् इव चेति
katham iva yajñāyajñīyaṃ geyam ity āhuryathānaḍvānprasrāvayamāṇa ittham iva cettham iva ceti
- 5
वैश्वानरं वा एतद् उद्गातानु प्रसीदन्न् एतीत्य् आहुर्यद्यज्ञायज्ञीयस्यर्चं संप्रत्याहेति परिक्रामतेवोद्गेयं वैश्वानरम् एव परिक्रामति
vaiśvānaraṃ vā etad udgātānu prasīdann etīty āhuryadyajñāyajñīyasyarcaṃ saṃpratyāheti parikrāmatevodgeyaṃ vaiśvānaram eva parikrāmati
- 6
वैश्वानरे वा एतद् अध्वर्युः सदस्यान् अभिसृजति यद्यज्ञायज्ञीयस्य स्तोत्रम् उपावर्तयति प्रावृतेनोद्गेयं वैश्वानरेणानभिदाहाय
vaiśvānare vā etad adhvaryuḥ sadasyān abhisṛjati yadyajñāyajñīyasya stotram upāvartayati prāvṛtenodgeyaṃ vaiśvānareṇānabhidāhāya
- 7
न ह तु वै पितरः प्रावृतं जानन्ति यज्ञायज्ञीयस्य वै स्तोत्रे पितरो यथायथं जिज्ञासन्त आकर्णाभ्यां प्रावृत्यं तद् एव प्रावृतं तद् अप्रावृतं जानन्ति पितरो न वैश्वानरो हिनस्ति
na ha tu vai pitaraḥ prāvṛtaṃ jānanti yajñāyajñīyasya vai stotre pitaro yathāyathaṃ jijñāsanta ākarṇābhyāṃ prāvṛtyaṃ tad eva prāvṛtaṃ tad aprāvṛtaṃ jānanti pitaro na vaiśvānaro hinasti
- 8
अपः पश्चात्पत्न्य उपसृजन्ति वैश्वानरम् एव तच्छमयन्त्य् आपो हि शान्तिः
apaḥ paścātpatnya upasṛjanti vaiśvānaram eva tacchamayanty āpo hi śāntiḥ
- 9
अथो रेत एव तत्सिञ्चन्त्य् आपो हि रेतः
atho reta eva tatsiñcanty āpo hi retaḥ
- 10
दक्षिणान् ऊरून् अभिषिञ्चन्ति दक्षिणतो हि रेतः सिच्यते
dakṣiṇān ūrūn abhiṣiñcanti dakṣiṇato hi retaḥ sicyate
- 11
महद् इव प्रत्यूह्यं मन एवास्य तज्जनयन्ति
mahad iva pratyūhyaṃ mana evāsya tajjanayanti
- 12
उद्गात्रा पत्नीः संख्यापयन्ति रेतोधेयाय
udgātrā patnīḥ saṃkhyāpayanti retodheyāya
- 13
हिङ्कारं प्रति संख्यापयन्ति हिंकृताद्धि रेतो धीयते
hiṅkāraṃ prati saṃkhyāpayanti hiṃkṛtāddhi reto dhīyate
- 14
आ तृतीयायाः संख्यापयन्ति त्रिवृद्धि रेतः
ā tṛtīyāyāḥ saṃkhyāpayanti trivṛddhi retaḥ

