123 shlokas
- 1
ततः पूर्वोक्तया युक्त्या वत्सराजं सवल्लभम्
यौगन्धरायणाद्यास्ते निन्युर्लावाणकं प्रति
tataḥ pūrvoktayā yuktyā vatsarājaṃ savallabham
yaugandharāyaṇādyāste ninyurlāvāṇakaṃ prati
- 2
स राजा प्राप तं देशं सैन्यघोषेण मूर्छता
अभिवाञ्छितसंसिद्धिं वदन्तमिव मन्त्रिणाम्
sa rājā prāpa taṃ deśaṃ sainyaghoṣeṇa mūrchatā
abhivāñchitasaṃsiddhiṃ vadantamiva mantriṇām
- 3
तत्र प्राप्तं विदित्वा च वत्सेशं सपरिच्छदम्
अवस्कन्दभयाशङ्की चकम्पे मगधेश्वरः
tatra prāptaṃ viditvā ca vatseśaṃ saparicchadam
avaskandabhayāśaṅkī cakampe magadheśvaraḥ
- 4
यौगन्धरायणोपान्तं सद्बुद्धिर्विससर्ज च
स दूतं सो ऽपि सन्मन्त्री कार्यज्ञो ऽभिननन्द तम्
yaugandharāyaṇopāntaṃ sadbuddhirvisasarja ca
sa dūtaṃ so 'pi sanmantrī kāryajño 'bhinananda tam
- 5
वत्सेश्वरो ऽपि निवसंस्तस्मिन्देशे दवीयसीम्
आखेटकार्थमटवीमटति स्म दिने दिने
vatseśvaro 'pi nivasaṃstasmindeśe davīyasīm
ākheṭakārthamaṭavīmaṭati sma dine dine
- 6
एकस्मिन्दिवसे तस्मिन्राजन्याखेटकं गते
कर्तव्यसंविदं कृत्वा गोपालकसमन्वितः
ekasmindivase tasminrājanyākheṭakaṃ gate
kartavyasaṃvidaṃ kṛtvā gopālakasamanvitaḥ
- 7
यौगन्धरायणो धीमान्सरुमण्वद्वसन्तकः
देव्या वासवदत्ताया विजने निकटं ययौ
yaugandharāyaṇo dhīmānsarumaṇvadvasantakaḥ
devyā vāsavadattāyā vijane nikaṭaṃ yayau
- 8
तत्र तां राजकार्ये ऽत्र साहाय्ये तत्तदुक्तिभिः
प्रह्वाम् अभ्यर्थयामास भ्रात्रा पूर्वं प्रबोधिताम्
tatra tāṃ rājakārye 'tra sāhāyye tattaduktibhiḥ
prahvām abhyarthayāmāsa bhrātrā pūrvaṃ prabodhitām
- 9
सानुमेने च विरहक्लेशदायि तदात्मनः
किं नाम न सहन्ते हि भर्तृभक्ताः कुलाङ्गनाः
sānumene ca virahakleśadāyi tadātmanaḥ
kiṃ nāma na sahante hi bhartṛbhaktāḥ kulāṅganāḥ
- 10
ततस्तां ब्राह्मणीरूपां देवीं यौगन्धरायणः
स चकार कृती दत्त्वा योगं रूपविवर्तनम्
tatastāṃ brāhmaṇīrūpāṃ devīṃ yaugandharāyaṇaḥ
sa cakāra kṛtī dattvā yogaṃ rūpavivartanam
- 11
वसन्तकं च कृतवान्काणं बटुकरूपिणम्
आत्मना च तथैवाभूत्स्थविरब्राह्मणाकृतिः
vasantakaṃ ca kṛtavānkāṇaṃ baṭukarūpiṇam
ātmanā ca tathaivābhūtsthavirabrāhmaṇākṛtiḥ
- 12
तथारूपां गृहीत्वाथ तां देवीं स महामतिः
वसन्तकसखः स्वैरं प्रतस्थे मगधान्प्रति
tathārūpāṃ gṛhītvātha tāṃ devīṃ sa mahāmatiḥ
vasantakasakhaḥ svairaṃ pratasthe magadhānprati
- 13
तथा वासवदत्ता सा स्वगृहान्निर्गता सती
अगाच्चित्तेन भर्तारं पन्थानं वपुषा पुनः
tathā vāsavadattā sā svagṛhānnirgatā satī
agāccittena bhartāraṃ panthānaṃ vapuṣā punaḥ
- 14
तन्मन्दिरमथादीप्य दहनेन रुमण्वता
हा हा वसन्तकयुता देवी दग्धेत्यघोष्यत
tanmandiramathādīpya dahanena rumaṇvatā
hā hā vasantakayutā devī dagdhetyaghoṣyata
- 15
तथा च दहनाक्रन्दौ समं तत्रोदतिष्ठताम्
शनैः शशाम दहनो न पुनः क्रन्दितध्वनिः
tathā ca dahanākrandau samaṃ tatrodatiṣṭhatām
śanaiḥ śaśāma dahano na punaḥ kranditadhvaniḥ
- 16
यौगन्धरायणः सो ऽथ सह वासवदत्तया
वसन्तकेन च प्राप मगधाधिपतेः पुरम्
yaugandharāyaṇaḥ so 'tha saha vāsavadattayā
vasantakena ca prāpa magadhādhipateḥ puram
- 17
तत्रोद्यानगतां दृष्ट्वा समं ताभ्यामुपाययौ
पद्मावतीं राजसुतां वार्यमाणो ऽपि रक्षिभिः
tatrodyānagatāṃ dṛṣṭvā samaṃ tābhyāmupāyayau
padmāvatīṃ rājasutāṃ vāryamāṇo 'pi rakṣibhiḥ
- 18
पद्मावत्याश्च दृष्ट्वैव ब्राह्मणीरूपधारिणीम्
देवीं वासवदत्तां तां दृशोः प्रीतिरजायत
padmāvatyāśca dṛṣṭvaiva brāhmaṇīrūpadhāriṇīm
devīṃ vāsavadattāṃ tāṃ dṛśoḥ prītirajāyata
- 19
सा रक्षिणो निषिध्यैव ततो यौगन्धरायणम्
आनाययद्राजकन्या ब्राह्मणाकृतिमन्तिकम्
sā rakṣiṇo niṣidhyaiva tato yaugandharāyaṇam
ānāyayadrājakanyā brāhmaṇākṛtimantikam
- 20
पप्रच्छ च महाब्रह्मन्का ते बाला भवत्य् असौ
किमर्थम् आगतो ऽसीति सो ऽपि तां प्रत्यभाषत
papraccha ca mahābrahmankā te bālā bhavaty asau
kimartham āgato 'sīti so 'pi tāṃ pratyabhāṣata
- 21
इयमावन्तिका नाम राजपुत्री सुता मम
अस्याश्च भर्ता व्यसनी त्यक्त्वेमां कुत्रचिद्गतः
iyamāvantikā nāma rājaputrī sutā mama
asyāśca bhartā vyasanī tyaktvemāṃ kutracidgataḥ
- 22
तद् एतां स्थापयाम्य् अद्य तव हस्ते यशस्विनि
यावत्तमानयाम्यस्या गत्वान्विष्याचिरात्पतिम्
tad etāṃ sthāpayāmy adya tava haste yaśasvini
yāvattamānayāmyasyā gatvānviṣyācirātpatim
- 23
भ्राता काणबटुश्चायमिहैवास्याः समीपगा
तिष्ठत्वेकाकिनीभावदुःखं येन न यात्यसौ
bhrātā kāṇabaṭuścāyamihaivāsyāḥ samīpagā
tiṣṭhatvekākinībhāvaduḥkhaṃ yena na yātyasau
- 24
इत्युक्त्वा राजतनयामङ्गीकृतवचास्तया
तामामन्त्र्य स सन्मन्त्री द्रुतं लावाणकं ययौ
ityuktvā rājatanayāmaṅgīkṛtavacāstayā
tāmāmantrya sa sanmantrī drutaṃ lāvāṇakaṃ yayau
- 25
ततो वासवदत्तां तां स्थितामावन्तिकाख्यया
वसन्तकं चानुगतं तं काणबटुरूपिणम्
tato vāsavadattāṃ tāṃ sthitāmāvantikākhyayā
vasantakaṃ cānugataṃ taṃ kāṇabaṭurūpiṇam
- 26
सहादाय कृतोदारसत्कारा स्नेहशालिनी
पद्मावती स्वभवनं विवेश बहुकौतुकम्
sahādāya kṛtodārasatkārā snehaśālinī
padmāvatī svabhavanaṃ viveśa bahukautukam
- 27
तत्र वासवदत्ता च प्रविष्टा चित्रभित्तिषु
पश्यन्ती रामचरिते सीतां सेहे निजव्यथाम्
tatra vāsavadattā ca praviṣṭā citrabhittiṣu
paśyantī rāmacarite sītāṃ sehe nijavyathām
- 28
आकृत्या सौकुमार्येण शयनासनसौष्ठवैः
शरीरसौरभेणापि नीलोत्पलसुगन्धिना
ākṛtyā saukumāryeṇa śayanāsanasauṣṭhavaiḥ
śarīrasaurabheṇāpi nīlotpalasugandhinā
- 29
तामुत्तमां विनिश्चित्य महार्हैरात्मनः समैः
पद्मावती यथाकामम् उपचारैर् उपाचरत्
tāmuttamāṃ viniścitya mahārhairātmanaḥ samaiḥ
padmāvatī yathākāmam upacārair upācarat
- 30
अचिन्तयच्च काप्येषा छन्ना नूनमिह स्थिता
गूढा किं द्रौपदी नासीद्विराटवसताविति
acintayacca kāpyeṣā channā nūnamiha sthitā
gūḍhā kiṃ draupadī nāsīdvirāṭavasatāviti

