8 shlokas
- 1
अत्र मनःशब्देनान्तःकरणं तत्तन्त्रत्वाद् उदाहरणार्थत्वाच्च मनोग्रहणस्य उभयात्मकत्वाच्च मनसः सर्वकरणग्रहणानुग्रहणाच्च कार्यग्रहणमित्यतः कार्यकरणाधिष्ठातृत्वाच्च सकल इत्युपचर्यते
atra manaḥśabdenāntaḥkaraṇaṃ tattantratvād udāharaṇārthatvācca manograhaṇasya ubhayātmakatvācca manasaḥ sarvakaraṇagrahaṇānugrahaṇācca kāryagrahaṇamityataḥ kāryakaraṇādhiṣṭhātṛtvācca sakala ityupacaryate
- 2
तथा चैतादृशमनसः प्रतिषेधादत्र कार्यकरणरहितो निष्कलो भगवान् अमन इत्युच्यते
tathā caitādṛśamanasaḥ pratiṣedhādatra kāryakaraṇarahito niṣkalo bhagavān amana ityucyate
- 3
तस्मात्सकलेतरानुग्राहकानादिशक्तिर्विद्यते
tasmātsakaletarānugrāhakānādiśaktirvidyate
- 4
उक्तं हि
अपाणिपादोदरपार्श्वजिह्वः अतीन्द्रियो व्यापिस्वभावसिद्धः
पश्यत्य् अचक्षुः स शृणोत्यकर्णो न चास्त्यबुद्धं न च बुद्धिरस्ति
स वेत्ति सर्वं न च तस्यास्ति वेत्ता तमाहुरग्र्यं पुरुषं महान्तम्
uktaṃ hi
apāṇipādodarapārśvajihvaḥ atīndriyo vyāpisvabhāvasiddhaḥ
paśyaty acakṣuḥ sa śṛṇotyakarṇo na cāstyabuddhaṃ na ca buddhirasti
sa vetti sarvaṃ na ca tasyāsti vettā tamāhuragryaṃ puruṣaṃ mahāntam
- 5
इत्येतद्भगवत्यभ्यधिकत्वं शेषेषु च न्यूनत्वं च ज्ञात्वा युक्तं वक्तुं मनोऽमनाय नमः
ityetadbhagavatyabhyadhikatvaṃ śeṣeṣu ca nyūnatvaṃ ca jñātvā yuktaṃ vaktuṃ mano'manāya namaḥ
- 6
मनोऽमनाय इति चतुर्थी
mano'manāya iti caturthī
- 7
नमु इत्यात्मप्रदाने पूजायां च
namu ityātmapradāne pūjāyāṃ ca
- 8
सम्भावनान्यत्वाच्चापुनरुक्ताः सर्वे नमःशब्दा द्रष्टव्याः
sambhāvanānyatvāccāpunaruktāḥ sarve namaḥśabdā draṣṭavyāḥ

